Nola eraldatuko dute hiri-mugikortasuna PMUSek?
• Ikastaroak leku bat eskainiko du sektore honen profesionalek, kudeatzaileek, enpresek eta adituek, mugikortasun arduratsuago baterako ezagutza, esperientziak, beharrak eta irtenbideak partekatzeko aukera izan dezaten.
“Mugikortasunean lan egiten duten profesional guztiek, kudeatzaileek, enpresek eta adituek, aurki dezatela leku bat, ordu batzuetan, gure udalerrietan mugikortasun arduratsuagoa izateko ezagutza, esperientziak, beharrak eta irtenbideak partekatzeko”. Helburu horrekin, Euskadiko Mugikortasun eta Logistika Klusterrak, Mubil-ekin lankidetzan, udako ikastaro berri bat antolatu du Euskal Herriko Unibertsitateko Udako Ikastaroen Fundazioarentzat, “PMUS. Hiri Mugikortasun Iraunkorreko Planak “. Topaketa ekainaren 27an izango da, Donostiako Miramar Jauregian, ikastaroen egoitzan, edota online. Bilboko, Donostiako, Gasteizko eta Beasaingo udaletako zinegotziek, Bartzelonako eta Madrilgo udaletako ordezkariek eta CEA eta GEA 21eko adituek hartuko dute parte.
Ikastaroaren datuak
• Izenburua. PMUS. Hiri Mugikortasun Iraunkorreko Planak
• Eguna. 2025eko ekainaren 27a
• Ordutegia. 9: 00etatik 14:00etara
• Lekua. Miramar jauregia (Donostia) eta online
Ikastaroaren edukia
Hiri Mugikortasun Iraunkorreko Planak hiri-espazioan desplazamendu-modu jasangarriagoak ezartzea helburu duten jarduera-multzoa dira, energia-kontsumoa eta emisio kutsatzaileak murriztuz. Mugikortasun eraginkorra bultzatu nahi dute, garapen ekonomikoa, ingurumenaren babesa eta bide-segurtasuna kontuan hartuz herritarren bizi-kalitatea hobetzeko asmoarekin.
Hiri Mugikortasun Iraunkorreko Planak (PMUS) batez ere toki-eremuan aplikatzen dira, baina zenbait udalerri ere har ditzakete, mugikortasun-beharrak elkarrekin lotuta daudenean, metropoli-area handietan gertatzen den bezala. Legedi desberdinek arautzen dituzte, hala ere, Mugikortasun Jasangarria derrigortasunetik haratago doan konpromezua da, eta, beraz, ikastaroa hura ezartzeko neurri berriak ezagutu nahi dituzten kudeatzaile eta profesional guztientzat gida izango da.
Hizlariak
Jardunaldi honetan, hiru euskal hiriburuetako esperientziak azalduko dituzte Olatz Yarza (Donostiako Udala), Nora Abete (Bilboko Udala) eta Beatriz Artolazabalek (Gasteizko Udala). Adur Ugartemendía zinegotziak (Beasain) metropoli, hiri eta landa eremukoa den lurralde baten kasua aurkeztuko du. Horiekin batera, María Dolores Ortizek (Madrilgo Udaleko Mugikortasun Plangintza eta Azpiegituren zuzendari nagusia) eta Carlos Lópezek (Bartzelonako Udaleko Mugikortasunaren Estrategia saileko burua) PMUSak aurkeztuko dituzte. Juan Carlos Escudero (Gasteizko Ingurugiro Gaietarako Ikastegiko mugikortasun unitateko burua) eta Marius Navazo (GEA 21eko aholkularia) adituek itxiko dute ikastaroa.
Udako Ikastaro honek PMUSen egungo egoerari buruzko ikuspegi osoa eta eguneratua eskainiko du, hiriko mugikortasuna eta hirietako bizi-kalitatea hobetzen nola laguntzen ari diren azalduz. Aplikazio-kasu zehatzak aurkeztuko ditu, baita horiei ekiteko helburuak eta jarduketak ere. Teknologian, zerbitzuetan, irtenbideetan eta finantzaketa-moduetan berritzaileak diren konponbideak ere azalduko ditu. Eskaintza eta eskaria hurbilduko dituzte, udalek, enpresek, teknologoek eta profesionalek azken belaunaldiko proposamen berritzaileen bidez hiri-mugikortasun iraunkorraren beharrak ezagutu, txertatu edo erantzun ahal izan ditzaten.
