Javier Zumarraga (CMZ): “Berrizen izango dugun lantegi berriak urtean 800 makina ekoizteko gaitasuna emango digu”
80 urteko historia eta 7 ekoizpen-instalazioekin, CMZ Europako CNC tornuen fabrikatzaile nagusietako bat bilakatu da. Gaur egun, industria- eta nazioarteko hedapenarekin jarraitzen du, bi jarduera estrategikoren bidez: Berrizen muntaketa-lantegi berri baten eraikuntza eta Bostonen (AEB) lehen filialaren irekiera. Inbertsio horiek, enpresaren ekoizpen-gaitasuna indartzen dute eta merkatu estrategiko berrietarako ateak zabalduko dizkiete.
“Proiektu zirraragarri batean ari gara lanean: Berrizen egoitza eta muntaketa-lantegi berri bat, konpainiaren headquarters nagusi bihurtuko dena”, azaldu du Javier Zumarragak, CMZko nazioarteko salmenten arduradunak. Instalazioa 22.000 m²-ko lurzoruan kokatuko da, eta bertan muntatuko da gaur egun garapen-fasean dagoen tornu modelo berria. Horrela, CMZk urtean 800 makina fabrikatzeko gaitasuna izango du.
Era berean, konpainiak nazioartekotze-prozesuan urrats erabakigarria eman du, Bostonen (Massachusetts) filial bat irekiz. “AEB merkatua oso lehiakorra da, baina baita potentzial eta tamaina handikoa. Horretaz baliatuko gara, Bostonen izango dugun talde berriarekin”, adierazi du Zumarragak. Egoitza honetatik, CMZk merkataritza-sare bat garatuko du Estatu Batuetan eta Kanadan, 40 makinaz osatutako stock iraunkor baten laguntzaz.
Ekimen horiek guztiak hazkunde iraunkorreko ibilbidearen parte dira, integrazio bertikalean eta ekoizpen-prozesuen barne-kontrolean oinarritua. Azken urteotan, CMZk instalazio berriak martxan jarri ditu, hala nola Neoprec 2020an —“8.000 m²-ko planta bat, pieza txiki eta ertainen mekanizazioan espezializatua”— eta Precitor instalazioa, 2021ean berrituta —“zilindro formako piezen torneaketa eta artezketa lantzen duen unitatea, 12 CMZ tornu eta 4 artezketa-makina”—, Zumarragaren hitzetan.
Jasangarritasuna da enpresaren estrategiaren beste oinarrietako bat. “Gure tornuen osagaien %80 baino gehiago gure instalazioetan fabrikatzen dugu, eta horrek gure karbono-aztarna nabarmen murrizten du”, azpimarratu du Zumarragak. Tokiko ekoizpenak eta energiaren ikuspegitik eraginkorrak diren osagaien erabilerak aukera ematen dio CMZri errendimendu handiko eta ingurumen-inpaktu txikiagoko soluzioak eskaintzeko.
Euskal enpresen nazioarteko proiektuak bultzatzea da SPRI Taldearen helburuetako bat; izan ere, Basque Trade and Investment Nazioartekotzeko Euskal Agentziaren bidez, leihatila bakarraren bidez bere baliabide eta laguntza guztiak jartzen ditu enpresen eskura, adibidez Elkartu, Gauzatu edo BEINT eta Global Training Bekak.
