Tantä: “Moda urbanoaren merkatuan sartu gara”
Arropa-ildo berria Innobideak–Lehiabide programaren laguntzarekin bultzatu da
Gipuzkoako Tantä marka berria kontsumitzaile urbanoarentzako arropa-ildo bat da, eta zira katalogo bat izan da aurten merkaturatu duten lehen produktua. Proiektua horrelako arropa-piezetan esperientzia zabala duen arropa-enpresa batean sortu da, zeinak bere ezagutza aprobetxatu nahi izan baitu modaren munduko merkatu berrietara sartzeko.
Tantä enpresak SPRI Taldearen Innobideak–Lehiabide laguntza jaso du marka garatzeko; programa horren helburua da enpresei laguntzea produktuetan, prozesuetan, merkatuetan eta antolakuntzan berritu dezaten. Zehazki, Lehiabide ildoari esker, enpresa horrek merkatu-azterketa bat egin zuen jakiteko Estatuko eta nazioarteko zein lurraldetan zabalduko zuten errazen beren produktua.
Azterketa horri esker, martxoan merkaturatu zen Tantä zira-ildoa, zeina hasieratik bideratu baita nazioarteko merkatura, nahiz eta arreta berezia eskainiko dieten Europa iparraldeko herrialdeei. Ikusirik lehen produktu honek harrera ona izan duela, Tantä buru-belarri ari da merkataritza-plan bat egiten, bere produktua merkatu eta banaketa-kanal gehiagotara zabaltzeko. Produktu-sorta zabaldu eta osagarri-ildo berriak sartu nahi ditu etorkizun hurbilean.
Innobideak programak laguntza ematen du euskal enpresen lehiakortasuna hobetuko duten ekintzak garatzeko. Hiru laguntza-ildo dauzka: Lehiabide ildoak, berrikuntza proiektuei zuzendua dagoenak, enpresen tamaina handitzeko eta enpresen eta hornitzaileen arteko lankidetza garatzeko ekintzak babesten ditu; Pertsonak ildoaren helburua da enpresako langileek konpainian parte har dezatela; eta Kudeabide ildoak enpresaren kudeaketa hobetzea du xede. Innobideak programaren 2018ko deialdian parte hartzeko epea zabalik egongo da irailaren 27ra arte.
