Industri autobusetarako eta trenetarako osagarrien fabrikatzaileak esportazioak bikoiztu ditu
Industri Bizkaiko ETEa da eta autobusetarako eta trenetarako osagarriak fabrikatzen ditu. Aurten, fakturazioaren errekorra lortuko du. Nazioartekotzearen aldeko apustua egiten du, eta, izatez, azken bost urteetan esportazioak bikoiztu ditu. Hala, negozioaren % 20 dira dagoeneko. Enpresak SPRI Taldearen Konpetentzia Digital Profesionalen programaren dirulaguntza jaso du, Euskadiko enpresak osatzen dituzten pertsonen ezagutzak garatzen eta indartzen laguntzeko.
Industri 1957an, duela 70 urte, sortu zen familia-proiektua da: “nire aitonak tailer txiki bat sortu zuen Bilbon, Talleres Iris izenekoa, eta autobusetarako ispiluak, gortinak eta hautsontziak fabrikatzen zituzten besteak beste”, azaldu du Vanessa Yusta CEOak.
Negozioa indartuz joan zen, eta 1986an, familiaren bigarren belaunaldiarekin, egungo izena hartu zuen. 90eko amaieran, hazkunde-etapa erabakigarriari ekin zion eta 1999an Zamudiora lekualdatu ziren. “2001ean, unibertsitateko ikasketak amaitu ondoren, enpresan hasi nintzen lanean, eta 2016an aita erretiratu zenean, zuzendaritza-kargua hartu nuen, enpresaren hirugarren belaunaldia ordezkatuz”.
Enpresa Mungiako instalazio berrietara lekualdatzeke dago une honetan, eta 5.500 metro karratu baino gehiago izango ditu: “Hazten jarraitzeko urrats erabakigarria da gure ekoizpen-gaitasuna handitzea eta nazioarteko merkatuan izaten ari garen bultzada handiari erantzutea. Gure egungo instalazioak txiki geratu zaizkigu, eta aldaketa horri esker datozen urteetan anbizio eta sendotasun handiagoarekin jardungo dugu”.
Industrik autobusetarako eta trenetarako osagarriak fabrikatzen ditu. Barruko eta kanpoko atzerako ispiluak, gortina bilgarriak, gurpiletako edergarriak, sabaiko leihoak, pieza pertsonalizatuak, “eta gure instalazioetan oso-osorik garatutako bestelako ordezko pieza batzuk” eskaintzen ditu, “diseinuaren eta berrikuntzaren aldeko konpromiso irmoarekin”.
Euskadiko lehen mailako hainbat enpresa ditu bezero, hala nola CAF eta Irizar, bai eta trenen eta automobilen sektoreko nazioarteko fabrikatzaile liderrak ere, besteak beste, Alstom, Siemens, Stadler, Skoda eta Volvo.
40 langile inguru ditu dagoeneko eta aurten fakturazio errekorra lortuko du, 6 milioi euro ingurukoa. “Hamarkada hauetan une oso zailei egin diegu aurre —2008ko krisitik hasi eta Covidaren inpakturaino—, ahalegin kolektiboari eta suspertze jarraituari esker”.
Etxerako estoreak
Pandemian zehar La Casa del Estor sortu zuten, etxerako estoreak komertzializatzeko marka. “Kontsumo-testuinguru berriari erantzuteko sortu zen eta negozio-adar osagarri bihurtu da. Horri esker, gure jarduera dibertsifikatu dugu eta orain arte landu gabeko sektoreetara iritsi gara. Hala, gure irismena eta gure bezeroen oinarria handitu ditugu”.
Enpresak I+G saila du, eta diziplina anitzeko talde bat du produktu eta soluzio berriak garatzeko eta dagoeneko badituztenak hobetzeko etengabe lanean. “Hala, sektorearen abangoardian mantentzeaz gain, gure bezeroen eta nazioarteko merkatuen behar aldakorretara egokitu gaitezke”.
SPRI Taldearen Konpetentzia Digitalen programaren dirulaguntzarekin hobekuntzak egin ditu arlo garrantzitsuetan, besteak beste, datuen kudeaketan eta prozesuen automatizazioan. “Horri esker, efizienteagoak eta azkarragoak izango gara erabakiak hartzeko garaian”.
Nazioarteko hazkundeari aurre egitea da etorkizuneko erronka. “2020tik, gure esportazioen ehunekoa bikoiztu dugu; fakturazioaren % 10etik % 20ra. Horrek argi erakusten du nazioarteko merkatuak zabaltzeko egindako ahalegina eta izandako arrakasta. Hazkunde hori ezinbestekoa da autobusetarako eta trenetarako osagarrien fabrikazioan erreferente global bihurtzeko”.
Gainera, berrikuntzarekiko konpromisoari eustea aurreikusten dute, sektorea gero eta lehiakorragoa baita. Barne-mailan, taldearen hazkunde profesionala sustatzen jarraitzea da bere helburuetako bat. “Etengabeko prestakuntzaren eta talentu gaztea atzematearen aldeko apustua egiten dugu, batez ere arlo teknikoetan eta I+Gan, enpresaren epe luzeko iraunkortasuna bermatzeko”.
Horrez gain, jasangarritasunarekiko konpromisoa indartu nahi dute, “soluzio berdeagoak ezarriz gure ekoizpen-prozesuetan eta produktu berrien diseinuan, ingurumeneko inpaktua murrizteko”.
SPRI Taldeak Euskadiko enpresei bere kanaletan jardueraren berri emateko aukera ematen die. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
