Enpresako kudeatzaile Asier Aguirrebeña eta I+G-ko arduradun Unai Andrés.
Berrikuntza
Albisteak 22 Azaroa, 2021

MIM Tech Alfa, tamaina txikiko piezentzako teknologia berritzailea

Eibarren kokatutako enpresa honek BDIH Konexio programaren laguntza jaso du bere lantegia automatizatzeko

 

Eibarko Alfa Talde historikoan integratutako MIM Tech Alfa S.L. enpresak tamaina txikiko piezak fabrikatzeko teknologia berritzaile bat eskaintzen du (MIM – Metal Injection Moulding), eta teknologia horri esker posible da zehaztasun handiagoa izatea eta kostuak merkatzea. Konpainiak SPRI Taldearen laguntza jaso du BDIH Konexio programaren bitartez, zeinarekin Basque Digital Innovation Hub-ek ETEen eskura jartzen baitu fabrikazio aurreratuko aktibo eta zerbitzuen sare konektatu bat prestakuntzarako, ikerketarako, testak egiteko eta baliozkotze prozesuetarako.

 

MIM Tech Alfa 2004an sortu zen. Une hartan, altzairuaren mikrofusioa zen Alfa Taldearen negozioetako bat, eta aukera ikusi zuten negozio horretan MIM teknologia aplikatzeko osagarri bezala.  “Ez zen izan erraza, teknologia sortu berria baitzen” azaldu dute enpresako kudeatzaile Asier Aguirrebeñak eta I+G-ko arduradun Unai Andrések.

 

“Hasteko, mikrofusioko bezeroen zorroa erabiltzen hasi ginen. Asko kosta zitzaigun haiei ikusaraztea teknologia honek funtzionatzen zuela, eta lan tekniko-komertzial eskerga egin behar izan genuen, batik bat atzerrian” gaineratu dute. Enpresak konponbide integrala eskaintzen die MIM bezeroei, hots, muntatzeko prest dagoen pieza bat, “eta inguruko enpresak baliatzen ditugu amaierako pieza eskaintzeko”.

 

MIM teknologia berritzaileak erabiltzen duen lehengaia nahasketa bat da, metal hautsa eta aglutinatzailea (feedstock) konbinatzen dituena, eta “lehendabizi egiten dena da nahasketa horri forma eman injekzio bidez. Plastikoak aukera ematen du metal hautsa presio altuan injektatzeko eta piezak behar duen forma emateko. Bigarren fasean, plastikoa ezabatzen dugu prozesu kimiko baten bidez, eta azkenik, piezak sinterizatu egiten dira, uzkurtu egiten dira metalezko piezaren amaierako egitura lortu arte”. Prozesu horri esker, “piezek % 96-99 bitarteko dentsitatea izan ohi dute, oso porositate gutxirekin. Propietateak altzairu urtuaren oso antzekoak dira”.

 

“Behin MIM prozesua amaitutakoan posible da bestelako tratamenduak egitea, bezeroak eskatzen duenaren arabera (termikoak, azalekoak, herdoilaren aurkakoak…). Ondorengo operazio horiek azpikontratatu egiten ditugu, eta gure zaintzapean garatzen dira beti. Giltza eskuan proiektuak egiten ditugu, hau da, bezeroari amaierako pieza ematen diogu”.

 

MIM Tech Alfa da Euskadin teknologia hau erabiltzen duen enpresa bakarra, eta beste bat baino ez dago Estatuan.

 

Hiru ezaugarri

Lehiakor izateko, teknologia honek hiru ezaugarri behar ditu: pieza txikiak, konplexuak eta serie handiak. “Gure piezen pisua gramo batetik 150-200 gramora bitartekoa izan daiteke, baina gehienak 60 gramotik beherakoak dira. Geometriak konplexua izan behar du, sinplea bada merkeago ateratzen delako beste metodo batzuekin. Eta fabrikazio-bolumen handia behar du, hasi hainbat mila unitatetik eta milioika unitateraino. Ez da zentzuzkoa urtean 150 pieza egitea, horretarako behar den moldea garestia baita”.

 

Enpresa honek defentsa, sarrailagintza eta tresneria sektoreetarako egiten du lan nagusiki. Bere esportazioa produkzio osoaren % 80koa da, gehienbat Europara esportatzen duelarik, eta Europa barruan Alemaniara.

