Andoitz Korta: “BioSalud etorkizuneko sektorea da 2030eko Industria Planean, eraldaketa ekonomiko, teknologiko eta sozialerako duen gaitasunagatik”
Iberdrola Dorretxeko 29. solairuak BHC Eguna-ren edizio berria hartu du, Basque Health Cluster (BHC) erakundeak urtero antolatzen duen ekitaldia, eta arlo biosanitarioko 200 profesional eta erakunde inguru bildu ditu. Topaketa hutsa baino gehiago, jardunaldia sektorearen erronkak aztertzeko, konpromiso kolektiboa berritzeko eta osasuna Euskadiko etorkizuneko industria-motor gisa berresteko gune estrategiko bihurtu da.
Andoitz Kortak, Industria Sustapeneko sailburuordeak, ekitaldiari amaiera eman zion mezu argi batekin “gaur egungo garapen hau bat dator Europaren erronka nagusiekin. Batzordeak osasuna, bioteknologia eta industria medikoa finkatu ditu Europa jasangarri, berde eta burujabe baterako oinarrizko zutabe modura. Autonomia estrategiko irekia ez da hitz huts bat: ibilbide-orri bateratu bat da, eta Euskadik bere tokia hartu nahi du. Eta BioSalud etorkizuneko sektorea da 2030eko Industria Planean, eraldaketa ekonomiko, teknologiko eta sozialerako duen gaitasunagatik”.
“Horrek politika integralak eskatzen ditu: finantzaketa espezializaturako sarbidea, profil profesional berrien prestakuntza, nazioarteko lankidetza, eta berrikuntzaren industrializazioa bultzatzea. Zorionez, ez gara hutsetik abiatzen: badugu ekosistema sendo bat, eragile teknologikoak, unibertsitateak, startup aitzindariak eta, batez ere, lankidetza publiko-pribatuaren kultura sendoa. Horren adibide garbia da Osasun Poloa. 2026an martxan jarriko den nodo honek Euskadi Europako erreferente bihurtzeko aukera emango digu. Ez da proiektu isolatu bat, baizik eta klusterra eta erakunde publikoak elkarrekin egindako lanaren emaitza: gaitasunak, ikuspegia eta konpromisoa batzen dituen proiektu eraldatzailea. Gaur egun osasunean inbertitzea subiranotasunean, kohesioan eta etorkizunean inbertitzea delako” amaitu du Kortak
Batzar Nagusia: gobernantza, anbizioa eta ikuspegi partekatua
Jardunaldia 2025eko Batzar Nagusiarekin hasi zen; urteko emaitzak aurkeztu ziren eta ziklo estrategiko berriaren ibilbidea zehaztu zen. Asier Albizuk, BHCko presidenteak, ekitaldia zabaldu zuen klusterrak bizi duen heldutasun eta sendotze unea azpimarratuz. Idoia Muñozek, zuzendari nagusiak, 2024ko mugarri nagusiak eta 2025eko Plan Estrategikoaren ikuspegia aurkeztu zituen, sektorea berrikuntzaren, lankidetzaren eta nazioarteko proiekzioaren bidez bizkortzean zentratuta. Bere hitzaldian lau ardatz estrategiko azpimarratu zituen: teknologia berritzaileen egiturazko ezarpena, talentu espezializatuaren sendotzea, ekosistemaren nazioarteko proiekzioa eta industria-aukera berrien garapena.
Cendoya: Europa berrindustrializatu osasunaren bidez
Ekitaldi irekia irekiera instituzionalekin hasi zen eta jarraian, Manuel Cendoya zuzendari eta nazioarteko aholkulariak ponentzia nagusia eskaini zuen: “Europako berrindustrializazio saihestezina osasun sektoretik: guztion ardura” izenburupean. Cendoyak defendatu zuen Europari premiazkoa zaiola osasun arloko ekoizpen-, teknologia- eta erregulazio-subiranotasuna berreskuratzea. Osasuna eskubide soziala ez ezik, palanka ekonomiko eta geoestrategiko gisa aurkeztu zuen, eta lankidetza publiko-pribatuaren alde egin zuen, politika industrial ausartak eta tokiko gaitasun teknologikoen indartzea proposatuz.
Bio Osasuna Euskadin
Oro har, Euskadiko osasunaren ekosistemak 62.000 pertsona baino gehiago enplegatzen ditu, eta 9.400 milioi eurotik gorako fakturazioa sortzen du. Errealitate horren barruan, industria- eta teknologia-dimentsioak 240 enpresa baino gehiago eta kualifikazio handiko 20.000 enplegu inguru ditu, eta horietatik % 60 baino gehiago emakumeek betetzen dituzte. I+Gn gero eta inbertsio handiagoa, industria-sare indartsua eta terapia genikoa, osasun digitala edo bioteknologia industriala bezalako arloetan gaitasun nabarmenak dituen eremua da. Ezagutza, berrikuntza eta ekoizpena uztartzen dituen ekosistema, gure herriaren garapen ekonomikoan eta gure herritarren ongizatean modu eredugarrian laguntzen duena.
