AgLa4D enpresak ingurune industrialak birsortzen ditu 3Dn
Euskal konpainia horrek errealitate birtuala, errealitate handitua eta datuak atzemateko teknikak erabiltzen ditu fabrika baten eredu birtualak sortzeko
AgLa4D Construction Technology konpainiak duela zortzi urtetik eskaintzen ditu errealitate birtualeko eta errealitate handituko zerbitzuak, prozesu industrialak optimizatzeko. Denbora horretan ikusi dute nola horrelako teknologien inguruko startupek ziztu bizian egin zuten gora eta nola gero jaitsi egin ziren, bai negozio-bolumenari eta bai beren heldutasun teknologikoari dagokionez, oztopo handiak daudelarik oraindik heldutasun horretara iristeko. Lander Amorrortu, AgLa4D enpresako New Business Manager-arekin hitz egin dugu.
Noiz abiatu zen AgLa4D?
Profil desberdinetako hiru bazkidek (aparejadore bat, telekomunikazioetako ingeniari bat eta arkitekto bat) sortu genuen enpresa hau 2010ean, BEAZ edo Tecnalia bezalako erakundeen laguntzarekin. Hasieran, asmoa zen errealitate birtualeko eta errealitate handituko konponbideak garatzea eraikuntzaren sektorerako. Orduan Walkinside deskubritu genuen, Belgikako enpresa batek garatutako software bat, oso desberdina zena Unity -sasoi hartan Espainian gehien erabiltzen zena- bezalako lehiakideetatik. Ohartu ginen Walkinside mundu osoan erabiltzen zela prozesu industrialetarako, biki digitalak egiteko, e.a., eta erabaki genuen produktu hori frankizia gisa sartu nahi genuela Espainian, sektore desberdinetako (itsasgintza, petrolioa, energia sorkuntza…) enpresa handiei saltzeko.
Kontua da 2013an Siemens-ek Belgikako enpresa hura eta bere software guztia erosi zituela produktu handiago bat garatzeko, eta gaur egun COMOS Walkinside softwarearen banatzaile eta garatzaile gara Espainian.
Zer da COMOS Walkinside?
COMOS Walkinside da Siemens-ek datuen analisirako behar zuen 3D oinarria. Enpresa askotan txertatzen ari den PCS 7 automatizazio-algoritmoaren hurrengo urratsa da.
COMOS Walkinside-k konponbideak eskaintzen ditu lantegi bateko datu errealetatik abiatuta errealitate birtualeko ereduak 3Dn sortu eta bistaratzeko. Erabil daiteke langileei prestakuntza murgiltzailea emateko eta hainbat tresna eskaintzen ditu datuak eraginkortasunez trukatzeko hirugarrenen aplikazioekin edo lankidetza banatua garatzeko denbora errealean.
Nolakoak dira zuen errealitate birtualeko eta handituko konponbideak?
Datuei esker posible da lantegi baten funtzionamendua digitalizatzea, makinen zein prozesuen mantenimendu prediktiboa egitea eta langileei prestakuntza ematea errealitate handitua erabiliz. Geuk egiten dugu integrazioa lantegian. Hara joaten gara, inguruneak eskaneatzen ditugu puntu-laino batekin eta informazio guztia esportatzen dugu eredu birtual batera. Gero, programatzaileek posible dute puntu zehatz bati buruzko informazioa ematen duten etiketak sortzea, hala etiketa batek azaldu dezake nola erabiltzen den kontrol-koadroa edo zein likido garraiatzen duen hodi batek, adibidez. Informazio hori digitalizatuta badago eredu birtualean sar dezakegu. Emaitza da bideojoko moduko bat, zeinak aukera ematen dizun lantegi birtualean barrena ibiltzeko eta puntu edo makina desberdinei buruzko informazioa aurkitzeko. Puntu zehatz bat klikatuz gero, bere funtzionamenduari buruzko informazioa agertuko zaizu. “Sinesteko ikusi, ulertzeko jolastu” deitzen diogu.
Zerk bereizten du zuen konponbidea merkatuko antzeko beste zerbitzu batzuetatik?
Desberdintasun handiena da guk benetako prozesuaren automatizazioa saltzen dugula. Prozesua, elementuak, makinak eta linealak beti aldatzen dira. Beste birtualizazio-tresna batzuek prozesuen une zehatz bateko argazki finkoak eskaintzen dituzte. Nola COMOS Walkinside softwarea datu errealekin elikatzen den eta nola gure prozesua automatikoa den, egunero izan dezakezu zure lantegiari buruzko informazio eguneratu eta erreala.
Bestalde, COMOS Walkinside softwarea gai da milioi bat poligono irudikatzeko, aldiz, beste tresna batzuek (Unity-k adibidez) sei hilabeterainoko epea behar izaten dute tamaina horretako lantegi baten irudikapen birtual bat egiteko, eta denbora horretan gauza eta elementu asko aldatzen dira.
Zure ustez zenbateko inpaktua dute errealitate birtualak eta handituak industria sektorean?