 

Une honetan 30 pertsona ditu plantillan “eta 50 baino gehiago lanaldi osoan aritzen dira. Gainera, badugu tokiko hornitzailez osatutako sare bat (ia denak EAEkoak): molde fabrikatzaileak, tratamendu termikoak, etab. Horrela, lanpostu asko mantentzen dira” diote. Plantillako kideen batez besteko adina 37 urtekoa da. “Gazteak dira eta badute jakin-mina. Bultzada bat da, etengabe hobetzen jarraitzeko”.

 

Enpresaren urteko fakturazioa 10 milioi ingurukoa da, eta hortik % 7a bideratzen da, gutxi gora-behera, I+G-ra. “Hazten ari gara. Administrazio kontseiluak 1,5 milioi euroko inbertsio bat onartu du produkzio gaitasuna handitzeko, fakturazioa bikoiztu egin baita bi urtean”. MIM Tech Alfa konpainia pribilejiatu bat da, COVID-19ak ez baitio eragin. “Pandemia aurretik baino lan gehiago daukagu orain, presentzia dugun sektoreetako eskaera igo egin delako”. Konpainiak hazkunde iraunkorra izan du urtero, % 15 eta % 20 bitartekoa, baina azken bi urteetan asko hazi da.

 

BDIH Konexio programaren laguntza lantegia automatizatzeko erabili da. Zehazki, plataforma autonomo robotizatu bat instalatu dute, Tekniker teknologi zentroaren laguntzarekin. “Ikusi genuen enpresan bazeudela toki batetik besteetara eskuz egiten ziren material-mugimenduak, inolako baliorik ematen ez zutenak, eta ez hori bakarrik, denbora eta eraginkortasuna ere galarazten zutenak. SPRIren laguntzari esker, plataforma hau probatu genuen, lantegiko lokalizazioaren eta mapeatzearen fidagarritasuna ziurtatu genuen, ibilbideak zehaztu genituen eta ingurunearekiko bizikidetza ere bai, aldatu egiten baita materialak eta pertsonak mugitzen direnean. Baliozkotze tekniko-ekonomikoa egin genuen eta egiaztatu genuen oso sistema malgua zela. Orain lantegia zabaltzeko prozesuan murgilduta gaude, eta hori bukatutakoan plataforma instalatuko dugu”.

 

Konpainiaren erronka batzuk dira digitalizazioa eta automatizazioa, batez ere fabrikazio gehigarriari dagokionez, “MIMen antzekoak diren teknologiak baititu. Dagoeneko badaukagu makina bat metalezko fabrikazio gehigarrirako, eta bi Hazitek laguntza lortu ditugu (SPRI Taldearen laguntza-programak), zeintzuetan enpresa desberdinen makinak erabiltzen baititugu teknologia desberdinekin”.

 

Gainera, negozioa dibertsifikatu nahi dute, eta medikuntzaren sektorean sartu. Aholkularitza bat kontratatu dugu merkatuko analisi bat egin dezan medikuntza sektorean erabiltzen diren piezen inguruan, esaterako robot besoentzako osagaiak. Bestalde, aukera berriak aztertzen ari gara sentsorikaren munduan”. Ingurumen kudeaketari dagokionez, ISO14000 ziurtagiria eskuratu nahi dute, helburutzat izanik urteko % 15eko  hazkundea erdiestea.

Lotutako albisteak

Horizon  Europe  2025:  7.300  milioi  euro  enpresa  berrikuntza  bultzatzeko  Europan
15/05/2025 Berrikuntza

Horizon Europe 2025: 7.300 milioi euro enpresa berrikuntza bultzatzeko Europan

SPRI-ren eskutik, EEN sarearen euskal nodoaren koordinatzaileak garen aldetik, euskal enpresei Horizon Europe programan parte hartzen laguntzen diegu. Enterprise Europe Network (EEN) Europako sare bat da, ETEen hazkundea eta nazioartekotzea bultzatzen duena

Eusko  Jaurlaritzak  13,65  milioi  euro  bideratuko  ditu  enpresen  berrikuntzara
09/05/2025 Berrikuntza

Eusko Jaurlaritzak 13,65 milioi euro bideratuko ditu enpresen berrikuntzara

SPRI Taldeak maiatzean zabalduko ditu Fast Track Innobideak, Hazinnova eta BDIH Konexio programak

Mikel  Jauregi  Industriako  sailburuak  Aernnova  enpresa  bisitatu  du,  soluzio  aeronautiko  aurreratuetan  liderra
07/05/2025 Berrikuntza

Mikel Jauregi Industriako sailburuak Aernnova enpresa bisitatu du, soluzio aeronautiko aurreratuetan liderra

Aernnova enpresak Araban du egoitza, eta lider espezializatua da aeroegituren eta horien osagaien diseinuan, fabrikazioan, mantentze-lanetan eta zerbitzuetan. Ia 6.000 langile ditu 7 herrialdetan, eta 2025ean 1.000 milioitik gorako fakturazioa izatea espero du.

