Cretz Cargo, % 14ko hazkundea izan duen merkantzien nazioarteko garraio-enpresa
Cretz Cargo nazioarteko garraioan aritzen den Irungo enpresa familiarra da eta ia 20 urteko ibilbidea du. Fakturazioa % 14 handitu du azken urtean eta instalazioak handitzeko asmoa du. Enpresak SPRI Taldearen Zabaldu programaren dirulaguntza jaso du nazioartekotzea sustatzeko.
Enpresa 2007an sortu zen, Donostiako pisu txiki batean, Errumaniako ingeniari-bikote baten ekimenez. “Errumanian garraio-enpresa bat sortu genuen 1992an, baina ez genuen hazteko aukerarik ikusten eta Euskadira etorri ginen. 2004an garraio-enpresa bat sortu nuen Euskadiko lau bazkiderekin, Apolo logistika, eta bi urtez aritu ginen han Crez Cargo sortu genuen arte”, adierazi du Zorita Cretek, enpresaren sortzaile eta zuzendariak.
Merkantzia mota ororen nazioarteko garraioan aritzen da hasieratik. “Kamioi batekin eta bi langilerekin hasi ginen: senarra eta ni. Familiako enpresa izan gara beti, duela lau urte pertsona berriak sartu ziren arte”. 2012an egun Irunen dituzten instalazioetara aldatu zen enpresa, espazio handiagoa behar zutelako.
Cretz Cargok paketeak, automobilak, produktu kimikoak edo siderurgiakoak garraiatzen ditu, pakete txikietatik hasi eta bolumen handietaraino. “Hiru metroko garaierara bitarteko atoiak ditugu”. Hainbat sektoretako bezeroak dituzte; automobilgintzakoak, kimikakoak, siderurgiakoak, eraikuntzakoak eta elikagaien industriakoak besteak beste. Nazioarteko merkatuak hartzen du negozioaren % 75.
30 pertsona inguru dituzte plantillan, gidariak eta administrazioko langileak barne, eta iaz 8,5 milioi euro inguruko fakturazioa izan zuten, 2024an baino % 14 gehiago. “Merkatu berriak zabaldu nahi ditugu Portugalen, Polonian eta une honetan potentzial handia duten herrialdeetan, Austrian eta Hungarian”.
Cretz Cargoko sortzaileek Errumaniako lehenengo enpresa mantentzen dute eta Euskadikoarentzat egiten du lan: “abantaila bat da gidariak kontratatzeko garaian, oso zaila delako. Ez dago honetan lan egin nahi duen jenderik”. Europa osoko atseden hartzeko eta aparkatzeko eremuen azpiegiturak dira beste arazoetako bat, “baina Euskadiko Administrazioak egindako ahalegin handia ere aipatu behar dugu, inbertsio handiak egin baititu aparkalekuetan, adibidez Gipuzkoakoetan”.
SPRI Taldearen Zabaldu programaren dirulaguntza nazioarteko merkatu berriak aztertzeko erabili dute: “presentzia txikia dugun eta ekonomia berriak dituzten merkatuak, hala nola Erdialdeko Europakoak (Polonia, Hungaria…), eta Portugalgoa, Europan dugun posizionamendua aprobetxatuz”.
Etorkizuneko erronkak biltegiak handitzea eta Espainiako eguneroko bidaiekin jarraitzea dira: “Horrek bermatzen digu hemengoen lana, nazioarteko garraioa baino gehiago interesatzen baitzaie”. Gainera, belaunaldi-txandaketa ere lantzen ari dira, enpresaren familia izaerari eusteko, “eta espazio gehiago lortu nahi dugu, kamioientzako aparkalekua, mantentze-lanetarako tailerra edo garbitegi bat izateko”.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