Gaur egun errealitate handitua eskuragarriagoa da errealitate birtuala baino, edonork erabil baitezake sakelako batekin edo tablet batekin. Errealitate birtualak ez du asko aurreratu 2010etik, jendeak ez baitaki zer nahi duen. Errealitate birtualak industria sektorean funtzionatuko badu, sinkronizatuta egon behar du prozesuekin eta informazio errealaz elikatu behar du. 3D eredu bat egiteko ez da bakarrik behar geometria, informazioa ere bai. Kontua ez da habe bat edo zutabe bat birsortzea, baizik eta jakitea zenbat pisu jasan dezakeen, horrela aurreikusteko zein ondorio egon daitezkeen lantegian aldaketak egiten badira. Hau ez da bakarrik lantegiaren interiorismoa. Jendeak bere informazioa digitalizatu behar du.
Bestalde, askotan esaten da posible dela errealitate birtual murgiltzailea erabiltzea betaurreko edo bisoreen bitartez. Ingeniariak errealitate birtualeko betaurrekoak jantzita balebiltza egunero, hilabeteren buruan denak leudeke bajan lepoko minagatik eta zorabioengatik. Inork ezin du lan egin bi kiloko zama duen zerbaitekin. Era berean, ez da logikoa errealistak ez diren eredu birtualak egitea erabiltzaileak ez daitezen zorabiatu.
Zeintzuk dira AgLa4D enpresaren etorkizuneko erronkak?
Jendaurrean aurkezteko moduko proiektu bat izatea. Ezarrita gaude, baina ezin dugu jendaurrean azaldu zertan ari garen. Gure bezeroetako batek publikoki adierazten duenean digitalizazio prozesu bat egin duela gurekin eta azaltzen duenean nolako abantailak eman dizkiogun, orduan posible izango da kasu arrakastatsu bat aurkeztea. Hainbat sektoretan sartu gara: petrolioa, itsasgintza, zementua, elikadura, eta abar, baina sektoreak baino ezin ditugu aipatu momentuz. Nahi duguna da jendeak jakin dezala zer egiten dugun eta zer egin dugun.
Lotutako albisteak
Veiss-ek 20 urte baino gehiago dihardu tokiko enpresa eta erakundeen eraldaketa digitalean laguntzen
Arabako enpresak webgune korporatiboak, mugikorretarako aplikazioak edo online dendak garatzen ditu sektore mota guztietarako.
Lancor, altxatzeko motor elektrikoen fabrikazioan Europako liderra
Abanto-Zierbenako enpresak SPRI Taldearen Gaitasun Digital Profesionalen programako laguntza jaso du eta esportaziorako produktu propioak garatzearen aldeko apustua egiten du.
Rebel Tickets, sarreren birsalmentan iruzurrari eta gehiegizko prezioei aurre egiteko sortutako enpresa bizkaitarra
Gaur egun, beren publikoari baimendutako birsalmenta eskaini nahi dioten jaialdi, kontzertu eta bestelako ekitaldien sustatzaileekin lan egiten du.
Mercanza: “Bezeroa bere datuen ustiapenean espezializatua bihurtzen dugu”
Enpresak eraldaketa digital tradizionala gaindituz soluzioak eta zerbitzuak eskaintzen ditu, enpresen eraginkortasuna eta produktibitatea bultzatzeko.
Zabalgarbik denbora errealeko analisi-tresnekin modernizatu du bere azpiegitura
Besteak beste, biki digitala eta adimen artifizialean oinarritutako teknologiak ezartzeaz gain, lurrun-gainberogailu bat instalatzea du helburu enpresak, energia-eraginkortasuna eta jasangarritasun operatiboa hobetzeko ekimen estrategiko bat.
GAIAk IKT sektorearen prestakuntza-beharren diagnostikoa egin du eta merkatuaren eskaerei erantzuteko prestakuntza-ibilbideak garatu ditu
GAIAk azpimarratu duenez, sektoreko eta gobernuko erakundeen, sozietate publikoen eta hezkuntza-sistemaren parte-hartzea funtsezkoa izan da azterlanari balio erantsia emateko
Senvia Systems-ek beste enpresa batzuk gidatzen ditu haien sustapenean eta eraldaketa digitalean
Iaz sortutako enpresa gipuzkoarrak sistemetan, komunikazioetan eta zibersegurtasunean oinarritutako IT zerbitzuak eta aholkularitza eskaintzen ditu.
Akting, gizarteari balioa emateko teknologia
Gipuzkoako enpresak euskarri desberdinetarako aplikazioak garatzen ditu eta digitalizazioaren, datuen analisiaren eta prozesuen optimizazioaren aldeko apustua egiten du.
Biotz: “Roca Salvatellarekin egindako akordioak berrikuntza teknologikoaren balio-kate osoa batzen du”
Gipuzkoako enpresak Kataluniakoarekin aliantza bat itxi du bere talentu digitala indartzeko eta nazioarteko merkatu berrietan bere presentzia zabaltzeko.
Elvira, berrikuntza eta tradizioa osagai nagusi dituen istorio gastronomikoa
Harategi-urdaitegi txiki bat izatetik, gaur egun hamar establezimendu inguru ditu etxean egingo liratekeen moduan prestatutako produktuak saltzeko, online dendan ere saltzen direnak.