Euskal Encounter 34k BEC berrikuntzaren, teknologiaren eta kultura digitalaren topagune nagusi bihurtuko du berriro
- Openguneak, doako sarbidea duen espazioak, adimen artifizialari, konputazio kuantikoari, zibersegurtasunari, bideo-jokoei, 3D inprimaketari, hezkuntza-teknologiari, elkartasun-ekimenei eta publiko guztientzako beste hainbat gairi buruzko hitzaldiak, tailerrak eta erakusketa-eremuak eskainiko ditu.
- edizioaren babesleak Euskaltel Fundazioa, Eusko Jaurlaritza (SPRI Taldearen bidez) eta Bizkaiko Foru Aldundia dira. BBK Fundazioak eta Euskaltelek ere babesten dute ekitaldia.
Estatuko LAN party handiena eta Europako erreferentziazko bilgune teknologikoetako bat den Euskal Encounter topaketak, berriz ere, Bilbao Exhibition Centre (BEC) berrikuntzaren eta kultura digitalaren epizentro bihurtuko du. Lau egunez, informatikaren zale eta profesionalek ezagutzak partekatuko dituzte, proiektuak garatuko dituzte, lehiatuko dira eta azken joera teknologikoak ezagutuko dituzte, ikasteko, esperimentatzeko eta elkarlanean aritzeko diseinatutako ingurune batean.
- edizioak ahalmen handiko azpiegitura baten bidez konektatutako 4.000 ordenagailu baino gehiago bilduko ditu, eta azpiegitura horrek 70 gigabit segundoko Interneteko konexioa izango du Euskaltelen eskutik. Horrez gain, prestakuntza espezializatua, lehiaketak, sormen digitala, networkinga eta dibulgazio teknologikoa uztartuko dituzten ia 200 jarduera izango dira. BECeko bilkuraren ezaugarriek agerian uzten dute, beste behin ere, Euskal Encounter Estatuko ekosistema teknologikoko topagune nagusietakoa dela.
Aurtengo programak eraldaketa digitala bultzatzen ari diren bi teknologiatan jarriko du arreta berezia: adimen artifizialean eta konputazio kuantikoan. Hala ere, ez dira alde batera utziko zibersegurtasuna, eduki digitalen sorrera, bideo-jokoen garapena, hezkuntzan aplikatutako tresna digitalak edo sektore teknologikoak eskaintzen dituen lan-aukera berriak bezalako arloak.
Javier Gómez-Arrue Euskal Encounterreko antolatzaile nagusiaren hitzetan, «Euskal Encounter party bat baino askoz gehiago da; teknologian eta berrikuntzan oinarritutako topagunea da, pertsonak eta haien proiektuak elkarrekin lotzen dituena, teknologia gizartera hurbiltzen duena eta teknologiaren oraina nahiz etorkizuna erakusten dituena». Era berean, nabarmendu duenez, «ohikotik harago pentsatzen duen pertsona-komunitatea sortu nahi dugu; teknologia eta haren aplikazioak, ezagutza eta sormena, eta datuak eta gizarte-eragina uztartzeko gai izango den komunitatea. Horrela, elkarlaneko proiektuak sustatu eta ekitaldia amaitu ondoren ere bizirik iraungo duen berrikuntza-ekosistema eraiki nahi dugu».
Ekitaldia aurkezteko prentsaurrekoan, Nerea Enbeita Euskaltel Fundazioko zuzendariak adierazi duenez, «Euskaltel Fundazioan 25 urte baino gehiago daramatzagu teknologia pertsonengana hurbiltzen, STEM bokazioak sustatzen, talentua prestatzen, arrakala digitalak murrizten eta ezagutza partekatzeko guneak sortzen. Helburu horiek guztiak batera betetzen dituen jarduera batean pentsatzen badut, ez zait Euskal Encounter baino adibide hoberik bururatzen. Gainera, topaketa erreferente teknologikoa da; aurten berriz ere bere burua gainditu du Euskaltelek eskaintzen dituen 70 gigabit segundoko konexioarekin, eta beste behin ere bere marka propioak hautsi ditu, aldi berean 4.000 ordenagailu baino gehiagori konektibitatea emateko gai den azpiegiturari esker».
