Fulcrum, fakturazioaren % 4 I+G arlora bideratzen duen Bizkaiko ingeniaritza-enpresa
Fulcrum Leioako enpresa bat da, 38 urte ditu eta ingeniaritza zibilaren munduan aritzen da. Fakturazioaren % 4 I+G arloan inbertitzen du, ikerkuntzarako eta garapenerako unitate espezifiko batekin. Enpresak SPRI Taldearen laguntza jaso du Hazitek programaren bidez. Programa horrek euskal enpresen ikerketa industriala eta garapen esperimentala babesten ditu.
Enpresa 1988an sortu zen Leioan, obra zibilaren sektoreko zazpi ekintzaile gazteren eskutik. “2012an 160 pertsona genituen eta bulegoak Estatu osoan. Nazioartekotzeko lehen estrategia batean ere murgildu ginen”, dio José Pablo Ormaechea Teknologia eta Berrikuntza arduradunak.
Krisiak kolpatu egin zuen 2013an, eta Aragoiko ingeniaritza batekin (Sers Consultores en Ingeniería y Arquitectura) fusionatu zen, FYSEG Taldea osatuz (Fulcrum eta Sers Engineering Group), krisitik ateratzeko indarrak osatzeko asmoz. “baina fusioak ez zuen esperotako fruiturik eman, eta are gehiago zaildu zen Fulcrum-en egoera delikatua”.
Horrela, FYSEG taldea desegitea eta “bezero lokalera itzultzea” erabaki zen etorkizuneko helduleku gisa. Une horretatik gaur egun arte, erakundea egonkortzen eta pixkanaka gora egiten hasi zen, emaitza itxaropentsuekin. Talentu gaztea ere sartu zen eta belaunaldien arteko lehen erreleboak izan ziren”.
Konpainiak ingeniaritza zibila eta zerbitzu erantsiak ditu ardatz, eta hiru negozio-unitate ditu: garraio-azpiegiturak, errepideak eta trenbideak; ura, ingurumena eta lurraldea, eta teknologia berriak. “Azpiegituren diseinuan, antolamenduan eta plangintzan, aurretiazko azterlan eta alternatiben azterlanetan, tarteko azterlanetan eta eraikuntza-proiektuetan dauden definizio-maila guztiak hartzen ditugu kontuan”.
2025ean, fakturazioa 8,5 milioi eurora iritsi da, eta 90 langile ditu. Fulcrumek I+G arloko unitate espezifiko bat du, eta horrek islatzen du enpresaren berrikuntzaren eta teknologiaren aldeko apustu garbia. “Hasiera-hasieratik, erakundeak informatika-unitate bat du, alde batetik barne-sistemetara eta prozesuen hobekuntzara bideratua, eta, bestetik, ingeniaritzako software-soluzioak garatzera eta ekoizpena hobetzera. 2006an, I+G+B eta Teknologia Unitatea sortu zen berariaz”.
Gaur egun, fakturazioaren % 4 inguru inbertitzen du modu iraunkorrean I+G+b arloko jardueretan, “hor gure administrazioen aparteko lankidetza dugu, bai ikuspuntu ekonomikotik, bai estrategikotik, baita laguntza aldetik ere”.
SPRI Taldetik Hazitek programaren bidez jasotako azken laguntza azpiegitura kritikoak, hala nola presak, kudeatzeko, ikuskatzeko eta kontserbatzeko prozesuak digitalizatzera bideratu da. “SPRIk Adimen Artifizialeko eta Machine Learningeko bi ekimenetan ere laguntzen digu, trenbideak kontserbatu eta mantentzeko eta mendi-hegalak kontrolatzeko”.
Datozen urteetarako erronkak, fakturazioa mantentzeaz eta pixkanaka areagotzeaz gain, honako hauek dira: “enpresaren nortasunaren printzipioak eta balioak, gure iraganean giltzarri izan direnak” mantentzea; ekoizpen-prozesuak hobetzea, “teknologian eta berrikuntzan oinarrituz, bizitzen ari garen adimen artifizialaren boomean arreta berezia jarriz”; eta talentu gazteari ibilbide profesional erakargarriak erakartzea eta eskaintzea, “elkarrekin egokitzeko bidean”.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
