Jeremias, urtean % 10etik gorako hazkundea izan duen tximinien, hodien eta aireztatze-sistema mekanikoen fabrika
Jeremias Iurretako (Bizkaia) enpresa bat da eta Alemaniako Jeremias GMBH taldearen parte da. Tximiniak eta kea eta gasak ateratzeko eta ebakuatzeko altzairu herdoilgaitzezko hodiak fabrikatzen ditu, bai etxeetarako, bai industriako proiektu handietarako edo data centerretarako. Azken 10 urteetan arrakasta handia izan du eta bi digitutik gorako hazkundea izan du urtetik urtera. Enpresak SPRI Taldearen Hazinnova programaren hainbat dirulaguntza jaso ditu. Programa horrek doako aholkularitza eskaintzen die ETE-ei negozioaren berrikuntzarako.
Jeremias España 2008an sortu zen Zornotzan, Jeremias GMBH multinazional alemaniarraren barruan. Multinazional hori liderra da berogailuen, energia-sorkuntzaren eta aireztapenaren industrian, eta kea eta gasak ateratzeko soluzioak eskaintzen ditu. “Kea ateratzeko hodiak fabrikatzen hasi ginen eta hazkunde oso adierazgarria izan genuen azkar batean”, azaldu du enpresak.
Hazkunde horren ondorioz, espaziorik gabe geratu ziren Zornotzan eta 2020an egungo kokaleku estrategikora lekualdatu ziren: Bilbotik 30 kilometrora eta A8 autobidearen pistaren alboan. Enpresaren arrakastaren erakusle da, besteak beste, 2014an 80 pertsona zeudela plantillan eta egun 190 inguru direla.
Gaur egun, 21.000 metro karratuko instalazioak ditu, eta horietatik 9.000 baino gehiago ekoizpenera bideratuta daude. 21 metroko garaierako biltegi automatikoa du eta paletentzako 4.500 postu ditu. Halaber, enpresaren zerbitzu dinamiko bereizgarria bermatzen du.
Jeremiasek mota guztietako tximiniak eta altzairu herdoilgaitzezko hodiak fabrikatzen ditu etxeetarako (pelletezko tximiniak), industria-proiektuetarako (talde elektrogenoentzako “metro batera bitarteko diametrokoak”), ospitaleetarako, suaren aurkako soluzio zorrotzak behar dituzten jatetxeetarako edo azpiegitura konplexuetarako, besteak beste, gaur egun adimen artifizialaren eraginez hazten ari diren datuak prozesatzeko zentroetarako.
Askotariko bezeroak ditu: etxeko sektorearentzako hornitzaileak, ingeniariak eta etxebizitza-eraikinetarako edo industriarako aireztatze-hodiak eta tximiniak instalatzen dituzten eraikitzaileak.
Urtean 32 milioi euro inguruko fakturazioa du, eta bi digituko hazkundea izan du urtero azken 10 urteetan zehar. Iurretako fabrika da Alemaniako multinazionalak Espainian duen bakarra eta Europako fabrikarik modernoetako bat da bere sektorean.
I+Gri dagokionez, “proiektuak egiten ditugu ia urtero eta, 2024an, Bizkaiko Aldundiak enpresa berritzailearen saria eman zigun”.
Salmenten erdia baino gehiago atzerrian egiten dira. “Asko mugitzen gara Asian, Singapurretik hasita. Bezero bat dugu Japonian etxeko tximinietarako eta merkatu indartsua dugu Frantzian eta Erresuma Batuan”.
SPRI Taldearen Hazinnova programaren dirulaguntza pertsonen kudeaketarako izan da, giza baliabideen sailerako proiektu handiagoak ezarri baitituzte.
Hazkundeari eustea, Asiako merkatua finkatzea eta Amazonen edo Googleren moduko datu-zentroetan lider mantentzea da erronka, sorgailu elektriko asko behar dituztelako eta bakoitzak tximinia bana duelako”. Enpresa harro dago “produktua diseinatzeko eta ziurtatzeko” duen azkartasunaz eta dinamismoaz. “Inork ez du gurearen moduko ziurtatutako produkturik”.
SPRI Taldeak Euskadiko enpresei aukera ematen die bere kanaletan jardueraren berri emateko. Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
