Kevo Technologies-ek adimen artifizial erabilgarri eta operatibo baten alde egiten du
Kevo Technologies Gipuzkoako ingeniaritza eta aholkularitza enpresa bat da, adimen artifizialean espezializatua, eta ideiak AAn oinarritutako produktu operatibo bihurtzen laguntzen diena erakundeei. Ahots-teknologien bidez arreta- eta administrazio-prozesuak automatizatzen ditu, enpresen eguneroko funtzionamenduan integratzeko.
“Gure helburua adimen artifiziala demo batean ez geratzea da, baizik eta barne-sistemetara konektatuta funtzionatzea eta emaitza neurgarriak ematea“, azaldu du Javier Manzano enpresako CEOak. “Horretarako, plataforma propio bat konbinatzen dugu, bezeroak behar duenean integrazio sakonerako gaitasuna duena”.
Konpainiak hamar pertsona inguruko taldea du, ingeniaritza, adimen artifiziala eta produktu-profilekin, eta proiektu bakoitzaren beharren araberako kolaboratzaile espezializatuekin indartzen du bere jarduera. Hasiera-hasieratik, Kevok dei, mezu, eskaera edo jarraipenetan hizkuntzaren kudeaketa lantzearen aldeko apustua egin zuen, baita AA generatiboa jendarteratu aurretik ere.
Negoziora konektatutako AA-soluzioak
Enpresekin egin beharreko lana arazoa eta arrakasta neurtzeko modua argi eta garbi definitzetik hasten da. Hortik aurrera, Kevok soluzio teknologikoa diseinatu, bezeroaren sistemekin konektatu eta benetako erabiltzaileekin probatzen den lehen bertsio bat sortzen du. Behar bezala funtzionatzen duela egiaztatu ondoren, sistema behin betiko jartzen da martxan, eta etengabe hobetuz doa.
“Adimen artifizialean, operazioa eta sistemaren gobernua hasierako garapena bezain garrantzitsuak dira”, dio Manzanok. “Horregatik, negoziotik eta soluzioa erabiliko duten taldeetatik oso gertu lan egiten dugu”.
Enpresak laguntzaile adimendunak garatzen ditu, hainbat kanal eta soluzioren bidez zereginak automatizatzen dituztenak, erakundeetan ezagutza antolatzeko eta hobeto aprobetxatzeko. Gainera, belaunaldi-errelebora eta profilen eta trebetasunen azterketara bideratutako proiektuak bultzatzen ditu, langileak hautatzeko prozesuei laguntzeko, betiere bazkide teknologikoekin eta ikerketa-bazkideekin lankidetzan.
Kevo Technologies-ek adimen artifizialaren bazkide tekniko eta estrategiko gisa jarduten du, eta, besteak beste, alderdi hauek lantzen ditu: datuaren gobernantza, segurtasuna, integrazioa eta araudia betetzea. Bide horretan, Mondragon Corporation, Eroski, LKS Next edo Eldu bezalako erakundeekin lan egin du.
Enpresak SPRIk bultzatutako berrikuntza-ekimenetan parte hartu du. Ekimen horiek funtsezkoak izan dira soluzioen baliozkotzea bizkortzeko, gaitasunak indartzeko eta proiektu pilotuak eta lankidetzak errazteko. “Laguntza mota hauek funtsezkoak dira garapen teknologiko zorrotz eta lehiakor bati eusteko”, dio Manzanok.
Etorkizunera begira, Kevo Technologies-ek helburu nagusi bezala, Angara plataforma haztea, aholkularitza-lana indartzea eta aliantza estrategikoak finkatzea. Enpresak erreferente izan nahi du adimen artifizialaren aplikazio arduratsuan, erakundeen egunerokotasunean ondo integratutako irtenbide praktikoak eskainiz.
SPRI Taldeak enpresei laguntzen die 2024ko Adimen Artifizial Aplikatua eta Datuaren Estrategia laguntza-programaren bidez. Programa horrek Euskal Autonomia Erkidegoko konpainietan AAren erabileran oinarritutako proiektuak babesten ditu, frogapen-efektua dutenak eta Euskadin teknologia horren eskaintza eta eskaria aktibatzea ahalbidetzen dutenak, enpresei lehiakortasuna handitzeko tresnak emateko helburuarekin.
