Basque Trade & Investment-ek Inflation Reduction Act (IRA) delakoaren eraginari buruzko txostena egin du
Deskargatu hemen txostena.
Zer da Inflation Reduction Act (IRA)?
Inflation Reduction Act-ak AEBetako energia garbian egindako inbertsio publikorik handiena dakar, eta merkataritza-fluxuetan eragin zuzena du.
2022ko abuztuaren 16an onartutako Inflation Reduction Act (IRA) AEBetako historian ingurumenaren arloan egindako inbertsio publiko handiena da. Helburua karbono-emisioak nabarmen murriztea eta energia berriztagarrien erabilera sustatzea da, babes soziala indartu, osasun-kostuak jaitsi eta diru-bilketak handitzearekin batera.
Legeak jasangarritasunaren arloan lan egiten duten enpresentzat aukera berriak irekitzen ditu, baina tokiko ekoizpena lehenesten duten baldintza zorrotzak ere ezartzen ditu. Ondorioz, nazioarteko merkataritzan eta enpresa europarren sarbidean eragina du.
Neurriak eta baldintzak: ekoizpen lokala funtsezkoa da
Zerga-pizgarrietara sartzeko, ekoizpena eta muntaketa tokian bertan egitea eskatzen da, kanpoko hornitzaileen parte-hartzea mugatuz.
IRAren neurrietan zerga-pizgarriak eta diru-laguntzak jasotzen dira, baina horietara iristeko baldintza batzuk bete behar dira. Adibidez, ibilgailu elektrikoak erosteko laguntza jaso nahi dutenek ziurtatu behar dute baterietan erabiltzen diren lehengaien %40 AEBetan edo akordioa duen herrialde batean ateratakoak direla, eta osagaien %50 AEBetan, Kanadan edo Mexikon fabrikatu edo muntatuak direla.
Energiaren sektorean ere baldintza zehatzak ezartzen dira. Zerga-pizgarrietara sartzeko, proiektuek AEBetan fabrikatutako burdina, altzairua eta produktu industrialak erabili behar dituzte. Honek bertako ekoizleak indartzen ditu, baina kanpoko enpresentzat oztopo izan daiteke.
Aukerak eta mugak enpresa europarrentzat
Enpresa europarrek kreditu fiskal batzuk eskuratu ditzakete, baina ekoizpen- eta ziurtapen-baldintza berrietara egokitu behar dute.
Automobilgintzan, orain arteko negoziazioek aukera ematen diete enpresa europarrei Ibilgailu Garbien Merkataritza Kreditura sartzeko, betiere ibilgailuak operadore komertzial estatubatuar bati saltzen bazaizkio. Energia sektorean, EBk merkatu energetikoa indartzeko neurriak hartu ditu: diru-laguntzak, salbuespen fiskalak eta baimenak erdiesteko erreformak.
Neurri hauek inbertsio-fluxua AEBetara bideratu dezakete, eta enpresa europarren lehiakortasuna murriztu. Hori dela eta, estrategia bateratua eta azkarra behar dute Europar Batasuneko erakundeek eta enpresek.
Inflation Reduction Actaren ondoren sektore estrategikoetan lehiatzeko gakoak
Euskal enpresek tokiko gaitasunak sendotu eta nazioarteko aliantzak bilatu beharko dituzte, egoera berrian lehiakorrak izaten jarraitu nahi badute.
Basque Trade & Investment-en azterketaren arabera, IRAk lehiakortasun handiko testuingurua sortzen du energia berriztagarrietan, automobilgintzan eta teknologia garbietan. Enpresa europarrek eta euskal enpresek kontuan hartu behar dituzte material estrategikoen jatorria, hornikuntza-katearen kokapena eta tokiko ekoizpen gaitasuna.
Horrez gain, EAEko erakunde publikoek eta enpresa-sareak elkarlanean jardun behar dute gaitasun lokalak indartzeko, nazioarteko aliantzak sortzeko eta AEBetako merkatuan sartzeko estrategiak garatzeko. IRAk mehatxua izan daiteke, baina baita lehiakortasuna handitzeko eta nazioartekotzea sustatzeko aukera ere.