ETEentzako  produktuen  eta  prozesuen  berrikuntza  babesten  dugu  Hazinnovarekin
02/05/2025 Berrikuntza

ETEentzako produktuen eta prozesuen berrikuntza babesten dugu Hazinnovarekin

Hazinnova euskal ETE-ei doako aholkularitza eskaintzen dien programa da, produktu eta prozesuetan berrikuntza-mikroproiektuak bultza ditzaten. Eska ezazu 2025eko maitzaren 6tik urriaren 29ra.

ESGI  188  (European  Study  Group  with  Industry)  Bilbon  izango  da  2025eko  maiatzaren  26tik  30era
24/04/2025 Berrikuntza

ESGI 188 (European Study Group with Industry) Bilbon izango da 2025eko maiatzaren 26tik 30era

Enpresek problema matematikoak aurkezten dituzte azterketa-taldeak konpon ditzan, askotan modelizazio edo optimizazio moduan.

Kontsulta  irekia:  Spri  Taldearen  laneko  prebentzio-zerbitzuak  definitzeko  zure  aukera
15/04/2025 Berrikuntza

Kontsulta irekia: Spri Taldearen laneko prebentzio-zerbitzuak definitzeko zure aukera

Sprik merkatuko aurretiazko kontsulta jarri du abian, lan-arriskuen prebentzioaren eta osasunaren zaintzaren sektorearen benetako beharretara egokitutako lizitazioa diseinatzeko. Horren bidez, operadore ekonomikoen ekarpenak bildu nahi dira, kontratazio-prozesu lehiakor, garden eta merkatuko jardunbide egokienekin lerrokatua egituratzeko.

Sustatu  berrikuntza-proiektuak  zure  enpresan  Fast  Track  Innobideak  ekimenarekin
10/04/2025 Berrikuntza

Sustatu berrikuntza-proiektuak zure enpresan Fast Track Innobideak ekimenarekin

Fast Track Innobideak Euskadiko enpresa berritzaileen kopurua handitzeko eta sustatzeko sortu zen. Merkatuan ondasun edo zerbitzu berriak sartu dituzten edo enpresan negozio-prozesuak hobetzen dituzten berrikuntza-jarduerak babesten ditu, enpresa lehiakorrago bihurtzeko.

NudgeXperience  Bilbon:  CX  eta  Portaera  Zientzien  ekitaldia
28/03/2025 Berrikuntza

NudgeXperience Bilbon: CX eta Portaera Zientzien ekitaldia

Zuzendariei eta gerenteei, Cx-eko arduradunei eta berrikuntza eta marketineko profesionalei zuzendua

Connect  Group,  zentro  teknologikoa  Donostian  duen  multinazionala
27/03/2025 I+G+B

Connect Group, zentro teknologikoa Donostian duen multinazionala

Donostiako lantegiak SPRI Taldearen BDIH Konexio programaren laguntza jaso du, eta urtean bi milioi txartel elektroniko diseinatu eta fabrikatzen ditu

Innobideak  Prestakuntza  prestatu  zure  lantaldea  balioan  lehiatzeko  eta  ez  prezioan
25/03/2025 Berrikuntza

Innobideak Prestakuntza prestatu zure lantaldea balioan lehiatzeko eta ez prezioan

Euskadiko ETEen % 60k berrikuntzaren alde egiten du, baina gehienek kostua murrizteko edo kalitatea hobetzeko egiten dute eta ez dute benetako abantaila lehiakorra sortzen merkatuan. Alabaina, berrikuntza ez da etorkizunean mantentzeko tresna soila, etorkizunean liderra izateko estrategia baizik. Horretarako, gakoa teknologia ez ezik, pertsonak, estrategia eta egokitzeko gaitasuna ere badira.

Joan blogera

Jarrai gaitzazu

Kanal espezializatuak eta eguneroko gaurkotasuna gure sareetan.