Frantziak % 10,9 handituko du urtean energia berriztagarrietan duen gaitasuna 2035era arte

Frantziako energia-sektorea

Frantzia erreferentziazko herrialdetzat finkatu da Europan energiaren arloan. Halaxe iradokitzen dute adierazle makroekonomiko nagusiek, izan ere, horien arabera, herrialdea ingurune erakargarria bere dimentsioagatik, BPGren hazkundeagatik, industria-ekoizpenagatik, langabezia-tasagatik, merkataritza arloko irekieragatik eta herrialde-arriskuagatik. Gainera, Frantziako laneskua oso kualifikatuta dago eta hango biztanleek prestakuntza-maila ona dute.

Merkatu hau sakon aztertzeko asmoz, SPRI Taldeari atxikitako Basque Trade & Investment (BasqueTrade) euskal enpresak nazioartekotzeko agentziak Frantziako sektore eolikoa zehaztasun osoz aztertu duen txostena argitaratu du, dagoeneko merkatu horretan diharduten edo jarduera Frantziara zabaltzea aurreikusia duten enpresei informazio baliagarria eskaintzeko asmoz.

Energia-politika Frantzian

Dokumentuan jasotakoaren arabera, prezioek gora egin dute energiaren arloan, batez ere 2022ko krisi energetikoan etenda geratu zen zerga bat berriro ezartzearen ondorioz. 2023an, energia berriztagarrien kuota % 27tik gorakoa izan zen herrialdeko mix energetikoan, eta banaketa orekatua izan zen eguzki-energiaren eta energia eolikoaren artean. Energia berriztagarrien instalatutako gaitasuna 20,9 GWetik 45,2 GWera handitu da 2015etik 2023ra bitartean. Kalkuluen arabera, gaitasun hori % 10,9 igoko da urtean 2023tik 2035era bitartean, 156,1 GWera iritsi arte, herrialdearen energia-gaitasun osoaren % 60,6ra alegia.

Klima arloan zehaztuak dituen xedeak bete eta Europar Batasunaren helburuekin lerrokatzeko, Frantziak hainbat energia-politika ezarri ditu: Energia eta Klimaren Plan Nazionala (PNIEC), 2015eko Trantsizio Energetikoaren Legea, Energiaren Urte Anitzeko Programa (PPE), Karbono Isurpen Txikien Estrategia Nazionala (SNBC) eta Klima Aldaketara Egokitzeko Plan Nazionala (PNACC).

Sektore eolikoa Frantzian

Politika hauen barruan, energia eolikoa lehentasunezkotzat posizionatu da, eta berariazko arau-esparrua dago lurreko energiarako (onshore) eta itsas-energiarako (offshore), baimenak eman eta parkeak eraikitzeko, osagaiak fabrikatzeko eta lizitazioetan parte hartzeko. 2025eko urtarrilean, energia eolikoan instalatutako gaitasuna 25 GWekoa zen (23,5 GW onshore eta 1,5 GW offshore), eta aurreikuspenen arabera, lurreko gaitasuna 35 GWra iritsiko da 2030erako eta offshoreak garrantzizko hedapen-fasea hasiko du. Frantziaren potentziala herrialdearen kostalde luzeak ere indartu du (3.400 km baino gehiago Atlantikoan, Mantxako Kanalean eta Mediterraneoan), eta helburua 2050ean 45 GWko gaitasuna lortzea da itsas-eolikoan.

Herrialdean, 1.524 parke eoliko daude jardunean, lehenengo itsas-parkeak (offshore) barne hartuta. Gainera, 140 parke identifikatu dira zorroan, hau da, guztizkoaren % 9 inguru. Azken urteotan zenbait aldaketa egin dira enkanteen programan, eta datozen hiru urteetan zazpi onshore enkante egitea aurreikusi da. Bestalde, offshore mailan, Frantziak eoliko flotagarian zuen lidergoa sendotu du, eskala handiko lehen merkataritza-enkanteak esleituz —250 MW Bretainia Hegoaldean, 86 €/MWh-ko prezio errekorrean, eta 250 MWeko bi eremu Mediterraneoan—, eta hedapen masiborako mugarria finkatuz. Gainera, Frantziako Gobernuak hamargarren lizitazioa (AO10) plazaratzeko asmoa du, 9,2 GWeko offshore gaiutasun estimatuarekin.

Era berean, Frantziak garrantzizko industria-oinarria du energia eolikorako osagaien fabrikazioari dagokionez. Segmentu batzuk inportazioen mende dauden arren, nabarmentzekoak dira zimendatzeetan eta metalezko egituretan dituen gaitasun handiak. Eskualdeen araberako espezializazioa honela banatu da: iparraldeak offshore eta portuko logistika ditu ardatz, erdialdeak osagai elektriko eta metalurgikoak, eta hegoaldean eta mendebaldean osagai estrategikoak ekoizten dira. Saint-Nazaire, Brest eta Le Havre portu-eremuek giltzarrizko azpiegiturak dituzte egitura handien garraiorako.

Sektoreko eragileei dagokienez, Siemens Energy, GE Renewable Energy, LM Wind Power, Vergnet, Vestas, Poma Leitwind eta Ideol enpresak Frantziako merkatuan finkatuta daude dagoeneko. Beren-beregin nabarmen daitezke Vestas, liderra 5.000 MWetik gorako turbinen instalazioan, Enercon (3.500 MW baino gehiago eta % 20ko kuota), Nordex (ia 3.000 MW eta % 15,7) eta Siemens (2.500 MW baino gehiago eta % 14,7).

Txostenak zenbait erronka ere azpimarratu ditu, bereziki eraikuntza-baimenak lortzeko epeei dagokienez, izan ere, epe ofiziala bost hilabetekoa izan arren, praktikan urtebete eta bi urte bitartekoa da hainbat agintariren esku-hartzearen ondorioz.

Euskal enpresentzako sarbide-gakoak eta aukerak

Horrekin guztiarekin, Frantzia merkatu estrategikoa da euskal enpresentzat. Horren harira, BasqueTraderen txostenak bi bide nagusi zehaztu ditu nazioartekotze-estrategiaren arabera: Frantzian zuzenean ezartzea, tokiko merkatuari erreparatuta, edo Euskaditik esportatzea, zeharka (Frantziatik kanpoko OEMen bidez) nahiz zuzenean, herrialdean ezarritako Tier 1 eta 2en edo zerbitzu-emateen bidez. Osagai espezializatuen eskaerak, egitura flotagarrietan bildutako esperientziak, parkeetako eragiketak eta portu giroko logistikak, tokiko edukia duten politikekin eta Europako zein Estatuko finantzaketarako sarbidearekin batera, ingurune mesedegarria zirriborratu dute. Gainera, Frantzia Europako gertuko beste merkatu batzuetara sartzeko plataforma izan daiteke, eta honek inbertsiorako zein enpresen hedapenerako duen erakargarritasuna indartzen du.

Lotutako beste txosten batzuk:

• BT & I-ren Energia Eolikoaren Behatokia: merkatu-azterketa eta euskal enpresentzako aukerak
• Brasilgo Energia Eolikoaren merkatuaren azterketa
• Poloniako Energia Eolikoaren merkatuaren azterketa
• Energia eolikoko AEBetako merkatuaren azterketa
• Indiako energia eolikoaren merkatuaren analisia
• Errusiako Energia Eolikoaren merkatuaren azterketa
• Análisis del mercado chino de Energías Renovables