StatAI Solutions enpresak robotika eta adimen artifiziala uztartzen ditu prozesu industrialen eraldaketa bultzatzeko
StatAI Solutions enpresa gasteiztarra sistema robotiko aurreratuetan eta adimen artifizialeko softwarean espezializatuta dago, eta ingurune fisikoarekin modu autonomoan elkarreragiteko gai diren soluzioak diseinatzen ditu. Bere jarduera startup-ei zein enpresa industrialei automatizazioarekin, makinen kontrolarekin edo ekoizpen prozesuetan adimen artifizialaren integrazioarekin lotutako arazo konplexuak bideratzen laguntzea da.
Zehazki, enpresa arabarrak ‘Physical AI’ soluzioak garatzen ditu, adimen artifiziala eta robotika integratzen dituen planteamendua, ingurune industrialetan zuzenean aplikatzeko. Bere proposamenak gaur egungo erronka handienetako bat bete nahi du: arlo teorikoko aurrerapen teknologikoak industriako erabilera praktikora eramatea. “Gaur egun enpresa askok adimen artifiziala txertatu nahi dute, baina makina edo prozesu industrialetan aplikatu behar denean konplexutasuna asko handitzen da. Gure xedea da, hain zuzen ere, ikerketa teknologikoaren eta haren benetako aplikazioaren arteko muga horretan lan egitea”, azaldu du Cristian Napolek, StatAI Solutions-eko CEOak.
Ikuspegi horren bidez, robotek eta makinek beren ingurunea uler dezakete, eta zereginak modu autonomoan gauza ditzakete. Gainera, bereziki erabilgarria da profesional kualifikatuek denbora gehiena eskuzko lanetan edo lan errepikakorretan ematen duten prozesuetan. “Gero eta kasu gehiago ikusten ari gara, non robotikak profesionalari balio zuzenik ematen ez dioten lanak lagundu edo automatizatu baititzake. Hor, adimen artifizialaren eta sistema fisikoen konbinazioak benetako eragina izan dezake eraginkortasun industrialean”, dio Napolek.
Enpresa Euskal Herriko Unibertsitatearekin (EHU) lankidetzan ari da, robotek beren ingurunearekin elkarreraginean jarduten ikasteko duten modua hobetzeko I+Gko lerro batean, eta, programazio tradizionalaren ordez, adibideen bidez irakasten die robotei. Aldi berean, enpresak bezero industrialekin lan egiten du automatizazio aurreratuko proiektuetan.
StatAI Solutionsek SPRI Taldearen laguntza jaso du Ekintzaile programaren bidez, eta proiektu bat aurkeztu du Hazitek programan, Robotekin-ekin lankidetzan, bere gaitasun teknologikoak garatzen jarraitzeko. Etorkizunera begira, konpainiak ‘Physical AI’-ren aldeko apustua indartzea, industria-sarean duen eragina areagotzea eta bere lantaldea handitzea aurreikusten du.
SPRI Taldeak enpresei laguntzen die 2024ko Adimen Artifizial Aplikatua eta Datuaren Estrategia laguntza-programaren bidez. Programa horrek Euskal Autonomia Erkidegoko konpainietan AAren erabileran oinarritutako proiektuak babesten ditu, frogapen-efektua dutenak eta Euskadin teknologia horren eskaintza eta eskaria aktibatzea ahalbidetzen dutenak, enpresei lehiakortasuna handitzeko tresnak emateko helburuarekin.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
