Euskadik Txilerekin duen aliantza komertziala indartu du arkitekturaren eta diseinuaren sektorean
Euskadik beste urrats bat eman du Latinoamerikarekin dituen harreman komertzialak sendotzeko, azaroaren amaieran Txilen egin zen Arkitekturaren Nazioarteko Topaketaren bidez. Euskadiko Ekipamendu, Zur eta Diseinuaren Klusterrak (Habic) antolatu du jardunaldia, eta Txileko Euskadiko Ordezkaritzaren eta SPRI Taldeko Basque Trade & Investment-en (BasqueTrade) laguntza estrategikoa izan du. Potentzial handiko merkatu batean euskal industriaren kalitatea, diseinua eta gaitasun teknologikoa proiektatzeko plataforma izan da jardunaldia.
Topaketak sektoreko 80 profesional baino gehiago bildu zituen, eta ezagutza trukatzeko, egungo joerak aztertzeko eta Txile eta Euskadiren arteko enpresa-konexio berriak sustatzeko erreferentzia-gune gisa finkatu zen. Testuinguru horretan, klusterreko kide diren 12 euskal enpresek osatutako ordezkaritza batek networking-eko gune batean parte hartzeko aukera izan zuen, eta bertan Hospitality sektorera bideratutako soluzio berritzaileak aurkeztu ahal izan zituzten.
Jardunaldia Claro Arenan egin zen, IDOM Consulting, Engineering, Architecture euskal enpresak diseinatutako gune enblematikoan, eta Euskadiko enpresek nazioarteko proiektu konplexuetan duten lehiakortasunaren erakusgarri izan zen. Ildo horretan, Samuel Araneda IDOMeko arkitektoak hitzaldi bat eman zuen, proiektu horren garapen- eta eraikuntza-prozesuan sakontzeko.
Erakundeen eta kulturaren arteko lankidetza
Topaketaren irekiera instituzionala Fernando Marquez Euskadiren Txileko ordezkariak egin zuen, eta Txileko eta Euskadiko enpresen arteko zubi estrategiko gisa duen eginkizunari balioa eman zion. Era berean, horrelako topaketak sustatzearen garrantzia azpimarratu zuen, Euskadiren eta Txileren arteko truke komertzial eta teknologikoa bultzatzeko.
Ekitaldiak kultura sustatzeko gune bat ere izan zuen, Euskadiren eta Txileren arteko lotura historikoa sendotuz, munduko euskal diasporarik handienetako bat hartzen duen herrialdea baita.
Edizio honen arrakastak berretsi egiten du euskal erakundeek nazioarteko lankidetza indartzen jarraitzeko eta Euskadiko berrikuntza Txileko merkatu estrategikoetara hurbiltzeko egin duten apustua, merkatu horietan habitataren eta arkitekturaren sektoreak hazkunde-potentzial handia erakusten jarraitzen baitu.
