Donostiak Ekintzailetzarako EKINN gunea ireki du
Donostiako Udalak, Donostia Sustapenaren bitartez, EKINN gunea ireki du, ekintzailetzara zuzendua, eta Ekintzaileari Arreta Emateko Bulegoa izango da bertan. Ekipamendu berri horrek 700 m2 ditu, eta arreta pertsonalizatua eta orientabideak eskainiko ditu enpresa- proiektuak eta -ekimenak garatzeko.
Berrikuntza eta ekintzailetza nodo berria San Bartolome gainean dagoen 4.500 m2-ko eraikin batean dago, hiriaren erdigunean. Coworking-guneak, bilera-gelak eta auditorium txiki bat ditu beheko solairuan. Goikoan, ekintzaileei aldi batez ostatu emateko 70 apartamentuekin batera, bileretarako eta ekitaldietarako gune bat ere badu.
Irekiera ekitaldian Donostiako alkate Eneko Goiak, Ekonomiako eta Bertako Enplegurako zinegotzi Marisol Garmendiak eta Iñigo Olaizolak, Donostia Sustapeneko zuzendariak, hartu dute parte, ekintzailetzaren ekosistemarekin lotutako hezkuntza, enpresa eta teknologia arloko erakunde eta eragileen ordezkari ugarirekin batera.
Donostiako alkate Eneko Goiak adierazi du, EKINN residentzia berri hau “hiriak zientzia eta ezagutzaren alde, baita ekintzailetzaren alde egiten duen apustu sendoaren isla dela”. Eta apustu hau “etengabekoa dela eta bere fruituak ematen ari dela, erakunde ezberdinen, unibertsitateen eta sektoreko enpresen laguntzari esker” ere esan du. Horiek horrela, Goiak honakoa gaineratu du: “Talent House-aren eskaintza handitzeko beharrak erakusten du, Donostiak talentua erakartzen duen hiria dela, eta ikertzaileen eta ekintzaileen mapan dagoela, hain zuzen ere, garapen profesionalaz gain, euren egonaldian izango duten bizi kalitatea kontuan hartzen duten ikertzaileak”.
Alkateak azpimarratu du, Donostiak duen erronketako bat dela kanpotik talentua erakartzea eta bertakoa mantentzea. Horren harian, esan du, Ibaetako kanpusera iritsiko den ordenagailu kuantikoak erakarri egingo dituela Donostiara etorri, bertan lan egin eta bertan bizi nahi izango duten zientzialari eta ikertzaile berriak. Horregatik, erakundeen lana ezinbestekoa dela nabarmendu du, Donostian behar diren baldintzak sortzeko ikertzaile horien guztien egonaldia ahalik eta luzeena eta egonkorrena izan dadin.
“Azpiegitura berri honek Donostiak hirian euren proiektua bultzatu nahi duten gazteak erakartzeko eta bertan lan egiteko eskaintza aberastu egingo du, eta hemen gelditzeko erabakian balio erantsia eskainiko die”, esan du Goiak.
Ekonomiako eta Bertako Enplegurako zinegotzi Marisol Garmendiak Donostiako Udala eta Donostia Sustapena ekintzailetza berritzailearen alde egiten ari diren apustua azpimarratu du. “EKINN herritarrei irekitako gunea da, ideiak, aukera eta proiektu bihurtzekoa. Apustu bat, bereziki gazteei beren proiektuak garatzeko aukerak eskaintzeko eta gure hiriarentzat etorkizun sendo bat eraikitzeko. Horrela, asmoa da ezagutzan oinarritutako ekonomia baten bidez kalitatezko enpleguak sortzea”.
Garmendiak, gainera, azpimarratu du Donostia Sustapenaren apustua 12,5 milioiko inbertsioak babesten duela 2015-2023 aldian, eta horri esker gaur egun Donostian sortzen diren enpresen % 40 ezagutzan intentsiboak diren ekimen ekintzaile berriak direla (SEIC); sektore horrek hiriko BPGaren % 43,4 eta enpleguaren % 30,5 ekartzen du. “EKINNek aukera emango digu ekintzaileei arreta hobea emateko eta gure ekintzailetza-tasa (% 6,6), Euskadiko eta Estatuko batezbestekoaren gainetik dagoena (% 6), handitzeko, baita ezagutzaren ekonomiari lotutako kalitatezko enplegua finkatzeko ere”.
Donostia Sustapenaren zuzendari Iñigo Olaizolak nabarmendu duenez, “Hau irekitzean, etapa berri bat hasiko da Donostia Sustapenarentzat, tokiko berrikuntza-agentzia gisa ikuspegi eta misio berritua, eta EKINN proiektu berria lankidetza sustatuko duen berrikuntza-nodo gisa eratuko da”.
Gainera, gogorarazi duenez, “gure Plan Estrategikoan, hirian ekintzailetza berritzailea sustatzeko eta bultzatzeko apustuak leku nabarmena du. EKINNek talentu ekintzailea garatzeko eta erakartzeko estrategia bat bultzatu nahi du, proiektu berritzaileak bizkortuz, kultura ekintzailea garatzearen aldeko apustua eginez eta, bereziki, lotura eta lankidetza erraztuko dituen espazio berri bat sortuz, eragina duten aukerak eta proiektu berriak sortzeko funtsezko faktore gisa. Hiri-proiektu bat da, eta ekosistemako eragileen arteko lankidetzarako deia, eremu horretan hiri sendo eta irmoaren aldeko apustua eraikitzeko ”
Hiritarren eskura dagoen gune berria
EKINN, berrikuntza eta ekintzailetza nodo berriak Donostia Sustapenak ekintzaileen eskura jartzen dituen baliabide guztiak bilduko ditu, laguntza integral eta pertsonalizatuarekin, honako hauek barne: informazioa eta orientabideak, prestakuntza espezifikoa, aholkularitza, laguntza ekonomikoak, eta lanerako, sustapenerako eta ikusarazteko espazioak.