Bestalde, Joseba Mariezkurrena Bizkaiko Foru Aldundiko Ekintzailetza, Talentua eta Enpresa Lehiakortasuneko zuzendariak azpimarratu duenez, «Bizkaiak aurrerapen handia egin du digitalizazioan, eta orain erronka berri baten aurrean dago: teknologiak txertatzetik harago, modu estrategikoan integratzea, prozesuak, produktuak eta negozio-ereduak eraldatzeko». Testuinguru horretan, gaineratu duenez, «teknologiak talentua behar du: profil espezializatuak, baina baita ezagutza digitala enpresen benetako beharretara konektatzeko gai diren profesionalak ere». Mariezkurrenak azaldu du ‘Bizkaia with the Talent’ foru estrategiak bokazioak sustatzeko, gaitasunak garatzeko eta Bizkaiak eraldaketa teknologikoari aurre egiteko behar duen talentua erakartzeko lan egiten duela, eta nabarmendu du Euskal Encounter «jakin-mina, sormena eta partekatutako ezagutza etorkizunerako proiektu eta aukera bihurtzen dituen espazioa» dela.
Era berean, Elixabete Garcia Eusko Jaurlaritzako Eraldaketa Digitaleko zuzendariak adierazi du eraldaketa digitala ez dela une jakin bat, baizik eta etengabeko ikaskuntzaren, berrikuntzaren eta aukera berrien bidea: «Teknologia berri bakoitzarekin eraikitzen den ibilbidea da». Ildo horretan, Euskal Encounterrek hiru hamarkada baino gehiagotan belaunaldi desberdinak jakin-min teknologikoaren, ikaskuntzaren eta esperimentazioaren inguruan biltzeko izan duen gaitasuna azpimarratu du. Halaber, eraldaketa digitala «gure industriaren lehiakortasunerako palanka nagusietako bat» dela adierazi du, eta helburua honakoa dela nabarmendu du: «teknologia berriek eskaintzen dituzten aukerak berrikuntza, lehiakortasun eta Euskadirentzako aukera gehiago bihurtzea».
Ekitaldiko gune nagusiak
Opengune, publikoarentzat doakoa den espazioa, berriz ere topaketako erakargarri nagusietako bat izango da. Bertan eskaintza zabala egongo da: hitzaldiak, tailerrak eta erakustaldiak, baita 3D inprimaketari, hezkuntza-teknologiari, bideo-jokoen garapenari, elkartasun-ekimenei eta berrikuntzarekin lotutako enpresa eta erakundeei eskainitako guneak ere. Aurreko edizioetako esperientziari erreparatuta, milaka bisitari espero dira, eta teknologiara ikuspegi praktiko eta dibulgatzaile batetik hurbiltzeko aukera izango dute.
Euskal Encounterrek ohiko arlo esanguratsuenak izango ditu berriro: sormen digitala, hardwarea, software librea, bideo-jokoak, streaming-a eta aisialdi jarduerak. Bertaratzen direnek arte digitaleko hogei lehiaketa ingurutan parte hartu ahal izango dute, baita bideo-jokoetako dozenaka txapelketatan lehiatu eta programazio, kriptografia, hacking etiko, alderantzizko ingeniaritza, logika eta arazoen ebazpeneko erronkei aurre egin ere. Programa osoa ikaskuntza eta ezagutzaren trukea sustatzeko diseinatu da.
Euskal Encounterreko ateak zabalik egongo dira topaketaren giroa ezagutu eta kultura digitalean zein teknologia berrien gorakadan murgildu nahi duten guztientzat. Hori dela eta, Javier Gómez-Arruek herritarrak BECera gerturatzera gonbidatu ditu, Openguneak publiko eta ezagutza-maila guztientzat prestatutako jarduera-programa zabalaz gozatzera.
Ekitaldiaren babesleak Euskaltel Fundazioa, Eusko Jaurlaritza (SPRI Taldearen bidez) eta Bizkaiko Foru Aldundia dira. BBK Fundazioak eta Euskaltelek ere babesten dute ekitaldia.
