MESAko langileen % 29 emakumezkoak dira
Manufacturas Eléctricas SA (MESA) Bizkaiko enpresa, erdi- eta goi-tentsioko energia arloko soluzioetan espezializatuta dagoena, eta Schneider Electric taldean sartuta dagoena, izan da orain gutxi SPRI Taldeak egindako “Berdintasunak industria-lehiakortasunean duen eragina” ikerlanaren erreplikan emaitza onenak lortu dituen enpresetako bat. Azken urteotan, emakumeen presentziak hazkunde iraunkorra izan du langileen artean, 2021ean % 17 izatetik 2025ean % 29 izatera igaro baita. Aurrerapen horrek enpresak berdintasunarekin eta aniztasunarekin duen konpromisoa islatzen du eta hori guztia Taldearen estandar globalekin bat datorren berdintasun arloko ikuspegi integralaren bidez finkatu da.
Konpainiak onartzen du politika globalen bidez berdintasuna eta aniztasuna modu aktiboan sustatzen duen multinazional bateko kide izateak erraztasunak ematen dizkiela gai horiek oraindik hain presente ez dituzten beste enpresa batzuen aurrean.
Bulegoei dagokienez, enpresaren helburua da emakumeen % 50eko ordezkaritza lortzea. Tailerrean, aldiz, emakumeen presentzia txikia da oraindik ere, eta helburua da lantaldea gaztetzea eta emakume eta gizon gazteei sarbidea erraztea, Lanbide Heziketako zentroekin lankidetzan arituta. Ekimen horri esker, produkzio arloan 4 emakume izatetik 20 baino gehiago izatera pasatu dira.
Emakumeei enpresarako sarbidea erraztu ahal izateko, MESAk diskriminazio positiboko neurriak aplikatzen ditu eta, hala, emakumezko hautagaitzen azterketa lehenesten du. Era berean, hutsik dauden plazen baldintzak malgutu dituzte, eta lehen espezifikoegiak ziren eskakizun akademikoak edo esperientzia mailakoak zirela eta baztertuta geratzen ziren profilak gehitzeko aukera eman du horrek. “Konturatu ginen esklusiboak izaten ari ginela ikasketekin eta ibilbidearekin lotutako irizpide zorrotzegiak eskatzen ari ginelako”, dio Ana Garcia MESA enpresako Giza Baliabideetako arduradunak. Malgutze horrek handitu egin du talenturako sarbidea, eta hona hemen horren erakusgarri bat: orain gutxi, Psikologiako prestakuntza duen pertsona bat kontratatu dute lehen ingeniarientzat gordetzen zuten postu komertzialerako.
Talentu gazte femeninoa gehitzeko, Young Graduate programa korporatiboa ere badute. Programak lanpostu hutsak izateko aurreikuspenak dituzten sail teknikoetara graduatu berriak sartzea ahalbidetzen du. Programa eraginkorra izan da, parte-hartzaile asko kontratu mugagabera pasatu baitira.
Lidergoari dagokionez, MESAk Schneider Electric Taldearen helburu korporatiboa betetzeko egiten du lan: tarteko aginte-postuetan eta zuzendaritza-batzordeetan emakumeen % 30 izatea. Horretarako, Women in Leadership taldearen programetako batean oinarritzen dira. Programa horren helburua da emakumeen talentua erantzukizuneko posizioetara bideratzea eta sustatzea.
Lana eta bizitza pertsonala uztartzea da beste zutabe estrategikoetako bat. MESAk legeak ezarritako baimenak nabarmen gainditzen dituzten baimenak ditu, 20 astera arteko jaiotza-lizentziak barne. Kontziliazio-neurri horiek eta beste batzuk, hala nola malgutasuna edo lanaldi-egokitzapenak, berdin hartzen dituzte gizonek eta emakumeek, eta aldizkako inkesten bidez osatzen dira, langileen gogobetetzea ebaluatzeko. Gainera, telelana bereziki estimatzen dute (kontziliazio-baliabide gisa beharrean, produktibitaterako tresna gisa ezarrita dago).
Gainera, enpresak soldataz kanpoko onura ugari eskaintzen ditu, hala nola, jatetxe-txartelak, fisioterapia lantokian, ongizate-programak eta edoskitze-gela bat, amatasun-baimenaren ondoren emakumeak lanera itzultzea errazteko.
Kultura inklusibo horren erakusgarri gisa, MESAK aniztasuna lantzeko lantaldeak ditu. Bulegoetako eta lantegiko langileek osatzen dituzte, eta jarduerak antolatzen dituzte egun seinalatuetan, hala nola Emakumearen Nazioarteko Egunean edo LGTBI Harrotasunaren Egunean.
MESAk ikerketa horretan parte hartzea B·WOMENIN Industry ekimenaren barruan kokatzen da, SPRI Taldeak bultzatuta. Horren helburua da emakumeak Euskadiko industrian betetzen duen zeregina ikusarazi eta bultzatzea.