4.500 m2 -ko ekipamendu berriaren helburuetako bat da ekintzailetzaren errealitatea herritarrei hurbiltzea, batez ere gazteei, haien ideiak eta ekimenak enpresa-proiektu bihurtu ahal izateko behar dituzten baliabideak eskaintzea. EKINN San Bartolome gainean dago, hiriaren erdigunean, eta Easo kalean dagoen igogailutik zuzeneko sarbidea du.
Ekintzaileari Arreta Emateko Bulegoaz gain, eraikinak lau bulego profesional, coworking-gune bat, prestakuntza-gelak, auditorioa eta bileretarako eta ekitaldietarako gune bat ditu, eremu komunetan. Goiko solairuetan, 25 m2-tik 45 m2-ra bitarteko 70 apartamentu daude, berrikuntzaren eremuarekin lotutako pertsonei ostatu emateko, eta horietatik 12 gazte donostiarrentzat dira.
EKINN berrikuntza eta ekintzailetzako nodo berriaren irekieran hezkuntza, enpresa eta teknologia arloko hainbat erakunde eta eragile izan dira, hala nola Deustu, EHU-UPV eta Tecnun unibertsitateak; Adegi, Bic Gipuzkoa, Gipuzkoako Bazkundea, Gaia, AEHG, BRTA, Elkargi eta Aspegi enpresa-eragileak; Biogipuzkoa, DIPC, Ceit, Tecnalia, Polymat, Cic Biomagune, Orkestra, Cidetec eta Cic nanoGune teknologia-zentroak; BerriUp, EIWA, Tecnalia Ventures, Clave Capital, Ysios Capital, Easo Venturese eta Hispavista Labs ekintzailetza- eragileak; Tknika, Ceinpro, Nazaret eta Cebanc lanbide-heziketako zentroak; eta Graphenea, Indicate Solutions, I2U, Onena Medicines, Viralgen, Comadera, Developair, Ecomagnet, Linqcase, Trak edo Eyefoil startup-ak.
Lotutako albisteak
EBN 2025 kongresua BIC Bizkaia Ezkerraldean egingo da
Kongresua aukera paregabea izango da industria-energia trantsizioaren inguruan eztabaidatzeko, gure lurralde eta ekonomien etorkizunerako funtsezko gaia baita.
INIZIA sariak banatu dituzte, INIZIA DAY jardunaldian
Horien helburua da oinarri teknologikoa duten eta/edo berritzaileak diren enpresa egitasmoak biltzen dituzten proiektuak aitortzea
Ekintzaileentzako laguntzak: Bihur ezazu zure negozio ideia enpresa berritzaile eta errentagarri Ekintzailerekin
Ideia berritzaile bat duzu eta enpresa bihurtu nahi duzu? Orduan interesatzen zaizu Ekintzaile 2025, programa ezagutzea. Ekintzailetza bultzatzeko laguntza horrek laguntza ekonomikoa eta adituen aholkularitza eskainiko dizkizu zure proiektua bideragarria eta arrakastatsua izan dadin.
Nola izan enpresa ekintzaile bat Barnekintzaile programarekin, barne-ekiteko laguntza.
800.000 euroko aurrekontua du Barnekintzaile 2025 barne-ekintzailetzarako laguntza-programaren edizio berriak. Enpresa-proiektu berriak garatzeko edo jarduera berrietara dibertsifikatzeko laguntza eskuratu nahi duten enpresek abenduaren 11ra arte aurkez ditzakete eskaerak.
Eusko Jaurlaritzak startup teknologikoak sortzea bultzatuko du, 2,5 milioirekin ekintzailetzarako laguntzetan
Maiatzaren 16an irekiko ditu SPRIk Ekintzaile eta Barnekintzaile programak
Nuavisek balio erantsi handiko ikusmen artifizialeko soluzioak eskaintzen dizkio industriaren eta elikagaien sektoreari
Enpresak aktiboak monitorizatzeko sistemak garatzen ditu prozesu industrialak hobetzeko
Eusko Jaurlaritzak startup disruptiboen talentua eskuratzeko aukera emango die EAEko ETEei
SPRIk BIND SMEren 5. edizioa ireki du, EAEko ETEek startup berritzaileekin elkarlanean jardun eta haien lehiakortasuna hobetzeko. Deialdia uztailaren 4ra arte egongo da zabalik. Hautatutako ETEek teknologia disruptiboetara eta talentu berritzailera sarbidea izango dute, IA, jasangarritasuna edo Smart Factory bezalako arloetan soluzioak garatzeko.
ESGI 188 (European Study Group with Industry) Bilbon izango da 2025eko maiatzaren 26tik 30era
Enpresek problema matematikoak aurkezten dituzte azterketa-taldeak konpon ditzan, askotan modelizazio edo optimizazio moduan.
Zinemaldia Startup Challenge 2025
Izen-ematea: apirilaren 15etik ekainaren 2ra arte
NudgeXperience Bilbon: CX eta Portaera Zientzien ekitaldia
Zuzendariei eta gerenteei, Cx-eko arduradunei eta berrikuntza eta marketineko profesionalei zuzendua