Plain Concepts enpresak datuetan eta adimen artifizialean oinarritutako eraldaketa digitala bultzatzen du
Konpainiak datu-atzematearekin eta informazioa bistaratzearekin lotutako hainbat zerbitzu eskaintzen ditu
Plain Concepts aholkularitza bat da, beste enpresa batzuei laguntzen diena beren eraldaketa digitaleko prozesuetan, arreta berezia eskainiz datuen analitikako elementu eta teknologiei: lainoko biltegiratzea, konektagarritasuna, adimen artifizialaren erabilera informazioa aztertzeko eta datuak bistaratzeko tresnak. Bulegoak ditu Bilbon, Madrilen, Bartzelonan, Sevillan, Leonen, Seattlen, Londresen, Frankfurten, Amsterdamen nahiz Dubain, eta 25 langile inguru ditu Bilboko egoitzan. Ibon Landarekin hitz egin dugu, Plain Concepts enpresako kudeatzaile nagusi eta 4.0 Industriako zuzendariarekin.
Zer egiten duzue Plain Concepts enpresan?
Zerbitzu-konpainia bat gara, eta ia denetarik egiten dugu era guztietako enpresentzat. Gurekin lan egiten duten antolakundeek badauzkate eraldaketa digitaleko lantaldeak, baina askotan ez daude gu bezain aurreratuak arlo teknologikoan. Plain Concepts enpresan saiatzen gara beste batzuk ikasi ezin izan duten hori ikasten. Saiatzen gara abangoardian egoten, beste enpresa batzuei aurrera egiten laguntzeko. Espezializazio-arlo desberdinak dauzkagu. Horietako bat da 4.0 Industriarena, non Smart Concepts izeneko ekimen bat baitugu martxan sektore zehatz horretarako konponbide espezializatuak eskaintzeko.
Nolako konponbideak eskaintzen dituzue 4.0 Industriaren arloan?
Lehenengo pausoa da enpresei laguntzea ulertzen zer den eraldaketa digitala eta zer den 4.0 industria. Azaltzen diegu zer egin dezaketen enpresan dauzkaten datuekin eta nola aprobetxa ditzaketen. Konponbideak eskaintzen dizkiegu makinen datuak bildu, bistaratu eta tratatzeko, baditugu baita ere Big Data arloko konponbideak, adimen artifizialekoak…
Enpresek datuak dauzkate, baina gerta liteke datu horiek ez izatea behar adinako kalitaterik edo ez jakitea zer egin datu horiekin. Horregatik, hasierako aholkularitza-saioan kontzeptuak finkatzen ditugu. Guretzat garrantzitsua da bezeroek esatea nolako datuak darabiltzaten eta zein arazori aurre egin behar dieten, aholku ematea maila teknologikoan eta eurek ikus ditzatela teknologia horren aukerak.
Zer ari zarete garatzen 4.0 Industriaren arloan? Kasu zehatzen bat konta dezakezu?
Acciona Energía-rekin dihardugu lanean, energia berriztagarrien sektoreko konpainia batekin. 90.000 balore desberdin biltzen dituzte milisegundo bakoitzeko eguzki-energia biltegiratzeko lantegi bakar batean. Eguzki-jarraitzaile bakoitzak informazioa atzematen du argiaren intentsitateari, haizeari, bibrazioei edo orientazioari buruz eta aldagai horiek eragina dute produkzioan. Plain Concepts enpresak laguntza ematen die informazio hori guztia biltzeko, garbitzeko, lantegian eta lainoan biltegiratzeko, denbora errealean tratatzeko, analisi deskriptiboak egiteko, adimen artifiziala inplementatzeko eta bistaratze-tresnak garatzeko arlo desberdinentzat: arlo industrialerako aplikazioak eta aplikazio pertsonalizatuak negozio-arduradunentzat edo aginte-zentroarentzat. Lan horri esker jakin dezakegu nolako eragina duten haizeak edo bibrazioek energiaren produkzioan, eta mantenimendu-lanak ere egin ditzakegu jakiteko eguzki-atzemaile bat benetan ari den sortzen sortu behar lukeen energia guztia.
Hona hemen beste adibide bat: adimen artifiziala erabiltzen dugu erreklamazioen helbide elektronikora iristen diren mezuak sailkatzeko. Testu- eta sentimendu-analisirako tresnak aplikatzen ditugu mezuak sailkatzeko, langile batek ez ditzan e-posta guztiak gainbegiratu. Mezu bat garrantzizkoa dela detektatzen bada, langile bati bidaltzen zaio arreta handiagoz irakur dezan.
Badauzkagu adimen artifizialean oinarritutako beste proiektu batzuk ere, energiaren optimizazioan erabiltzen direnak. Kasu honetan aire girogailuen erabilpena optimizatzen ari gara, aireko tenperaturari buruzko informazioa bilduz aireportu bateko bidaiarien terminal bateko gune batean. Informazio horri bestelako datuak gehitzen dizkiogu: terminal horretan izango den hegaldi kopurua, eremu horretatik pasako den bidaiari kopurua edo eguraldiaren iragarpenak. Hala, aire girogailuen erabilpena hobetzen dugu energia kontsumoa murrizteko.
