AT Mecasol-ek digitalizazioaren eta jasangarritasunaren aldeko apustua sendotzen du bere hazkunde industrialean
2013an sortu zenetik, AT Mecasol-ek etengabeko bilakaera izan du, industriarako mekanizazio eta soldadura soluzio pertsonalizatuetan erreferente bihurtu arte. Berrizen duen egoitza nagusitik, enpresak zerbitzu integrala eskaintzen du: arazoaren azterketatik konponbidera arteko prozesu ia osoa bere kabuz egiten du, azpikontratazioa ia ezabatuz. “Gure bezeroen arazoak konpontzen ditugu. Kalteak dituzten piezak konpontzen ditugu edo, beharrezkoa bada, berriz fabrikatzen ditugu”, azaldu du Alberto Ezquerra enpresako kudeatzaileak.
Hamaika pertsonako lantaldearekin eta berriki handitutako pabiloiarekin, AT Mecasol hainbat sektoretarako lan egiten du: industria mantentze-lanak, makina-erreminta, sarrailagintza edo balbulagintza, besteak beste. Erronka tekniko konplexuei aurre egiteko duen gaitasunari esker, bezeroentzako aliatu estrategiko bihurtu da enpresa.
Azken urteotan, AT Mecasol-ek 4.0 industriari lotutako teknologiak integratu ditu bere digitalizazioaren aldeko konpromiso sendoaren barruan. Horrela, prozesuen eraginkortasuna eta kalitatea hobetu ditu, bulego teknikotik zuzenean makinetara eramandako programazioari esker.
Garapen hau posible izan da, neurri batean, SPRI Taldearen laguntzari esker, Industria Digitala programaren bidez. “SPRI Taldearekin bi proiektu garatu ditugu eta horiei esker gure gaitasun digitalak hobetu ditugu. Enpresaren kudeaketa ia osoa gaitasun horietan oinarritzen da, bai administrazioan bai produkzioan”, adierazi du kudeatzaileak.
Gainera, enpresak jasangarritasuna du estrategiaren beste ardatz nagusietako bat. Horretarako, sortzen duen hondakina gutxitzea eta hornitzaile hurbilekin lan egitea du helburu; izan ere, hornitzaile horiek bere instalazioetatik 100 kilometro baino gutxiagora daude.
Testuinguru horretan, berrikuntzak ere funtsezko eginkizuna betetzen du enpresarentzat. “Teknika berriren bat ezagutzen badugu eta guretzat erabilgarria izan daitekeela uste badugu, beti aplikatzen saiatzen gara”, nabarmendu du Ezquerrak.
Etorkizunari begira, AT Mecasol bere makineria-parkea handitzean eta bere produkzio-gaitasunaren hazkunde jasangarrian zentratuta dago. Hala ere, enpresak aurre egin beharreko erronka nagusietako bat langile kualifikatuak lortzea da, ezinbestekoak baitira teknologia berriak integratzeko eta hazkunde erritmoari eusteko. “Zaila da teknologia berriak eskuratzea haiek erabiltzeko beharrezko ezagutza gabe”, onartu du Ezquerrak.
SPRI Taldearen helburuetako bat euskal enpresen eraldaketa digitala da. Besteak beste, Smart Industry, BDIH Konexio, Zibersegurtasun Industriala, Enpresa Digitala edo Inplantalariak laguntza-programen bidez bultzatzen du.
Gainera, SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
