Lehendakariak Aernnovak Arabako Berantevilla herrian duen lantegia bisitatu du
Imanol Pradales Lehendakaria Aernnovako lantegian izan da, gaur goizean, Berantevillan (Araba). Bere hitzaldian, Eusko Jaurlaritzak aeronautikaren eta sektore aeroespazialaren alde egindako apustua berretsi du Lehendakariak, zehazki, sektore hori estrategikoa dela adierazi du, “euskal industria aurreratuaren ikurra baita”.
Teknologia aurreratuko aeroegituretan espezializatutako enpresaren instalazioetara egindako bisitan, Lehendakariarekin batera, bertan izan dira Industria, Trantsizio Energetiko eta Jasangarritasuneko Mikel Jauregi sailburua, Iñaki López Gandásegui Aernnovako presidentea, Ricardo Chocarro kontseilari delegatua, Hipólito Suárez idazkari nagusi eta zuzendari korporatiboa, Gemma Ortiz de Barrón harreman instituzionaletako zuzendaria eta Nestor Aristegui Aernnova Aeroestructuras Arabako zuzendari gerentea.
Lantegitik ibilbide bat egin dute, eta bertan Imanol Pradalesek Aernnovaren sorrerako arima nabarmendu du. “Aernnovak bere sorrerako arima berari eusten dio. Arriskatu, inbertitu, eta, ilusioz, aurrera begiratu. Betiere honako araua zutabetzat hartuta: teknologia aeronautiko berritzaileak garatzea, sektorearen jasangarritasuna eta eraginkortasuna bultzatzeko, horrela, etorkizun arduratsuago baten alde egiteko”, goraipatu du Lehendakariak.
Ziurgabetasuna nagusi den garaiotan, segurtasuna transmititzeko beharra nabarmendu du Imanol Pradalesek. “Are gehiago, Euskadirentzat hain estrategikoak diren enpresa eta sektore batean. Horregatik, Eusko Jaurlaritzan dagokigun lekuan egongo gara, beti bezala. Arriskatzeko eta pauso bat aurrera emateko prest. Gu prest gaude ekuazio horretan errotzea bermatu eta kalitatezko enplegurako baldintzak erraztuko dituen osagaia izateko”, nabarmendu du Lehendakariak.
Testuinguru horretan, Pradalesek berriki onartutako ‘Euskadi Eraldatuz 2030’ inbertsio-planaren garrantzian sakondu du, horixe baita Euskadiren etorkizun ekonomikoaren zutabea. “Aernnova bezalako enpresek hauspoa eta hegoak ematen dizkiote gure Herriari, kalitatezko enplegua eta aberastasuna sortuz, talentua bultzatuz eta erakarriz, eta gure ongizatea bermatzen lagunduz”, amaitu du Lehendakariak.
Gaur egun, Aernnovak 30 aireontzi-modelo baino gehiagorentzat diseinatu edota fabrikatzen ditu elkarrekin lotutako egitura eta osagaiak, orotara, 5.900 langile ditu, horietatik 1.500 Euskadin, eta urteko fakturazioa 1.000 milioi euro ingurukoa da.
