Cometel, hondakin industrialen tratamendurako giltza eskurako soluzioak eskaintzen dituen familiako ETEa
Cometel familia-izaerako Gipuzkoako ETEa da eta hondakin industrialak garraiatu eta tratatzeko giltza eskurako soluzioak eskaintzen ditu. 37 urteko bizitza du eta esportazioek bere negozioaren % 70 baino gehiago gainditzen dute. Konpainiak SPRI Taldearen laguntza jaso du Industria digitala programari esker. Programa horren bidez, informazioaren eta komunikazioaren teknologien bidez euskal enpresen eraldaketa digitala lortu nahi da.
Enpresa 1987an sortu zen Elgoibarren makina-erremintarako ekipo osagarriak hornitzeko: txirbil-ateragailu txikiak, babes teleskopikoak eta karenajeak, adibidez. “1993an, bezeroak makina-erreminten fabrikatzailea izateari utzi zion. Hori beharrean, makina horien erosle bihurtu zen, serie handien mekanizatzaileentzako eta automobilgintzaren sektoreko piezen estanpatzaileentzako soluzio oso gisa balioa emateko”, azaldu du Iñigo Brosak, konpainiako zuzendariak.
2004an beste aurrerapauso bat eman eta Cometel Recycling sortu zuten, material birziklagarriak garraiatzeko, bereizteko eta sailkatzeko balio handiko proiektuetara bideratua. Handik gutxira sortu zuten Cometel Mexicana.
Bi negozio-lerro ditu: Lehenengoa hondakin bihurtzen diren estanpazio-ebakinetarako garraiatzaileak fabrikatzearekin lotuta dago. Bigarrena txirbilaren garraioarekin eta tratamenduaren soluzioekin lotuta dago (zentrifugagailuak eta birringailuak, adibidez), materialari balioa emateko (taladrina eta beste elementu kutsakor batzuetatik bereizita).
Giltza eskurako proiektuak dira (guztiak ezberdinak) eta Cometelek diseinutik hasi eta abian jartzeraino arteko prozesua egiten du. “Hemen, fabrikan, muntatzen eta probatzen dira. Gero, desmuntatu, bezeroarengana eraman eta berriro ere han muntatzen dira”.
Bezero nagusiak automobilgintzan eta aeronautikan daude. Esportazio mailak gorabeherak izaten ditu, baina normalean negozioaren % 70 gainditzen du. “Mundu osoan egiten dugu lan, baina batez ere Mexikon, Europan eta Estatu Batuetan”.
35 langile dira guztira eta urteko fakturazioa 6 milioi euro ingurukoa da. “I+G arloa jarraitua da, gure lanean eta gure produktuen bilakaeran”.
Azken urteotan, enpresak bere lau ardatzak eraldatzeko ahalegin inbertitzailea egin du: salmenta osteko zerbitzua bultzatzea (gorantz doa); datuen prozesuak eta gobernantza informazioaren sistemak business intelligence arloko soluzio batekin integratuta; berrikuntza, makinen funtzionamenduko datuak 4.0 industriaren bidez kudeatuta (eta, gainera, soldadura automatikoko robota erosi berri dugu); eta marketin digitala.
SPRI taldearen Industria Digitala programaren dirulaguntza business intelligence garapenera bideratu dute.
Honako hauek dira enpresak aurrean dituen erronka nagusiak: “aldaketa horiek guztiak maila teknologikoan” sendotzea eta adimen artifiziala enpresaren datuetan integratzea. “Horrez gain, merkatu berriak bilatzen, bi negozio-lerroak garatzen eta familia-enpresa honen belaunaldi mailako erreleboa prestatzen jarraitu nahi dugu”.
