Konexio: “Gure helburua da erakundeei nazioarteko talentua aurkitzen laguntzea eta prozesu osoan laguntzea”

Pertsonak erakartzeko erronka areagotu egiten da enpresek horiek geografikoki lekualdatzea behar dutenean beren proiektuetan sartzeko. Hala ere, gero eta aukera lokal gutxiago egongo dira, eta gakoa prozesu hori aukera gisa ikustea izango da. Hala ulertu zuen Dative enpresa bizkaitarrak bere spin-off Konexio sortzea erabaki zuenean. Ander Markina Izagirrek, Konexioko Business Developer-ek, dioenez, ideia “eskaera handiko eta pertsona kualifikatu gutxiko” testuinguru ekonomiko batean sortu zen, Dativeren jardueraren lehen urteak markatu zituena, duela bost urte Bilbon ezartzea erabaki zuten konpainia handien etorrerarekin batera. 

Zein zen Dative, Konexioren matrizea, sortu zeneko eszenatokia? 

Dative kudeaketa integraleko sistemak garatzen ditu, analisi aurreratuen eta blockchain teknologiaren bidez pizgarri digitalak dituzten marketin-estrategietarako. Bizkaian jaio zen pandemia osteko etapan, Jonatan Amenedo, Alfredo González eta Ander Lópezen eskutik. Lan-merkatuaren eraldaketa sakoneko unea zen, BBVA eta OpenBank bezalako konpainia handiek Bilbo aukeratu zutenean beren datu-zentroak kokatzeko, eta bitartean enpresa amerikarrak eta europarrak beren mugetatik kanpo software-garatzaileak kontratatzen hasi ziren.  

Aldaketa horrek inflexio-puntu bat markatu zuen: tokiko soldatek gora egin zuten eta talentua lortzeko lehia areagotu egin zen, tokiko profesionalak erakartzea gero eta konplexuagoa bihurtuz. Eskari handiko eta profil gutxiko testuinguru horretan, Dativek Europako hainbat herrialdetan bezeroekin zituen proiektuetarako profesionalak erakartzeko digital hub bat sortu zuen. Bere bezeroei arreta emateko behar adina talentu aurkitzeko gero eta zailtasun handiagoari erantzuten zion. Hala, profesionalak nazioartean bilatzeari ekin zion, eta ikasteko prozesu bat hasi zuen hutsetik: nola erakarri Bilbora (Madril edo Bartzelonaren ordez) aldatzeko prest zeuden pertsonak, eta nola kudeatu behar ziren legezko izapide guztiak, haiei eta haien familiei heltze- eta egokitze-prozesuan laguntzeko. 

Noiz eman zen Konexio sortzeko urratsa?  

Bildutako esperientziatik abiatuta, 2024an Konexio sortu zen, beste erakunde batzuei nazioarteko talentua aurkitzen laguntzeko eta lege- eta birlokalizazio-prozesu osoan laguntzeko. Konexio da ikasitako guztiaren sintesia, Latinoamerikako 5 herrialdetatik 40 pertsona baino gehiago Bizkaira ekarri ondoren.  

Helburu argi batekin sortu zen: enpresei nazioarteko profilak erakartzea erraztea, errekrutamenduan, legezko izapideetan eta birlokalizazioan laguntza integrala eskainiz, giza eta hurbileko ikuspegiarekin. Konexio ez da ikuspegi teoriko batetik abiatzen, praktika errealetik baizik. Horregatik, ondo ulertzen ditugu talentua erakartzeko eta birlokalizatzeko urratsa ematean enpresek dituzten erronkak, eta lan egiten dugu modu eraginkorrean egin dezaten, prozesuaren pisu guztia beren gain hartu gabe.  

Enpresaren jarduerak bilakaera izan al du aurten?  

Bai, gure jarduerak bilakaera nabarmena izan du. Hasieran Konexio profil teknologikoetan zentratzen bazen ere, laster identifikatu genuen talentu eskasiak beste sektore giltzarri batzuei ere eragiten diela, bereziki industriari. Horregatik, gure ikuspegia zabaldu genuen, eta, gaur egun, enpresa industrialei laguntzen diegu ingeniariak, esperientzia duten lanbideetako teknikariak eta profesionalak gehitzen, hainbat herrialdetatik datozenak. Bilakaera horrek indartu egin du gure asmoa: talentua behar duten enpresen eta herrialde berri batean lan-aukera bat bilatzen duten pertsonen arteko zubia izatea.  

