31 startup berritzailek 40 kontratu lortu dituzte BIND 4.0 plataformako trakzio-enpresekin 5. ediziorako
Ekimenean murgilduta dauden trakzio-enpresek 73 herrialdetatik jaso diren 750 hautagaitzak –iaz baino % 37 gehiago– aztertu ondoren hautatu dituzte parte-hartzaileak.
Hautatutako startupen artean Euskadiko 15, beste autonomia-erkidego batzuetako 7 eta nazioarteko 9 daude
Aurten, Internet of Things, Adimen Artifiziala, Ikuspen Artifiziala eta Big Data teknologiak gailentzen dira hautatutako proiektuetan, soluzioen % 62 izanik.
BIND 4.0 industria adimendunaren berrikuntza irekiko plataformak 31 enpresa emergente hautatu ditu urtarrilaren 25ean hasiko den bizkortze-programaren bosgarren edizioan 4.0 industriako 40 proiektu garatzeko. Zenbaki horiek egiaztatzen dute, bizi dugun osasun-egoeraren ondorioz ditugun oztopoak oztopo, teknologia eta berrikuntza lehentasuna direla industriaren, energiaren, osasunaren eta elikaduraren sektoreko enpresa nagusientzat, BIND 4.0ko startupen aldeko apustua egiten jarraitzen baitute euren lehiakortasuna hobetzeko berrikuntza eta talentua eskuratzeko modurik onena dela pentsatuta.
Azken edizio honetarako jasotako 750 hautagaitzak –iaz baino % 37 gehiago– aztertu ondoren, BIND 4.0ko 57 trakzio-enpresek industriaren zenbait aplikazio-arlotako proiektu berritzaile estrategikoenak hautatu dituzte. Ekonomiaren Garapen, Jasangarritasun eta Ingurumen Sailaren ekimen publiko-pribatu hau SPRI Taldearen eta ekintzailetzaren euskal ekosistemaren UpEuskadi plataformaren bidez kudeatzen da, eta 4.0 Industriaren berrikuntza irekiaren eta bizkortzearen erreferente bihurtu da mundu osoan, egoitza Euskadin duten industriaren, energiaren, osasunaren eta elikaduraren sektoreko enpresa nagusien inplikazioari esker.
Besteak beste, Mercedes-Benz, Ferrovial Servicios, Siemens Gamesa, Quirónsalud, Coca-Cola European Partners, Eroski, Iberdrola edo Unilever enpresa handiei eta 2016an abian jarri zenetik jaso diren 2.400 bat hautagaitzei esker, bizkortze-programa honek indartu egin du Euskadiren posizioa nazioartean erreferentzia den industria-berrikuntzako ekosistema gisa. Hori dela eta, startupek BIND 4.0ren aldeko apustua egiten jarraitzen dute erreferentziako bezeroen eskutik merkatura bizkorrago iritsi ahal izateko.
Zerbaitengatik irabazi du BIND 4.0 plataformak Enpresa Sustapenerako Europako Sarien XIV. edizioa, enpresa-ingurunearen hobekuntzaren kategorian. Sari horiek Europako Batzordeko Barne Merkatuko, Industriako, Ekintzailetzako eta ETEetako Zuzendaritza Nagusiak antolatzen ditu, eta sarien bidez enpresak abian jartzea eta haztea sustatzen duten eta, enpresa txiki eta ertainen alde, legegintzako eta administrazioko prozedurak sinplifikatzen dituzten tokiko, eskualdeko eta nazio-mailako politika berritzaileak aitortzen dira.
Nolakoak dira 5. edizio honetan hautatu diren startupak?
Aurtengo bizkortze-programan parte hartzeko hautatu diren startupen jatorriari dagokionez, nabarmendu behar da 15 Euskadikoak direla –8 Bizkaikoak, 3 Arabakoak eta 4 Gipuzkoakoak–, beste 16 beste autonomia-erkidego batzuetakoak (besteak beste, Las Palmas, Bartzelona, Madril eta Nafarroakoak) eta gainerakoak munduko beste herrialde batzuetakoak. Hortaz, aurten hautatu diren startupen % 51 Euskal Autonomia Erkidegoaz kanpokoak dira. Zehazki, nazioarteko 9 startupen jatorrizko herrialdeak Finlandia (1), Alemania (2), Israel (1), Portugal (1), Erresuma Batua (1), Italia (2) eta Suedia (1) dira.
