Biodatupek saiakuntza klinikoen digitalizazioa bermatzen du
Biodatup 2017an sortu zen helburu argi batekin: saiakuntza klinikoak kudeatzeko irtenbide berritzaileak garatzea. Onintza Sayar Beristainen hitzetan, Biodatupeko Chief Operating Officer, “Enpresa saiakuntza kliniko multizentrikoen datuen kudeaketan, monitorizazioan eta koordinazioan zeuden eraginkortasun faltak identifikatzean sortu zen, eta horrek iMOTED plataformaren lehen bertsioa garatzera eraman zuen, CTMS aurreratu gisa. Denborarekin, ikuspegi hori eboluzionatu egin da, saiakuntza klinikoaren bizi-ziklo osoaren kudeaketa integral eta adimendunerantz”. Plataforma digital integral horrek saiakuntza klinikoaren fase guztiak hartzen ditu, eta Donostian du bere egoitza.
Soluzioak monitorizazio adimenduna eskaintzen du denbora errealean, administrazio- eta dokumentazio-lanak automatizatzen ditu, eta datu kliniko egituratuen eta egituratu gabeen analisi aurreratua egiteko aukera ematen du. Hori guztia adimen artifizialaren eta MLOps praktiken integrazioan oinarritzen da, eta, hala, osasun-informazioaren kudeaketa eraginkorragoa eta fidagarriagoa lortzen da. Horri esker, kostuak nabarmen murriztea lortzen da (kalkuluen arabera, %20 eta %40 artean murrizten dira), bai eta prozesuen eraginkortasuna eta datuaren kalitatea nabarmen hobetzea ere.
Biodatupek BioBizkaiarekin lankidetza bat hasi berri du Basurtu Unibertsitate Ospitaleko Onkologia Zerbitzuan SPRI Taldearen Hazitek programaren barruan. Plataforma teknologikoaren garapenean ikuspegi klinikoa integratzea da helburua. Aliantza horri esker, osasun-profesionalen benetako beharrak jaso ahal izango dira, arauzko eskakizunak zehaztu, erabilerako kasu klinikoak identifikatu eta pazienteen jarraipenera eta saiakuntza klinikoen monitorizazio adimendunera bideratutako Adimen Artifizialeko aplikazioak balidatu.
Biodatupek hamar langile ditu, eta etorkizunera begira, saiakuntza klinikoen kudeaketa adimendunean erreferente teknologiko bihurtzea du helburu, analitika prediktiboa eta pazienteen jarraipen pertsonalizatuko tresnak integratuz. Horrez gain, konpainiak aurreikusten du lizentzia eta zerbitzu jarraituetan oinarritutako negozio-eredu eskalagarri bat sendotzea, nazioarteko merkatuetara hedatzea, onkologiaren esparruan bereziki, eta ikerketa klinikoaren eraldaketa digitalean modu erabakigarrian laguntzea, saiakuntzen eraginkortasuna, segurtasuna eta pertsonalizazio-maila hobetuz.
SPRI Taldeak euskal enpresen I+G bultzatzen du tresnekin, aktiboekin, laguntzekin, lantalde eta aliantzekin, ikerketa sustatzeko eta teknologia berriak sortzeko. Elkartek, Emaitek edo Hazitek bezalako I+Grako laguntza programak kontsulta itzazu.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
