Euskal ETEek erabilgarri dute jadanik Hazinnova ekimena berria, berritzen has daitezen SPRI Taldearen eta Innobasque-n eskutik
2,5 milioi eurorekin hornitua, ekimen honek 2.000 enpresarenganaino iritsi nahi du eta 500 proiektu mobilizatu nahi ditu, lana antolatzeko modu berriei buruzkoak nahiz produktu eta zerbitzuak merkaturatzeko metodo berriei buruzkoak
40 agentez (tokiko garapen agentziak, klusterrak, merkataritza ganberak eta enpresa-elkarteak) osatutako sare batek hiru lurraldeetako enpresak mobilizatuko ditu eta laguntza emango die prozesu osoan
Helburua da Euskadiko eskualde guztietan kokatuta dauden eta berritzeko joerarik ez duten enpresa txikietara iristea, eta lehen esperientzia eskaintzea dohainik eta modu sinple eta azkar batean
2.400 euskal ETEk erabilgarri dute dagoeneko Hazinnova zerbitzu berria. SPRI Taldeak eta Innobasque-Berrikuntzako Euskal Agentziak joan den martxoan abiarazitako ekimen horrek 500 proiektu inguru jarriko ditu martxan enpresa parte-hartzaileen berrikuntza- eta lehiakortasun-indizeak hobetzeko. Ekonomi Garapen eta Azpiegitura sailburu Arantxa Tapiak gaur aurkeztu du Hazinnova eta, hemendik aurrera, zerbitzuaren zabalkundea egingo da Araba, Bizkaia eta Gipuzkoako eskualde guztietako enpresa txikien artean. Tapiarekin batera, ekitaldian izan dira baita ere Alex Arriola eta Leire Bilbao, SPRI Taldeko eta Innobasque-ko zuzendariak.
Hazinnova ekimenak 2,5 milioi euroko aurrekontua du eta duela gutxi argitaratutako Europako txosten batek berretsi du ekimen honen garrantzi estrategikoa. Regional Innovation Scoreboard 2019 txostenaren arabera, Euskadik bere berrikuntzako errendimendua hobetu du azken zortzi urteotan, baina hobekuntza hori ez da nahikoa izan Euskadik Berrikuntza-maila Handiko Eskualdeen multzoan jarrai dezan, Europako batez bestekoa gehiago hazi delako proportzioan. Ahulezia handiena erakutsi dutenak ETE txikienak izan dira.
Euskal ETEek doako aholkulari espezializatu bat eskatu ahal izango dute spri.eus webgunearen bidez, eta aholkulari horren laguntzaz aukera izango dute lana antolatzeko modu berriak eta produktu nahiz zerbitzuak merkaturatzeko metodo berriak ezartzeko.
Hauxe da Hazinnova zerbitzuak eskaintzen duena:
- Aholkularitza espezializatuko doako 50 ordu
- Hazinnova agente bat prozesu osoan zehar
- Karga administratibo oso txikia
- Emaitzak hiru hilabetean
Hazinnova zerbitzuak laguntza emango die euskal ETEei hauetarako:
- Enpresaren errentagarritasuna kontrolatzeko
- Prozesuen eraginkortasuna hobetzeko
- Entrega-gastuak edo -epeak murrizteko
- Antolakundeko langileak motibatzeko
- Merkatuko kuota handitzeko
- Bezero-segmentu berrietara iristeko
- Marka eta diseinu industrialak babesteko
Proiektu motak eta jarduera sektoreak
Enpresek gehienez bi mikro-proiektu abiaraz ditzakete urtebetean, arlo hauetako batean: ekonomia eta finantzen kudeaketa, produkzioa, logistika, barne-prozesuak, pertsonak, bezeroak eta merkatu berriak. Horrez gain, marka eta erregistroen arloko behar adina mikro-proiektu egin ahal izango dituzte.
Hazinnova ekimenak lehentasunezko jarduera-sektore batzuk finkatu ditu berrikuntza proiektuen onuradun izan daitezkeen ETEentzat. Industria sektorean lehentasunezko jarduerak izango dira manufaktura, erakusketa, energia-hornikuntza eta uren eta hondakinen kudeaketa; hirugarren sektorean, aldiz, lehentasunezkoak izango dira industriarekin zerikusia duten zerbitzuak, informazio teknologiekin lotutako jarduerak, handizkako merkataritza, garraioa eta biltegiratzea, finantza jarduerak eta aseguruak.
