Nexmachinak prozesu industrialak monitorizatzen ditu gauzen Internet (IoT) eta kudeaketa-software propioa erabiliz
iQmenic plataforma garatu du Bizkaiko enpresa horrek IoT sentsoreek bidaltzen dituzten datuak kudeatzeko
Honela defini genezake gauzen Internet edo IoT: datuak atzitzeko gai den eta informazio digital hori haririk gabe bidaltzeko gai den objektu bihurtzea objektu analogiko bat. Geroz eta gehiago erabiltzen da gauzen Internet zenbait alorretan: hiri adimendunak (zakarrontzietako sentsoreak, aparkatzeko lekuak detektatzeko sistemak, kaleak jasangarriki argiztatzeko gailuak eta eraikinen edukiera kontrolatzekoak…), etxea (hozkailu, kafe-makina eta, are, hortzetako eskuila adimendunak, besteak beste) eta industria. Business Insider Intelligenceren azken azterketaren arabera, 2023rako gauzen Internet darabiltzen 40.000 milioi gailu egongo dira mundu osoan.
Nexmachina euskal konpainiak sei urte bete ditu azaroan. IoT soluzioak eta konektagarritasuna ditu espezialitate Nexmachinak, eta aldaketa- eta hazkunde-urtea izango du 2019a: langile-kopurua bikoiztea espero du (bost ditu gaur egun), eta fakturazioa handitzea. Egoitza, oraintsu arte, DeustoKabin izan dute, Deustuko Unibertsitatearen enpresa-inkubagailuan, eta, Bilboko bulego berri batzuetara joanda, martxan jarri dute aldaketa horietan lehena.. Fernando Presa da Nexmachinako zuzendari nagusia.
Zer egiten duzue Nexmachinan?
Bi negozio-lerro ditugu: batetik, iQmenic plataforma garatu dugu, industrian eta hiri adimendunetan erabiltzen diren sentsoreen sareak kudeatzeko, kontsumitzaileei laguntzeko… Baliozkotze-proba pilotuak egin ditugu zenbait bezeroren artean, eta sentsoreak jarri zakarrontzietan, upategietako andeletan, makinetan, aparkalekuetako zoruetan…, eta “bizia eman” diegu zenbait objekturi. Gure iQmenic plataformak kudeatzen du informazio hori guztia: datuak atzitzen ditu, denbora errealean monitorizatzen, alerten berri ematen eta txosten zehatzak egiten. Gainera, gaztelaniaz, ingelesez, frantsesez, alemanez eta txineraz erabil daiteke plataforma.
Bigarren negozio-lerroa, berriz, haririk gabeko teknologia eta komunikazioen alorrekoa da. Oso ondo ezagutzen dugu mundu hori, Nexmachina martxan jarri baino 12 urte lehenagotik. WiFi sareen proiektuak egiten ditugu, bai eta azken bost urteotan sortutako zenbait teknologienak ere (Sigfox, Lora eta abar). Aurtengo uztailean, berriz, bost urteko kontratua izenpetu dugu Hispasatekin, nazioartean WiFi sareetarako eta gauzen Interneterako haririk gabeko teknologiak garatzeko. Kolonbian jarriko dugu martxan lehen proiektua. Gure mikroETE honentzat bikaina da lehen akordio hori, aukera emango baitigu diru-sarrerak handitzeko eta hurrengo bi urteotan langile-kopurua ia bikoizteko.
Zer proiektu ari zarete garatzen 4.0 industriaren arloan?
Pintuberri Industrial izan dugu 4.0 industriaren eremuko lehen bezeroa. Bizkaiko Berriz herrian dago ETE hori, eta piezak pintatzen ditu zenbait sektoretarako; besteak beste, automobilgintzarako eta eraikuntzarako. Pintatze-prozesuan, piezak garbitu, uretan pasatu, margotu eta labean lehortzen dira, kotxeak garbitzeko tunel moduko batetik igarota. Zenbait aldagai kontrolatu behar izaten dira prozesu horretan: pH-a, tenperatura, presioa, hezetasuna, labealdia eta fosfatazioa. Orain arte, langile batek jasotzen zituen, eskuz, fabrikazio-agindu horiek. Guk digitalizatu egin dizkiegu prozesu horiek, ezaugarri batzuk neurtzeko sentsoreak jarrita (pH-a, tenperatura, presioa eta koipegabetzea), eta gure IQmenic plataformara bidaltzen dugu informazio hori guztia, denbora errealean. Laneko aginduak eta bideoak lotzen dira, eta ahal lortzen da laneko agindu jakin baten trazabilitatea.
Zer beste proiektu duzue gauzen Interneten alorrean?
Txakolin-, sagardo- eta Arabako Errioxako ardo-upategietako andelak digitalizatzen ari gara, bai eta Eusko Label etiketadun olioarenak ere. Eusko Labelen produktuak kontrolatzen eta egiaztatzen dituen Hazi organoak upategi bakoitzeko zenbait andel erabiltzen ditu bere produktuetarako, eta bermatu nahi du bai andelek bai haien edukiak betetzen dituztela ezarritako baldintza bereziak. Andelen edukiak inongo aldaketarik edo manipulaziorik ez duela jasan ziurtatzeko, zenbait sentsore jarri ditugu, irekierak, ontzi-aldaketak eta tenperatura-gorabeherak detektatzeko. Denbora errealean bidaltzen da informazio hori, eta iQmenicek kudeatzen du. Oraingoz, Arabako Errioxako bi upategitan eta olio-upategi batean ari gara garatzen proiektua; urte-amaiera aldera, berriz, beste bi upategitara hedatuko dugu.
iQmenic softwarea garatu duzue datuak kudeatzeko. Pentsatu al duzue hardware edo sentsore propiorik sortzea gauzen Interneterako?
