Gutram enpresak industria-hondakinak negozio-aukera berri bihurtzen ditu
Hierros y Metales Gutram Abanto-Zierbenan (Bizkaia) kokatuta dagoen enpresa bat da, eta hondakin industrial ez-arriskutsuen kudeaketa aurreratuan eta balorizazioan espezializatuta dago. Zehazki, konpainiak industria-hondakinak bigarren mailako lehengai eta industria-aplikazio berri bihurtzen ditu, berrikuntza teknologikoaren eta prozesu propioen garapenaren bidez. 25 langile ditu, eta enpresa industrialekin, eraikuntza-enpresekin, galdategiekin, altzairutegiekin eta obra zibileko operadoreekin dihardu, bai Euskadin, bai Estatuan. Gainera, harreman komertzialak ditu Europako Batasuneko bezeroekin, Bilboko Portutik gertu baitago.
Industria-hondakinen bilketa, garraioa eta sailkapen selektiboa, tratamendu mekanikoa eta balio-frakzioen bereizketa lantzen ditu, bai eta gero bigarren mailako lehengai gisa merkaturatzen diren material aprobetxagarri bihurtzea ere. Hondakinen kudeaketaz harago, Gutramek aurrerapauso bat eman du prozesu industrial propioen diseinuan, bigarren mailako materialen karakterizazio tekniko eta kontrolean eta produktu berrien garapenean.
“Hondakin jakin batzuen propietate tekniko espezifikoak identifikatzen ditugu, hala nola eroankortasun termikoa, konposizio mineralogikoa edo portaera mekanikoa, eta horiek aprobetxatzeko aplikazio industrial berriak garatzen ditugu”, azaldu du Silvia Gutiérrez Camus konpainiako proiektu-arduradunak. Bere ibilbidean, enpresak SPRI Taldearen laguntza jaso du, Hazitek programaren bidez, berrikuntza industriala, ekonomia zirkularra eta I+D+i konbinatzen dituzten hainbat proiektutan.
Etorkizunera begira, Gutramek hiru ardatzetan oinarritzen du bere garapena: berrikuntzen industrializazioa, I+D garapenak produktu komertzializagarri bihurtzeko; bere gaitasun industrialen zabalkuntza eta optimizazioa; eta ekonomia zirkularrari lotutako Europako merkatu berrietaranzko aliantzen indartzea eta hedapena. “Gure helburua da ekonomia zirkularra ingurumen-kontzeptua ez ezik, eredu industrial aurreratua eta lehiakorra izatea”, azpimarratu du Gutiérrez Camusek. Ikuspegi horrekin, hondakinen balorizazio aurreratuan eta material jasangarrien garapenean erreferente industrial gisa finkatu nahi du Gutramek.
SPRI Taldeak euskal enpresen I+G bultzatzen du tresnekin, aktiboekin, laguntzekin, lantalde eta aliantzekin, ikerketa sustatzeko eta teknologia berriak sortzeko. Elkartek, Emaitek edo Hazitek bezalako I+Grako laguntza programak kontsulta itzazu.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