Eusko Jaurlaritzaren konpromisoa
Lehentasuna da Euskadiko enpresa berritzaileen kopurua handitzea eta berritzeko joerarik ez duten enpresek lehen esperientzia baliagarri eta praktikoa izan dezatela berrikuntzarekin. Eusko Jaurlaritzak, SPRI Taldearen bitartez, konpromisoa hartu du arlo horretako jarduerak finantzatzeko, berrikuntza ETE txikienetaraino iritsi dadin eurentzako laguntza espezifikoekin. Ildo beretik, Innobasque-k adierazi du handitu egin nahi duela ETEei ematen dien laguntza, berrikuntzaren bidean sartzen laguntzeko.
Testuinguru horretan, Arantxa Tapiak gaur goizean azaldu du zertan datzan SPRI Taldeak eta Innobasque-k bultzatutako HAZINNOVA ekimena. Prozesua joan den martxoan hasi zen, aholkulari talde bat kontratatzeko lizitazioarekin. Aholkulari horiek izango dira ETEei zerbitzu emango dietenak, proiektu berritzaile txikiak diseinatu eta ezar ditzaten hiru hilabeteko epean.
Horrekin batera, Innobasque-Berrikuntzako Euskal Agentziak 40 agentez osatutako sare bat sortu du Euskadiko eskualde guztietako enpresetara hurbiltzeko eta Hazinnova ekimenean parte hartzea erabakitzen duten guztiei proiektu osoan laguntzeko.
Enpresa parte-hartzaileek 50 aholkularitza-orduko zuzeneko zerbitzua erabili ahal izango dute eta konfiantzazko agente baten laguntza jasoko dute, zeinak, aholkularitzaz gain, tramite administratibo guztiak egingo baititu.
40 Hazinnova agente mobilizatuak
Gaur gaurkoz, 40 agente mobilizatu dira guztira Hazinnova martxan jartzeko. Horien artean daude Araba eta Bizkaiko merkataritza ganberak; Energia, Aeronautika, Elikadura, Mugikortasun eta Logistika, Galdaragintza, Eraikuntza, Ingurumen eta IKT eta Teknologia sektoreetako klusterrak; ASLE lan sozietateen elkartea; Metaleko Lantegien Bizkaiko Federakuntza; Durangaldeko enpresa-elkartea; Azaro fundazioa; eta Araba, Bizkaia eta Gipuzkoako hogei bat Eskualdeko Garapen Agentzia. Horrela bermatzen da ekimena iritsiko dela hiru lurralde historikoetako eskualde bakoitzeko enpresa guztietara.
Agente horiek Hazinnova ekimenaren aurkezpenean egon dira gaur, non esan baitute prest daudela ekimen honen bidez Euskadi berritzaileago bat lortzea helburu duen erronkan laguntzeko. Ekimen hori -bere baitan biltzen dituena sektore eta erakunde desberdinetako agenteak- aktiboki zabalduko da EAEko txoko guztietako enpresa txikietara iristeko.
Aurreikuspenen arabera, Hazinnova agenteen sarea gai da 2.500dik gora enpresatara iristeko eta enpresa horietatik 500ek proiektuak garatuko dituzte ekimen berritzaile honen laguntzarekin. Hazinnova bereziki zuzentzen zaie 6-99 langile bitartean dituzten enpresei eta aurretik berrikuntza-jarduerarik egin ez dutenei.
Behin trebatuak izan ondoren SPRIk eta Innobasque-k ematen dituzten eta dagoeneko abian diren jardunaldietan, Hazinnova agenteak berehala hasiko dira ETE interesatuak atzematen eta laguntza emango diete behar duten proiektua edo konponbide berritzailea definitu eta ezartzeko, gutxi gorabehera hiru hilabeteko iraupena izango duen prozesu batean.