Bosgarren edizio honetarako hautatutako startupek kalitate handiko soluzio abangoardistak aurkeztu dituzte prozesuak, zerbitzuak eta produktuak hobetzeko helburuarekin. Gainera, aurkeztu diren aplikazio teknologikoetako batzuk osasun-krisiaren ondorioz sortu diren premiei erantzuteko dira. Horretarako, Adimen Artifiziala, Gauzen Interneta, Ikuspen Artifiziala eta Big Data arloetako teknologia berritzaileak ezartzen dituzte, eta hautatuko proiektuen artean arlo horietakoak dira gehienak, soluzioen % 62, alegia. Aipatzekoak dira Blockchain, zibersegurtasuna eta Robotika teknologiak erabiltzen dituzten soluzio berritzaileak ere.
Zehazki, honakoak dira hautatu diren Euskadiko startupak: zibersegurtasuna eta Internet of Things teknologia ezartzen duten Arabako 3: Eurocybcar SL, Inalia Innovación y Desarrollo SL eta Ega Solutions SL; Adimen Artifiziala, Big Data, Ikuspen Artifiziala, Blockchain, Internet of Things eta Zibersegurtasuna teknologiak erabiltzen dituzten Bizkaiko 8: AOTECH, APlanet, ASIMOB, CodeContract, Grabit Retail, RKL Integral, Sticker Control eta Hodeia Digital; eta 3D Inprimaketa, Ikuspen Artifiziala, Big Data eta Bioteknologia ezartzen dituzten Gipuzkoako 4: 3R3D Technology Materials, I2U, Savvy Data Systems eta Onena Medicine.
TEKNOLOGIAK PROIEKTUZ PROIEKTU
Berrikuntza eta teknologia, aurrera jarraitzeko giltzak
BIND 4.0k hiru helburu nagusi ditu: Euskal Autonomia Erkidegoko industria-ekosisteman startupen garapena bizkortzea, enpresen eraldaketa digitala sustatzea eta Euskal Autonomia Erkidegoaren ekosistema industria-ekintzailetzako hub aurreratu gisa kokatzea. Hiru helburu horiei esker erreferentziako programa bihurtu da berrikuntzaren, teknologiaren eta ekintzailetzaren aldeko apustuan. Horrela, programa 2016an abian jarri zenetik 100 startup baino gehiago bizkortu dituzte eta 170 proiektu baino gehiago garatu dituzte, eta 5 milioi euroko fakturazioa gainditu da.
Bosgarren edizio honetan, BIND 4.0k sektorearen premia eta inguruabar berrietara egokitzen jakin du, berrikuntzaren, lankidetzaren eta atzerriko talentua erakartzearen aldeko apustua egin beharra zegoela eta COVID-19ak eragin dituen erronka berriei aurre egiteko modurik onena startupak erakartzea zela ulertuta. Izan ere, egiaztatu dugu enpresek eta startupek ondo asko dakitela BIND 4.0 dela eraldaketa digitalaren arloan dituzten erronkei aurre egiten lagunduko dieten startupik onenak ezagutzeko eta kontratatzeko eta horiekin elkarreragiteko berrikuntza irekiko plataformarik onena.
Bestalde, garrantzizkoa da azpimarratzea, osasun-egoera zaila gorabehera, nazioarteko startupek BIND 4.0 plataformaren alde apustu egiten jarraitzen dutela, nazioarteko merkatuan sartzen eta erreferentziako enpresa handiekin kontratuak lortzen lagunduko dien berrikuntza irekiko plataforma gisa. Izan ere, programa amaitzen dutenean, enpresa emergenteen % 70k jarraitzen du trakzio-enpresekin lanean, eta horrek oso argi uzten du sektoreko eragile guztien arteko lankidetza-eredu honen arrakasta.
* 5. edizioan parte hartuko duten startupen zerrenda
3R3D Technology Materials
4T2 Sensors
Acoustic Extra Freezing
AllRead MLT
AOTECH
APlanet
ASIMOB
BeePlanet Factory S.L.
BitMetrics
CodeContract
Dattium Technology
Eccocar
Ega Solutions S.L.
Erium GmbH
Eurocybcar
Gipstech Srl
Grabit Retail
Hodeia Digital
I2U
Inalia Innovación y Desarrollo, S.L.
Jungle
Onena Medicines
Pervasive Technologies
RKL Integral
Savvy Data Systems
Simumatik AB
Sticker Control
Subsea Mechatronics
TechMass srl
Workerbase
Yarok Microbio
BIND 4.0ri buruz
BIND 4.0 industria adimenduneko berrikuntza irekiko plataforma publiko/pribatua da, Ekonomiaren Garapen, Jasangarritasun eta Ingurumen Sailak SPRI taldearen eta Euskadiko ekintzailetzaren ekosistemako UpEuskadi plataformaren bidez sortua. Gaur egun egoitza Euskadin duten erreferentzia globaleko 57 enpresa lider nagusirekin lankidetzan dihardu, eta teknologiaren arloko nazioarteko hainbat enpresak ere parte hartzen dute bertan, hala nola Siemens, Microsoft eta Amazon Web Services enpresek. Ekimena helburu bikoitzarekin sortu zen: alde batetik, industriaren eraldaketa digitala bultzatzeko eta, bestetik, ekimen berritzaileak sendotzeko prozesua bizkortzeko enpresa handien eta startupen arteko lankidetza-eredu baten bitartez. 2016tik, lau edizioetan, BIND 4.0 plataformak 100 startupek baino gehiagok garatu dituzten 178 proiektu bizkortu ditu guztira.
