FLFk atleten kirol-errendimendua hobetzeko bi produktu berri merkaturatuko ditu 2026an
From Lab to Field (FLF) startupa 2023an sortu zen “kirol errendimendua hobetzen duten produktuak sortzeko, eraginkorrak eta kontsumitzeko erosoak”, adierazi du Leire Izagirre Urkizu FLFko ikertzaileak. Gainera, konpainiak “2026an zehar” bere lehen bi produktuak merkaturatuko dituela aurreratu du.
Euskal enpresaren ordezkariak dioenez, produktu berri horiek, “merkatuko beste batzuek ez bezala, energia-substratu berri bat dute, formula guztiz disruptiboak dira”. Produktu hauen helburu nagusia “atletaren kirol errendimendua hobetzea da, energia sortzeko gaitasuna hobetuz edo nekea atzeratu eta errekuperazioa hobetuz”, azaldu du Izagirrek.
FLFren berrikuntzaren aldeko apustua argia da. “I+D da gure enpresaren motorra, eta produktu hobeak aurkitzeko, hobetzeko eta sortzeko dugun etengabeko nahiaren adierazle”, dio.
Formula berriak
Haren hurrengo plan eta helburuen artean daude, halaber, ikertzaileak azaldu duenez, “ikertzen jarraitzea eta formula berriak garatzea, eta dagoeneko horretan ari gara lanean”. Hala, epe ertainera, gaitasun operatiboa handitu nahi du enpresa bizkaitarrak, “ekoizpen propioko planta bat sortuz, edo espazio zabalago bat sortuz”; horrez gain, “profil tekniko eta kudeaketa profil berriekin” taldea indartu nahi du Leire Izagirrek.
Aldi berean, merkatuan duen presentzia sendotzea, bere ekoizpena eskalatzea eta berrikuntza bultzatzen jarraitzea du helburu, gero eta gama osoagoa eta espezializatuagoa eskaintzeko. “Gure asmoa da Europako merkatuan zuzenean sartzea eta, epe laburrean, nazioarteko merkatura ere zabaltzea, Estatu Batuak barne”, gaineratu du.
Startupak sei langile ditu, eta elikagaien sektorean jarduten du, batez ere kirol-nutrizioan eta osasunean.
SPRI Taldearen Ekintzaile+ eta Hazitek programetan parte hartu du euskal konpainiak. Bere esperientzia, ikertzailearen arabera, “oso onuragarria izan da parte hartu duten pertsona guztien arreta bikainagatik, gertuko jarraipena izan dutelako, proiektuari laguntzeko benetako interesagatik eta profesionaltasunagatik eta hori bultzatzeko eskura jartzen dituzten baliabideengatik”.
SPRI Taldeak laguntza integralaren bidez berrikuntza, ekintzailetza eta barne-ekintzailetza laguntzen ditu, ideiak merkatura modu arrakastatsuan irits daitezen. Aurrera, Basque Fondo, Bind 4.0, Ekintzaile edo Barnekintzailetza ekintzailetzarako laguntza-programen bidez egiten du hori.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
