Nazioartekotzeko Euskal Agentziak, Cofides erakundeak eta Finantzen Euskal Institutuak 100 milioiko finantza-tresna bat sortu dute euskal enpresei finantzaketa emateko ekonomia gorakorretan
Lankidetza-hitzarmen bat sinatu dute, zeinaren bidez konpromisoa hartu duten sektore berritzaileetako inbertsio operazioak –adibidez finantzaketa klimatikoa- elkarrekin identifikatzeko eta operazio horien ko-finantzaketa bideratzeko
SPRI Taldean integratutako Nazioartekotzeko Euskal Agentziak (Basque Trade & Investment), Cofides-ek eta Finantzen Euskal Institutuak 100 milioi euroko zuzkidura duen finantza-tresna berri bat sortuko dute, euskal enpresek atzerrian egiten dituzten produkzio eta merkataritza arloetako inbertsio-ekimenei laguntzeko. Eusko Jaurlaritzako erakundeek 50 milioi euro jarriko dituzte eta Cofides-ek beste 50.
Cofides-eko presidente eta kontseilari delegatu José Luis Curbelok, Nazioartekotzeko Euskal Agentziako presidente Javier Zarraonandiak eta Finantzen Euskal Institutuko zuzendari nagusi Josu Iñaki Garaik asmo-akordio bat sinatu dute asteazken honetan Bilbon. Asmo-akordio horren arabera, hiru erakundeek konpromisoa hartzen dute euskal enpresen nazioartekotzea bultzatzeko, batik bat herrialde eta ekonomia gorakorretan eta sektore berritzaileetan (hala nola, klima aldaketaren aurkako borrokaren sektorean).
Hiru erakundeak lankidetzan ariko dira euretako bakoitzak euskal enpresei eskaintzen dizkien zerbitzuen zabalkundea egiteko eta elkarrekin finantzatuko dituzte sektore pribatuak sustatutako atzerriko inbertsio proiektuak.
Inpaktu soziala eta ingurumen arlokoa
Garapen jasangarriko euskal estrategiarekin eta 2030 Agendara bildutako Garapen Jasangarriko Helburuekin (GSH) bat etorriz, Eusko Jaurlaritzaren eta Cofides-en arteko lankidetza honen bidez finantzaketa emango zaie atzerriko herrialdeetan inpaktu soziala eta ingurumen arlokoa eragiten duten proiektuei.
Era berean, euskal enpresek aukera izango dute finantza-tresna berritzaileak ezagutzeko, hala nola, Klimarako Funts Berdea (Cofides Espainiako lehen finantza-erakunde akreditatua baita Nazio Batuetako tresna horren aurrean) edo Europar Batasuneko Atzerriko Inbertsioen Plana (AIP). AIP, geografikoki Afrikan zentratzen dena, tresna lagungarria izan liteke berme jaulkipenaren bidez euskal sektore pribatuak presentzia handiagoa izan dezan garapen bidean dauden herrialdeetako inbertsio-proiektuetan eta presentzia txikia duen zonaldeetan.
Zentzu horretan, Cofides-eko presidente José Luis Curbelok adierazi du bere erakundearentzat “garrantzitsua dela aliantza estrategikoak lortzea finantza-tresna berriak hobeto aprobetxatzeko eta, bide horretatik, Euskadiko enpresen atzerriko inbertsioak bultzatu eta errazteko”. “Cofides-en uste dugu aukera-espazio berri bat irekiko dela hainbat sektoretako enpresentzat: energia berriztagarriak, garraio eta mugikortasun jasangarriak, energia eraginkortasuna, segurtasun hidrikoa eta elikadura segurtasuna, azpiegitura erresilienteak, ingurune urbanoak, nekazaritza jasangarria eta baso eta ekosistemen kontserbazioa, besteak beste” azaldu du. Bere iritziz, “Euskadin badaude sektore horietan oso lehiakorrak eta puntakoak diren enpresak, benetako lider globalak jasangarritasunaren eta ekonomia zirkularraren arloan”.
Nazioartekotzeko Euskal Agentzia Eusko Jaurlaritzako Ekonomi Garapen eta Azpiegitura Sailari atxikitako SPRI Taldearen barruko (Enpresen Garapenerako Euskal Agentzia) sozietate publiko bat da, zeinaren helburua baita euskal ekonomiaren eta enpresen nazioartekotzea sustatzea, sostengua eskainiz enpresei beren nazioarteko proiekziorako eta laguntza emanez eragileei Euskal Autonomia Erkidegotik kanpoko inbertsioak erakartzeko.
Finantzen Euskal Institutua Eusko Jaurlaritzako Ekonomia eta Ogasun Sailari atxikitako erakunde bat da eta bere helburua da Euskal Autonomia Erkidegoko Administrazioaren finantza-politikarako eta kreditu publikorako tresna izatea.