Eskualdeka aurkezteko egitaraua
Ahalegin gehigarri bat eginaz ekimen hau ongi irits dadin enpresa txikiak dauzkaten Euskadiko eskualde guztietara –enpresa horiek batzuetan ikusezinak baitira berrikuntzaren arloan-, aurkezpenak egiteko egitarau bat antolatu da irailaren erdialdetik azaroaren bukaerara. Hazinnovaren arduradunak (Jaurlaritzakoak, SPRIkoak eta Innobasque-koak) Araba, Bizkaia eta Gipuzkoako eskualde guztietara joango dira eta, tokiko agenteekin batera, zerbitzuaren ezaugarriak eta irismena aurkezteko dizkiete zonalde bakoitzeko ETEei.
Dagoeneko 10 data daude finkatuta Hazinnova aurkezpenaren eskualdekako egutegian.
Hazinnova programa:
Lotutako albisteak
Eusko Jaurlaritzak 13,65 milioi euro bideratuko ditu enpresen berrikuntzara
SPRI Taldeak maiatzean zabalduko ditu Fast Track Innobideak, Hazinnova eta BDIH Konexio programak
Mikel Jauregi Industriako sailburuak Aernnova enpresa bisitatu du, soluzio aeronautiko aurreratuetan liderra
Aernnova enpresak Araban du egoitza, eta lider espezializatua da aeroegituren eta horien osagaien diseinuan, fabrikazioan, mantentze-lanetan eta zerbitzuetan. Ia 6.000 langile ditu 7 herrialdetan, eta 2025ean 1.000 milioitik gorako fakturazioa izatea espero du.
ETEentzako produktuen eta prozesuen berrikuntza babesten dugu Hazinnovarekin
Hazinnova euskal ETE-ei doako aholkularitza eskaintzen dien programa da, produktu eta prozesuetan berrikuntza-mikroproiektuak bultza ditzaten. Eska ezazu 2025eko maitzaren 6tik urriaren 29ra.
ESGI 188 (European Study Group with Industry) Bilbon izango da 2025eko maiatzaren 26tik 30era
Enpresek problema matematikoak aurkezten dituzte azterketa-taldeak konpon ditzan, askotan modelizazio edo optimizazio moduan.
Kontsulta irekia: Spri Taldearen laneko prebentzio-zerbitzuak definitzeko zure aukera
Sprik merkatuko aurretiazko kontsulta jarri du abian, lan-arriskuen prebentzioaren eta osasunaren zaintzaren sektorearen benetako beharretara egokitutako lizitazioa diseinatzeko. Horren bidez, operadore ekonomikoen ekarpenak bildu nahi dira, kontratazio-prozesu lehiakor, garden eta merkatuko jardunbide egokienekin lerrokatua egituratzeko.
Sustatu berrikuntza-proiektuak zure enpresan Fast Track Innobideak ekimenarekin
Fast Track Innobideak Euskadiko enpresa berritzaileen kopurua handitzeko eta sustatzeko sortu zen. Merkatuan ondasun edo zerbitzu berriak sartu dituzten edo enpresan negozio-prozesuak hobetzen dituzten berrikuntza-jarduerak babesten ditu, enpresa lehiakorrago bihurtzeko.
NudgeXperience Bilbon: CX eta Portaera Zientzien ekitaldia
Zuzendariei eta gerenteei, Cx-eko arduradunei eta berrikuntza eta marketineko profesionalei zuzendua
Innobideak Prestakuntza prestatu zure lantaldea balioan lehiatzeko eta ez prezioan
Euskadiko ETEen % 60k berrikuntzaren alde egiten du, baina gehienek kostua murrizteko edo kalitatea hobetzeko egiten dute eta ez dute benetako abantaila lehiakorra sortzen merkatuan. Alabaina, berrikuntza ez da etorkizunean mantentzeko tresna soila, etorkizunean liderra izateko estrategia baizik. Horretarako, gakoa teknologia ez ezik, pertsonak, estrategia eta egokitzeko gaitasuna ere badira.
Imanol Rego, Innobasque Berrikuntzaren Euskal Agentziako presidente berria
Manuel Salaverriaren lekukoa hartu du. Salaverriak euskal ekosistema publiko pribatuaren balioa sustatzen jakin du, Euskadi garatzeko bide estrategiko gisa
UNIREn bigarren edizioak 80 enpresa baino gehiago bildu ditu FICOBAn
Soldaduran eta beste lotura-teknologietan espezializatutako Estatuko azoka bakarra da