Lotutako albisteak
Digitalizazioa eta pentsamendu kritikoa: honela bizi izan da CodeOKen 1. edizioa Euskadiko ikasgeletan
280 ikastetxetako, 12 eta 16 urte arteko ia 5.000 ikasle eta 600.000 jarduera baino gehiago bildu ditu CodeOK 2024-2025en lehen edizioak. Hezkuntza Sailak eta GAIA Klusterrak bultzatutako ekimenak digitalizazioa eta pentsamendu konputazionala Euskadiko ikasgeletara eraman ditu, erronketan, gamifikazioan eta benetako problemak ebazten oinarritutako metodologia berritzailearekin.
Garaia Parke Teknologikoa, berriro ere ekintzailetza eta inbertsiorako topagune ekainaren 3an
Debagoiena euskal ekintzailetzaren epizentroa izango da berriro, ekosistema enpresarial eta berritzailea indartzea helburu duen topaketarekin.
EBN 2025 kongresua BIC Bizkaia Ezkerraldean egingo da
Kongresua aukera paregabea izango da industria-energia trantsizioaren inguruan eztabaidatzeko, gure lurralde eta ekonomien etorkizunerako funtsezko gaia baita.
Epea eta aurrekontua zabaldu ditugu, adimen artifizialeko teknologiak barne hartzen dituzten eta Euskadiko enpresen datuen azpiegitura optimizatzen duten proiektuak babesteko.
Laguntza horiek Europar Batasunak finantzatzen ditu NextGenerationEU berreskuratze-planaren bidez, pandemiak eragindako kalteak konpontzeko eta etorkizun jasangarriago, digitalago eta erresilienteago baten oinarriak ezartzeko. Espainian, funts horiek Berreskurapen, Eraldaketa eta Erresilientzia Planaren bidez kudeatzen dira.
INIZIA sariak banatu dituzte, INIZIA DAY jardunaldian
Horien helburua da oinarri teknologikoa duten eta/edo berritzaileak diren enpresa egitasmoak biltzen dituzten proiektuak aitortzea
Ekintzaileentzako laguntzak: Bihur ezazu zure negozio ideia enpresa berritzaile eta errentagarri Ekintzailerekin
Ideia berritzaile bat duzu eta enpresa bihurtu nahi duzu? Orduan interesatzen zaizu Ekintzaile 2025, programa ezagutzea. Ekintzailetza bultzatzeko laguntza horrek laguntza ekonomikoa eta adituen aholkularitza eskainiko dizkizu zure proiektua bideragarria eta arrakastatsua izan dadin.
Nola izan enpresa ekintzaile bat Barnekintzaile programarekin, barne-ekiteko laguntza.
800.000 euroko aurrekontua du Barnekintzaile 2025 barne-ekintzailetzarako laguntza-programaren edizio berriak. Enpresa-proiektu berriak garatzeko edo jarduera berrietara dibertsifikatzeko laguntza eskuratu nahi duten enpresek abenduaren 11ra arte aurkez ditzakete eskaerak.
Iritsi da zure datuak eta zerbitzuak hodeira migratzeko unea. Aprobetxatu euskal enpresentzako Kloud laguntza
Kloud programak Euskadiko enpresei haien zerbitzu edo azpiegitura informatikoak Cloud ingurune komertzialetara migratzeko aukera eskaintzen die. Horretarako, enpresa bakoitzeko 50.000 € arte eskaintzen du hodeirako migrazio-prozesu osoa diseinatzen eta ezartzen lagunduko dien kanpoko enpresa bat kontratatu ahal izateko. Azaroaren 10ean amaituko da laguntza hori eskatzeko epea.
ApplAI 2025 Kongresuak Adimen Artifizial Aplikatuaren erreferente gisa finkatu du Euskadi nazioartean
230 erakunde baino gehiagoko 500 pertsona bildu dira, eta Euskaditik berrikuntza teknologikoarekin konprometitutako komunitate aktiboa sendotu da
Eusko Jaurlaritzak startup teknologikoak sortzea bultzatuko du, 2,5 milioirekin ekintzailetzarako laguntzetan
Maiatzaren 16an irekiko ditu SPRIk Ekintzaile eta Barnekintzaile programak