Bihar Batteries: “Sodiozko bateriek enpresen energia-kostua % 50 murrizten lagun dezakete”
Bihar Batteries, 2023an Donostian sortutako startupa, ion-sodio bateriak garatzen ditu . Bateria horiek abantail ugari dituzte litiozkoen aldean, horiek baitira gaur egun merkatuan nagusi. “Europan ugariak eta eskuragarriak diren lehengaietan oinarrituta daude, eta horrek onura handia dakar hornikuntza-katearen segurtasunari dagokionez”, nabarmendu du Alberto Cendoya enpresako CEO eta sortzaileetako batek. Gainera, “ez dute su hartzen, oso tenperatura hotzetan funtzionatzen dute eta karga eta deskarga azkarragoak ahalbidetzen dituzte”.
Enpresaren merkatua oso zabala da. Bere lehenengo bezero potentzialak merkataritza eta industria sektoreetan daude, non enpresek euren emisioak eta kostu energetikoak murriztu nahi dituzten. “Bateria horiek enpresen energia-kostua % 50 murrizten lagun dezakete”, adierazi du Sebastián Fernández-Medrano enpresako COO eta sortzaileetako batek. “Itzalaldia bezalako gertaerek gaitasun elektrikoari dagokionez B plan baten beharra erakutsi dute, ez soilik sarearen menpe egotea”, azaldu du.
“Harritu egin ninduen ikusteak sodiozko bateriak gatza bezain lehengai ugariz egin zitezkeela”, adierazi du Cendoyak. “Horrek Europari independentzia energetikoa eman diezaioke une geopolitiko nabarmen honetan, eta ez egon, adibidez, Errusiako gasaren menpe”. Bihar enpresak sodio bateriaren lehen prototipoa garatu du dagoeneko, Euskadiko tokiko eragileekin elkarlanean. Gelaxka elektrokimikoak garatzeko, enpresa hasieratik ari da lankidetzan CIC energiGUNE zentro teknologikoarekin.
Gaur egun lau langile ditu enpresak, urte amaieran bi gehiago batzeko asmoarekin, eta bidean SPRI Taldearen babesa izan du: “Ekintzailea eman digute, BIC Gipuzkoatrekin batera, eta Hazitek programara aurkeztu gara”, nabarmendu du Cendoyak. “Oso positiboa da oinarri teknologikoko enpresa berriei laguntzea, eta etorkizunean programa gehiagotan parte hartzea espero dugu”.
Bihar Batteriesek bertako baliabideak aprobetxatu nahi ditu sodioa erauzteko gatza eta egurra, esaterako, beharrezko beste elementu bat lortzeko, ‘hard carbon’ izenekoa. “Gure helburua sodio baterien inguruan tokiko ndustria bat sortzea da”. Startupak datorren urtean saltzen hastea aurreikusten du, prototipatze fasearen ondoren, eta dagoeneko 600.000 euroko finantzaketa lortu du. Horri beste 2 milioiko finatziazio lortzea espero du, laguntza publikoekin batera. Gainera, energia berriztagarrien PERTEn hautatua izan da, bere lehen instalazio pilotua martxan jartzeko plan batekin, “gure azpiegitura propioa izateko funtsezko urratsa, tokiko eragileekin lankidetzan aritzeari utzi gabe”, amaitu du Fernández-Medranok.
SPRI Taldeak laguntza integralaren bidez berrikuntza, ekintzailetza eta barne-ekintzailetza laguntzen ditu, ideiak merkatura modu arrakastatsuan irits daitezen. Aurrera, Basque Fondo, Bind 4.0, Ekintzaile edo Barnekintzailetza ekintzailetzarako laguntza-programen bidez egiten du hori.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
