Tentsio baxuko kable elektronikoen soluzio pertsonalizatuak eskaintzen ditu CENSAk
Conductores Eléctricos del Norte, S.A. (CENSA) Hernanin kokatutako familia-enpresa da eta tentsio baxuko kable elektrikoen soluzio pertsonalizatuak eskaintzen ditu. I+Gko laborategi propioa du eta SPRI Taldearen Kloud programaren laguntza jaso du. Zerbitzu, datu eta aplikazio informatiko guztiak Cloud eremuetara migratzen laguntzen die programa horrek EAEko enpresei.
1964an sortu zen eta, beraz, 60 urtetik gorako esperientzia du tentsio baxuko kable elektrikoen fabrikazioan. Hasierako urteetan kable estandarra fabrikatzen aritu ondoren, aldaketa estrategiko garrantzitsua egin zuen 80ko urteetan eta neurrira egindako kable berezien diseinura, garapenera eta fabrikaziora bideratu zuen bere negozio-eredua. Entrega-epe oso txikiak ditu, 7 eta 10 egun artekoak, eta fabrikazio-kantitate minimoak ere txikiak dira (300 metro).
Gaur egun, eskariaren arabera egiten du fabrikazio guztia eta “bezero eta proiektu bakoitzarentzako seinale-, datu- eta potentzia-kableen soluzio pertsonalizatuak garatzen ditu, nazioarteko sektore espezializatuetako baldintza tekniko eta normatibo zorrotzak jarraituz”, Luis I. Ormaechea zuzendari nagusiaren arabera.
CENSAk hainbat sektore espezializaturentzako soluzio pertsonalizatuak eskaintzen ditu. “Sektore aeroespazialean, robotikan, elektromedikuntzan, sektore eolikoan eta eskakizun tekniko handiko industria-sektore espezializatu askotan erabiltzen diren seinale-, datu- eta potentzia-kable berezietan (tentsio baxukoak) jartzen dugu fokua, neurrira egindako gero eta soluzio gehiago behar baitituzte epe oso laburrean”.
34 langile ditu enpresak eta nazioarteko merkatuetatik lortzen dute fakturazioaren zati handi bat: “hainbat sektore espezializatutako OEMtatik. Neurrira diseinatutako eta garatutako produktuak behar dituzte, denbora errekorrean fabrikatu (7/10 egun) eta ordu gutxitan munduko edozein unetan entregatu daitezkeenak”.
Bezeroari zerbitzu pertsonalizatua eskaintzea eta proiektuaren fase guztietan bikaintasuna etengabe bilatzea dira merkatuko beste eragileengandik bereizten dutena. “Horri esker, bezero fidelen oinarri sendoa dugu duela 25 urte baino gehiagotatik, puntako hainbat sektoretan”.
I+Gri dagokionez, laborategi propioa du bere instalazioetan, CensaLab, eta “hainbat proba egiten zaizkie ekoitzitako kablearen metro guztiei, bai eta sektore espezializatuentzako I+Gko proiektuak ere”.
SPRI Taldearen Kloud programaren laguntzarekin Microsoft 365 inguruan egituratzeko plan bat egin dute, adituen laguntza teknikoarekin. “Alde batetik, gure helburua zen gure sistemaren eraginkortasuna hobetzea eta, bestetik, gure operazioen zibersegurtasunaren kudeaketan sendotasun handiagoa lortzea. Aldaketa horri esker, azkartasun operatibo handiagoa lortu dugu, cloud ingurune oso irisgarria eta segurtasun handiagoa ditugulako gure eguneroko lanean”.
“Gure bezeroei balio erreala emango dieten” zerbitzuak etengabe hobetzeko apustuarekin jarraitzea da etorkizuneko erronka: “inbertsioak eginez azken belaunaldiko makinetan eta gure ekoizpen-prozesuak hobetzeko metodologiak garatuz eta finkatuz, betiere gure bezeroen oraingo eta etorkizuneko eskariei erantzutea baldin badute xede”. Halaber, nazioarteko merkatuetan presentzia handitu nahi dute: “balio erantsi handiko sektoreak dituztenetan eta neurrira egindako soluzioak behar dituzten exijentzia tekniko handiko proiektuetan”.
SPRI Taldeak Euskadiko enpresei bere kanaletan jardueraren berri emateko aukera ematen die. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
