Bilenko startupak konektagarritasuna eskaintzen du landa-eremuetan eta industria-eremuetan
Bizkaiko Bilenko enpresak konektagarritasuneko soluzio osoak eskaintzen ditu operadore handiak iristen ez diren industria-eremuetan eta landa-eremuetan, hala nola wifia edo zuntz optikoa. Proiektuak garatu ditu dagoeneko Euskadin, Nafarroan, Kantabrian eta Kanarietan.
Bilenko 2022an sortu zen konektagarritasun aurreratuko soluzioak eskaintzeko kalitatezko aukerarik ez zegoen lekuetan. Industriako eremuetan eta landa-eremuetan telekomunikazioen azpiegituren eskari geroz eta handiagoa hauteman ostean sortu zen enpresa. “Ingeniaritza, zabalpena eta kudeatutako zerbitzuak uztartzeko apustua egin genuen hasieratik, ingurune teknologikorik onenek duten kalitatezko sarea eskaintzeko enpresei, administrazioei eta landa-eremuari”, aipatu du Iban Villar CEOak.
Hiru urtetan, tokiko enpresa izatetik balio handiko produktuetan espezializatutako enpresa teknologia izatera igaro da. “Zuntz optikoa, WiFi sare profesionalak, FTTR (Fiber to the Room) sistemak eta Euskadiko eta Kanarietako digitalizazio-proiektuak gauzatu ditugu”.
Urte hauetan inpaktu handiko proiektuak garatu ditu Bilenkok, besteak beste, Tenerifeko ingurumen-instalazioko eraldaketa digitala, El Hierroko Kabildoaren wi-fi sareak eta Euskadiko landa- eta industria-eremuetan neurrira egindako zuntz optikoaren hedapenak. “Konektagarritasuna sustatu dugu baserrietan, landako osatuetan, industrietan eta apartamentu turistikoetan, eta alternatibarik ez zuten eremuetara iritsi gara. Gure jarduera Bizkaira, Gipuzkoara, Arabara, Nafarroara, Kantabriara eta Tenerifera zabaldu da. Horrez gain, hitzarmen estrategikoak sinatu ditugu; esaterako, Nekaturrekin egindakoa, landako ostatuak digitalizatzeko. Ingeniaritza, obra zibila, telekomunikazioak eta zerbitzuaren mantentze-lanak erabiltzeko prest dagoen zerbitzuan integratzeko gai den enpresa gisa dugun posizioa indartzen dute mugarri horiek guztiek”.
Enpresak administrazio publikoentzat, industriarentzat, ETE-entzat eta landa-ingurunean bizi diren bezeroentzat egiten du lan. Konektagarritasuneko soluzio osoak —zuntz optikoa, WiFi6, GPON, LAN sareak—, bideo-zaintza sistemak, sarbideen kontrola eta industriako IoT eskaintzen ditu. Erabiltzeko prest dauden proiektuetan oinarritzen da bere proposamena eta diseinua, exekuzioa eta mantentze-lanak integratzen ditu, “ingurune bakoitzera egokitutako errendimendu handiko azpiegiturak bermatuz”.
Bilenkok hazkunde jarraitua izan du sortu zenetik eta proiektuen kopurua eta negozioaren zifrak handitu ditu urtez urte. Fakturazioaren % 5 eta % 10 artean inbertitzen du sare adimendunetara, IoT-ra eta belaunaldi berriko konektagarritasunera bideratutako berrikuntza-jardueretara.
SPRI Taldearen Banda Zabala programako dirulaguntzak landa-eremuetan eta sakabanatutako eremuetan zabaltzeko erabili dira, enpresek, baserriek eta ostatuek ez baitzuten kalitatezko soluziorik. “Laguntza horri esker, FTTH sareak eta gaitasun handiko zerbitzuak ezartzeko prozesua azkartu dugu, eta, hala, tokiko negozioek, nekazaritzako ustiategiek eta urruneko etxebizitzek hiri-inguruneetako konektagarritasun berbera dute. Bultzada hori garrantzitsua izan da arrakala digitala murrizteko eta lurraldearen lehiakortasuna hobetzeko”.
Etorkizuneko erronka Euskadiko erreferentziazko bazkide teknologikoa izatea da, enpresetako, baserrietako, landa-ostatuetako eta negozio txikietako digitalizazioa indartuz. “IoTn oinarritutako soluzio berriak, sare adimendunak eta landa-eremuei zein industriakoei egokitutako zerbitzuak sustatu nahi ditugu eta neurrira egindako zuntz optikoa zabaltzeko gaitasuna handitu nahi dugu. Gure helburua lurraldean inpaktu erreala sortzen jarraitzea da eta konektagarritasun aurreratua jarduera ekonomikoa, pertsonen egunerokoa eta tokiko lehiakortasuna gehien eraldatzen duen lekura eramatea”.
SPRI Taldeak Euskadiko enpresei bere kanaletan jardueraren berri emateko aukera ematen die. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