Oraingoz ez dugu geure sentsore propiorik egiteko asmorik, eta jada merkatuan dauden soluzioak erabiltzen ditugu. Irekia da iQmenic plataforma, eta aukera ematen du edozein sentsore-mota konektatzeko eta txertatzeko. Nolanahi dela ere, ari gara pentsatzen Eusko Labelen andeletarako geure sentsore propioak egitea.
Nola erantzuten dute enpresek gauzen Interneten alorreko zuen zerbitzuen berri ematen diezuenean?
Hemen, Euskadin, lortu du Eusko Jaurlaritzak mezua hedatzea, Basque Industry 4.0 estrategiaren bidez. Trebakuntza-saio ugari egin dira, eta ekitaldi asko programatu; egokia izan da estrategia, gure ustez, behin eta berriro azaldu beharreko kontuak baitira. Enpresetara joaten garenean, ezagunak egiten zaizkie jada gauzen Internet edo IoT eta 4.0 industriaren kontzeptuak, lehendik jasoa baitute informazioa, eta ez dira aho zabalik geratzen. Nolabaiteko ezagutza-maila berenganatzen hasi dira enpresak, eta badakite digitalizazioranzko urrats hori egin beharra daukatela eta, horrenbestez, Nexmachina eta antzeko enpresak behar dituztela soluzioak eta zerbitzuak eskain diezazkieten.
Zein dira Nexmachinaren erronka nagusiak? Eta gauzen Internetenak?
Hazi egin nahi du gure enpresak, eta, horregatik, hau izango da gure erronka: adimen artifizialez hornitzea iQmenic, zerbitzu berriak eskaintzeko. Bezeroen ERPak eta CRMak gure plataforman txertatzeko ere ari gara lanean.
Gauzen Interneti dagokionez, berriz, zain gaude 5G-k zer ekarriko. Izan ere, baterien iraupenak mugatu egiten du gauzen Internetekin lotura duten gailuek datuak bidaltzeko duten ahalmena. Etorkizuneko 5G-k gainditu egingo ditu muga horiek, eta hobera egingo du egoerak. Bestalde, egungo komunikazio teknologia bakoitzak —SigFox, Lora…— bere eremu propioa izango du, nire ustez behintzat. Ez da egongo besteak irentsiko dituen teknologia bat, eta bat edo bestea erabiliko ditugu, premien arabera. Komeni da, bestalde, gauzen Internet ez estandarizatzea, hartara aplikazio, operadore eta soluzio berriak sortuko baitira, eta sormena gehiago landuko. Estandarizatuko balitz, mugatu egingo lirateke hura garatzeko aukerak.
Lotutako albisteak
Lantekek, software industrialean munduko liderrak, 36.000 bezero baino gehiago ditu dagoeneko
Arabako Parkean kokatuta dagoen enpresak 400 langile baino gehiago ditu, eta SPRI Taldearen zibersegurtasuneko programako laguntza bat jaso du
Lowerton, adimen artifizialarekin enpresak berritzea eskaintzen duen startupa
Bere teknologiak aukera ematen du lau hilabeteko lana eskatzen duten hobekuntzak bi egunetan bakarrik ezartzeko
Duplostock industria-irtenbide pertsonalizatuen diseinatzaile eta fabrikatzaile bihurtu da
Zuzendaritzan izandako aldaketaren ondoren, euskal enpresak eraldaketa digitalaren, efizientzia energetikoaren eta bere prozesuen automatizazioaren aldeko apustua egin du.
Novaut, blog batetik jaio zen marketplace industrialaren finkapena
Merkatuan bost urte daramatza, eta Arabako enpresak lortu du bere lekua egitea ordezko pieza kritikoen sektoreko erraldoien artean
GM2k digitalizazioaren eta nazioartekotzearen aldeko apustua egin du, motorraren sektorearen hazkundea bultzatzeko
Motorzaleentzako ekipamenduaren banaketan espezializatutako enpresa arabarrak adimen artifizialean oinarritutako laguntzaile birtual bat garatu du, ereduaren araberako ordezko piezen bilaketa errazteko, eta Mediterraneo inguruko herrialdeetan hedatzen hasi da.
Veiss-ek 20 urte baino gehiago dihardu tokiko enpresa eta erakundeen eraldaketa digitalean laguntzen
Arabako enpresak webgune korporatiboak, mugikorretarako aplikazioak edo online dendak garatzen ditu sektore mota guztietarako.
Lancor, altxatzeko motor elektrikoen fabrikazioan Europako liderra
Abanto-Zierbenako enpresak SPRI Taldearen Gaitasun Digital Profesionalen programako laguntza jaso du eta esportaziorako produktu propioak garatzearen aldeko apustua egiten du.
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
Mercanza: “Bezeroa bere datuen ustiapenean espezializatua bihurtzen dugu”
Enpresak eraldaketa digital tradizionala gaindituz soluzioak eta zerbitzuak eskaintzen ditu, enpresen eraginkortasuna eta produktibitatea bultzatzeko.
Zabalgarbik denbora errealeko analisi-tresnekin modernizatu du bere azpiegitura
Besteak beste, biki digitala eta adimen artifizialean oinarritutako teknologiak ezartzeaz gain, lurrun-gainberogailu bat instalatzea du helburu enpresak, energia-eraginkortasuna eta jasangarritasun operatiboa hobetzeko ekimen estrategiko bat.