Cofides sozietate publiko-pribatu bat da, 1988az geroztik finantza-laguntza ematen diena Espainiako enpresei atzerrian inbertitzeko. Akreditatuta dagoenez EBren aurrean Europar Batasuneko aurrekontua kudeatzeko, ahalmena dauka garapenean eragin handia duten operazioak egituratzeko. Era berean, akreditatuta dago Nazio Batuetako Klimarako Funts Berdearen aurrean eta ahalmena du operazioak egituratzeko funts horretan klima aldaketa arintzeko eta klima aldaketara egokitzeko. Esklusiban kudeatzen ditu Industria, Merkataritza eta Turismo Ministerioari atxikitako Merkataritzako Estatu Idazkaritzaren Fiex eta Fonpyme funtsak eta laguntza ematen dio Garapenerako Espainiako Nazioarteko Lankidetzaren Agentziari (AECID) Fonprode funtsa kudeatzeko. Cofides-eko akziodun dira Santander Bankua, Bilbao Vizcaya Argentaria (BBVA) Bankua, Sabadell Bankua eta CAF-Latinoamerikako Garapenerako Bankua.
José Luis Curbelo Orkestra-Lehiakortasunaren Euskal Institutuko zuzendari nagusia izan zen.
Lotutako albisteak
Hidrogenoaren euskal ekosistemak loturak estutu ditu Japoniarekin sektorearen nazioarteko foro nagusian
Ekintza hau, hidrogenoa ardatz energetiko estrategikotzat garatzeko 2023az geroztik Euskadi eta Japoniaren arteko lankidetza bultzatzea xede duen ekimen zabalago baten barruan gauzatu da.
Euskal enpresek Bogotako hiri-eraldaketari lotutako aukerak esploratu dituzte
Jardunaldian azpiegituretan espezializatutako hamar euskal enpresak parte hartu zuten, Kolonbiako hiriburuari soluzio teknologikoak eskaintzeko asmoz.
Horizon Europe 2025: 7.300 milioi euro enpresa berrikuntza bultzatzeko Europan
SPRI-ren eskutik, EEN sarearen euskal nodoaren koordinatzaileak garen aldetik, euskal enpresei Horizon Europe programan parte hartzen laguntzen diegu. Enterprise Europe Network (EEN) Europako sare bat da, ETEen hazkundea eta nazioartekotzea bultzatzen duena
Global Training bekak kudeatuko dituzten erakunde laguntzaileen bila ari gara
Erakunde bakoitzak 50 eta 80 beka arteko eskaintza aurkeztu ahal izango du graduko unibertsitate-titulua edo goi mailako lanbide-heziketako titulazioa duten gazteentzat
Eusko Jaurlaritzak Euskadiren eta Japoniaren arteko ekonomia- eta enpresa-harremanak estutzen jarraitzen du
Mikel Jauregi sailburua Japoniako Finantza ministrordearekin bildu da, eta erakundeen, ekonomiaren eta enpresen arloko zenbait topaketatan parte hartu du, Euskadiren eta Japoniaren arteko harremanak sendotze aldera.
BEINT bekek ehun hautagai baino gehiago bildu dituzte azterketa-egunean
Guztira 134 pertsonak (73 emakumek eta 61 gizonek) parte hartu zuten hautaketa-prozesuaren fase honetan
Txosten estrategikoak, euskal enpresa-sareari automobilgintzako berrikuntza globala hurbiltzeko
Basque Trade & Investmentek sektorearen nazioarteko azoka nagusietako bostetan aurkeztu diren produktu eta teknologiei buruzko informazio zehatza jarri du euskal enpresen eskura
Euskadiko enpresek nazioartekotzeari buruzko aholkularitza jaso ahal izango dute 23 herrialdetan
Basque Trade & Investment erakunde publikoko profesionalek bilera pertsonalizatuak egingo dituzte maiatzaren 26an, 27an eta 28an.
Eusko Jaurlaritzak eta Hithium enpresak akordio estrategikoa sinatu dute, Europako biltegiratze egonkorraren industria gidatzeko
Hitzarmenari esker, Euskadin biltegiratze egonkorreko sistemak fabrikatzea ahalbidetuko duen soluzio integral baten garapenean lan egingo da, erreferentziazko bazkide industrial batekin elkarlanean eta Euskal Autonomia Erkidegoko zentro teknologikoen babesarekin
Euskadi eta Italiako klusterren haien arteko lankidetza indartu dute
Italiako Emilia Romagna eskualdeko klusterrek euskal lurraldea bisitatu dute aste honetan, sektore estrategikoetan balizko lankidetzak esploratu eta ezartzeko asmoz