Ironchip enpresak nazioartean hedatzea azkartzea helburu duen 1,5 milioi euroko eragiketa amaitu du
Ironchip ek—lokalizazioan oinarritutako zibersegurtasunean eta autentifikazioan espezializatutako enpresa— nazioarteko hazkundea eta hedapena bultzatzera bideratutako 1,5 milioi euroko finantzaketa-txanda amaitu berri du.
Sabadell Venture Capital izan da eragiketaren liderra, eta oraingo akziodun nagusien babesa izan du: Inveready, Easo Ventures, Abanca eta Garapen Teknologiko eta Berrikuntzarako Zentroa (CDTI). Eragiketak zorraren bidez elkartzen ditu kapitala eta finantzaketa, zenbait ildo barne hartuta, besteak beste, ENISA eta bankuen laguntza.
Kapital-injekzio horri esker, Ironchip azkarrago sartuko da merkatu estrategiko berrietan, eta patentatutako teknologia garatzen jarraituko du. Azken horrek seinale elektromagnetikoak erabiltzen ditu erabiltzaileen identitate digitala lokalizazioaren arabera egiaztatzeko. Teknologia horrek jada bost milioi erabiltzaile baino gehiago babesten ditu funtsezko hainbat sektoretan; esaterako, finantzak, industria eta administrazio publikoa.
«Eragiketa horrek inflexio-puntua sortu du Ironchipentzat. Sabadell Venture Capitalen babesak eta gure inbertitzaileen konpromiso jarraituak gure egitekoa indartu dute: liderra izatea pasahitzik gabeko autentifikazioa lortzeko bidean (erabiltzailearentzat seguruagoa eta gardenagoa izango dena). Prest gaude gure teknologiarekin mundu mailan gora egiteko, eta zibersegurtasun adimendunaren eskari gorakorrari erantzuteko», erantzun du Julen Martínez Higuerok, Ironchipeko CEOak eta sortzaileetako batek.
Raúl Rodríguez Sabaterrek, Sabadell Venture Capitaleko kideak —Managing Director BS Capital unitatean— funtsak Ironchipen ereduaren alde egindako apustua nabarmendu du. «Ironchipi laguntzea erabaki dugu gaitasun tekniko handia, mundu mailako anbizioak eta lokalizazio adimendunean oinarritutako soluzio bereizgarria bateratzen dituen taldea delako. Haren proposamenak pasahitzekiko mendekotasuna ezabatzen du, eta erakundeentzat ezinbestekoa den testuinguruaren araberako segurtasun-geruza gehitzen du».
Soluzioaren teknologia-ahalmenari dagokionez, honako hau gehitu du: «Autentifikazio tradizionala gero eta arriskutsuagoa da. Ironchipen ikuspegiak, segurtasuna nabarmen hobetzeaz gain, frikzioa ezabatzen du erabiltzailearentzat, ia ikusezin bihurtuta. Uste dugu horrelako teknologiak mugarri izango direla enpresek aktibo digitalak babesten dituzten moduan».
Ironchip 2017an sortu zen, eta autentifikazio-sistema paregabea garatu du. Sistema horrek inguruko seinaleak baliatzen ditu —uhin elektromagnetikoak, esaterako— sarbideak testuinguruaren arabera baliozkotzeko. Eragiketa berri horrekin, enpresak bere posizionamendua finkatu du, Europako erreferente gisa, identitate digitaleko eta zibersegurtasun aurreratuko soluzioei dagokienez.
Enpresak SPRI Taldearen babesa jaso du teknologia-garapeneko proiektuetan, Euskadiko ETE moduan. «Gainera, gure bezero askok zibersegurtasuneko dirulaguntzak jasotzen dituzte, eta hori baliagarria izan da EAEko industria-egitura hazten eta babesten laguntzeko», adierazi du bozeramaileak.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