Datuen analitikaz eta adimen artifizialaz gain, errealitate birtualean eta errealitate handituan oinarritutako konponbideak garatzen dituzue. Zein esparrutan?
Bistaratze-motor propio bat garatu dugu: Wave Engine. Horri esker 3D, errealitate birtual eta errealitate handituko konponbideak garatzen ditugu, teknologia berbera erabiliz eta plataforma anitzetan. Dagoeneko hainbat proiektutan aplikatu dugu, esaterako, errealitate handitua erabiltzen duen aplikazio mugikor bat garatu dugu BBVArentzat salgai dauden etxebizitzak bilatzeko.
Halaber, medikuak gidatzeko laguntzaile bat garatzen ari gara Osakidetzarekin batera, laguntzaile horren bidez ezagutu dezaten ospitaleak pazienteari buruz duen informazio guztia eta lagungarri izan dakien biopsian zehar.
Gure teknologia berdin erabil daiteke eremu logistikoetan “picking” sistemak optimizatzeko edo makinen urruneko mantenimendu-lanak egiteko. Azken kasu horretan, errealitate handituko betaurrekoak dituen langile batek mantenimenduko teknikari baten argibideak jaso ditzake munduko edozein tokitatik, dela checklist bat egiteko, dela makina batekin aritzen laguntzeko makina hori gaizki dabilenean edo langileak ez dakienean nola erabili.
Zure ustez zeintzuk izango dira 4.0 Industriaren arloko teknologia garrantzitsuenak etorkizun hurbilean?
Adimen artifiziala eta blockchain izango dira bi teknologia disruptiboenak eta negozioari gehien lagundu diezaioketenak. Blockchain teknologia trazagarritasunari aplikatuko zaio, horrela bermatzeko bezeroari iristen zaion informazioa ez dagoela manipulatuta. Halere, lege arloko hainbat hesi gainditu beharko ditu. Adimen artifiziala, bestalde, ikaskuntza automatikotik (machine learning) haragoko ikuspuntu batetik ulertu behar dugu. Irudiak ezagutzeko adimen artifizialeko sistemak hainbat esparrutan aplikatu daitezke, hala nola, laneko arriskuen prebentzioan, presentzia kontrolatzeko, ziurtatzeko langileek segurtasun material egokia darabiltela, jakiteko zenbat pertsona dauden lantegian eta, ebakuatu behar badira, ziurtatzeko denak irten direla. Adimen artifizialak eta blockchain-ak sekulako potentziala dute.
Lotutako albisteak
Lantekek, software industrialean munduko liderrak, 36.000 bezero baino gehiago ditu dagoeneko
Arabako Parkean kokatuta dagoen enpresak 400 langile baino gehiago ditu, eta SPRI Taldearen zibersegurtasuneko programako laguntza bat jaso du
Lowerton, adimen artifizialarekin enpresak berritzea eskaintzen duen startupa
Bere teknologiak aukera ematen du lau hilabeteko lana eskatzen duten hobekuntzak bi egunetan bakarrik ezartzeko
Duplostock industria-irtenbide pertsonalizatuen diseinatzaile eta fabrikatzaile bihurtu da
Zuzendaritzan izandako aldaketaren ondoren, euskal enpresak eraldaketa digitalaren, efizientzia energetikoaren eta bere prozesuen automatizazioaren aldeko apustua egin du.
Novaut, blog batetik jaio zen marketplace industrialaren finkapena
Merkatuan bost urte daramatza, eta Arabako enpresak lortu du bere lekua egitea ordezko pieza kritikoen sektoreko erraldoien artean
GM2k digitalizazioaren eta nazioartekotzearen aldeko apustua egin du, motorraren sektorearen hazkundea bultzatzeko
Motorzaleentzako ekipamenduaren banaketan espezializatutako enpresa arabarrak adimen artifizialean oinarritutako laguntzaile birtual bat garatu du, ereduaren araberako ordezko piezen bilaketa errazteko, eta Mediterraneo inguruko herrialdeetan hedatzen hasi da.
Veiss-ek 20 urte baino gehiago dihardu tokiko enpresa eta erakundeen eraldaketa digitalean laguntzen
Arabako enpresak webgune korporatiboak, mugikorretarako aplikazioak edo online dendak garatzen ditu sektore mota guztietarako.
Lancor, altxatzeko motor elektrikoen fabrikazioan Europako liderra
Abanto-Zierbenako enpresak SPRI Taldearen Gaitasun Digital Profesionalen programako laguntza jaso du eta esportaziorako produktu propioak garatzearen aldeko apustua egiten du.
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
Mercanza: “Bezeroa bere datuen ustiapenean espezializatua bihurtzen dugu”
Enpresak eraldaketa digital tradizionala gaindituz soluzioak eta zerbitzuak eskaintzen ditu, enpresen eraginkortasuna eta produktibitatea bultzatzeko.
Zabalgarbik denbora errealeko analisi-tresnekin modernizatu du bere azpiegitura
Besteak beste, biki digitala eta adimen artifizialean oinarritutako teknologiak ezartzeaz gain, lurrun-gainberogailu bat instalatzea du helburu enpresak, energia-eraginkortasuna eta jasangarritasun operatiboa hobetzeko ekimen estrategiko bat.