Lehendakariaren iritziz Euskadi funtsezko eragilea da Europaren berrindustrializazioan eta autonomia estrategikoan
Imanol Pradales Lehendakariak, Mikel Jauregi Industria, Trantsizio Energetiko eta Jasangarritasuneko sailburuarekin batera, Grupo ULMAren -ULMA Packaging Y ULMA Medical Technologies-, instalazioak bisitatu ditu gaur goizean. Bisitan, konpainiaren eredu kooperatiboaren garrantzia nabarmendu du, ziurgabetasuna nagusi den testuinguru global batean errotzearen, lehiakortasunaren eta berrikuntzaren adibide gisa.
Bisitaren ondoren, Lehendakariak ohartarazi du tentsio geopolitikoek, gerrek eta ondorengo krisiek baldintzatutako nazioarteko egoera bereziki kaltegarria dela Euskadiren gisako ekonomia industrial eta esportatzaileetarako. Ildo horretan, adierazi du Europa eraldaketa sakona eskatzen duen bidegurutze baten aurrean dagoela, eta paralelismoak egin ditu industria-birmoldaketako prozesu historikoekin. Era berean, defendatu du kontinenteak munduan duen zeregina zehaztu behar duela eta ahots bakar batez jardun behar duela, baita bere autonomia estrategikoa indartu ere.
Pradales Lehendakariak aditzera eman du Europak erronka horri aurre egiteko tresnak zehaztu dituela zenbait ekimenen bitartez —hala nola ‘Clean Industrial Deal’, Industria Bizkortzearen Legea edo Berrikuntzaren Legea gisako ekimenen bitartez—, eta berretsi du “ekintzaren eta apustu erabakigarrien garaia” dela. Testuinguru horretan, azaldu du Euskadiren estrategia “Defentsa, Errotzea eta Hazkundea” ereduaren inguruan egituratzen dela, Europako politikekin bat.
Eredu horrek uztartzen ditu epe laburrerako neurriak —Industriaren Defentsarako Taldearen bidez industria-jarduera babestera bideratzen direnak— eta eraldaketa ekonomikoa bultzatzeko epe ertain eta luzerako ekimenak —Industria Plana, Euskal Finantza Aliantza, Berrikuntza Itsasargiak edo Zientzia, Teknologia eta Berrikuntza Planaren birformulazioa, esaterako—.
Lehendakariak nabarmendu du Euskadik Europaren berrindustrializazioan aitzindari diren lurraldeetako bat izateko gaitasunak, baldintzak eta anbizioa dituela, eta, aldi berean, lehiakortasuna hobetzen eta garapen-aukera berriak sortzen laguntzen duela.
Horren adibide gisa jarri du ULMA gisako enpresek Europa mailako proiektu estrategikoetan izan dezaketen zeregina, hala nola teknika eta material berrien bidez etxebizitzak eraikitzea eta birgaitzea sustatzeko Europako Inbertsio Bankuaren plana. Aditzera eman du industriaren arloko ‘Made in Euskadi’ ezagutza eta esperientzia funtsezkoak direla etorkizuneko erronka handiei aurre egitera begira.
Azkenik, Lehendakariak berretsi du Euskadik berrindustrializazio-prozesuarekin eta Europaren subiranotasun estrategikoa indartzearekin duen konpromisoa, eta nabarmendu du Euskal Autonomia Erkidegoak ekarpen aktiboa egiten jarraituko duela industria, teknologia eta berrikuntzaren arloan dituen gaitasunetatik abiatuta.