Zertan oinarritzen da enpresaren jarduera gaur egun?  

Konexiok industriaren eremuan egiten du lan nagusiki, gaur egun erronka handienetako bat duen sektorean: eskulan kualifikaturik eza. Arazoaren tamaina egiaztatzeko, Lanbide, Infojobs edo Linkedin bezalako plataformetan zenbat eskaintza huts agertzen diren ikusi besterik ez da egin behar. Gure lana enpresa horiei behar hori modu pertsonalizatuan eta egoera bakoitzera egokituta betetzen laguntzea da.  

Eta nolakoa da prozesu hori?  

Kasu bakoitza ingeniaritza-proiektu bat balitz bezala lantzen dugu, bere fase, mugarri eta jarraipen-bilerekin. Profila identifikatu ondoren, lege-izapide guztietan laguntzen dugu, dauden aukerak baloratuz; eta birlokalizazio-prozesuan laguntzen dugu, alderdi logistikoak eta familiarrak kontuan hartuta. Bereziki kontziente gara migrazio batek dakarren inpaktu emozionalaz. Horregatik, kontuan hartzen dugu migrazio-dolua, beren herrialdea, kultura eta laguntza-sarea atzean uzten duten pertsonen prozesu komuna. Enpresak eta talentu berriak trantsizio honen fase guztietan beharrezko laguntza izan dezaten lan egiten dugu. 

Zer arazo sortzen dira?  

Oztopo nagusietako bat etxebizitza eskuragarririk ez izatea da, batez ere Euskal Autonomia Erkidegoko zenbait eremutan. Horregatik, enpresei gomendatzen diegu hasiera-hasieratik inplikatzea aldi baterako bizitoki-konponbideak bilatzen, kontratazio-izapideak kudeatzen diren bitartean. Kontua ez da etxebizitza perfektua aurkitzea, pertsona lehenengo hilabeteetan kokatu ahal izateko leku bat baizik. Ondoren, haien beharretara hobeto egokitzen den aukera bat bilatuko da. Ez da gauza bera Bilbon edo Tolosan bizitzea, eta ñabardura horiek garrantzitsuak dira.  

Gainera, funtsezkoa da enpresek aldez aurretik planifikatzea lanean hasteko denborak, legezko prozesuek ez baitute ahalbidetzen berehala lanean hastea; alderantziz, orain, jatorrian kontratatzeko hiru hilabete baino gehiago behar dira. Latinoamerikatik, Asiatik edo Afrikatik datozen profilei ez ezik, Erresuma Batutik, Alemaniatik edo Frantziatik datozenei ere aplikatzen zaie hori, herrialde horietan aurreabisu-aldiak derrigorrezkoak eta luzeak izaten baitira.  

Zein da Konexioren balio erantsia?  

Esperientzia praktikoa, giza ikuspegia eta nazioarteko mugikortasunean espezializatzea uztartzea. Enpresek guregana jotzen dute plaza huts bat bide tradizionaletatik betetzea lortzen ez dutenean, edo tokiko merkatu saturatu batean lehiatzen ez jarraitzea nahiago dutenean. Kasu horietan, berehalako nazioarteko bilaketa bat aktibatzen dugu, lanpostuaren benetako beharrekin bat datozen profil kualifikatuak aurkitzera bideratua.  

Gainera, enpresak atzerritar bat hartzeko ingurune egokia duen ebaluatzen dugu, eta harekin lan egiten dugu haren laneratzea eta integrazio pertsonala errazteko. Halaber, enpresaren balio-proposamena aztertzen dugu, hainbat tresna txertatzeko, hala nola talentu oso kualifikatua erakartzera bideratutako onura fiskalak, edo hautaketa-prozesuetan eta onboarding prozesuetan hobekuntzak, kontratatutako pertsonentzat eta azkenean hautatuak ez direnentzat esperientzia positiboa sortzeko helburuarekin. 

SPRI Taldeak laguntza integralaren bidez berrikuntza, ekintzailetza eta barne-ekintzailetza laguntzen ditu, ideiak merkatura modu arrakastatsuan irits daitezen. Aurrera, Basque Fondo, Bind 4.0, Ekintzaile edo Barnekintzailetza ekintzailetzarako laguntza-programen bidez egiten du hori.