Arpisak bere nazioarteko merkatua sendotu du Hazinnovaren eskutik
Arpisa konpainia, Aragonesa de Piensos S.A. izenarekin ere ezaguna, Berantevillan (Araba) eta Zaragozan egoitzak dituen konpainia bat da, pentsuak ekoizten, hegaztiak eta txerriak produzitzen eta merkaturatzen dituena, eta 60 urtetik gorako esperientziarekin. 150 langile ditu, eta, gainera, ordezkaritzak ditu penintsularen iparralde osoan banatuta, Logroñon, Iruñean edo Donostian, esaterako.
Bere bezeroak anitzak dira bere eskaintza zabalari esker, oilasko-denda eta harategi txikiak, handizkariak eta merkatal gune handiak. Merkatu nazional oso sendoa eta Frantzian ere presentzia handia izanik, Arpisa gero eta gehiago zabaltzearen aldeko apustua egiten ari da.
Helburu horretan SPRI Taldearen laguntza jaso du Hazinnova programaren bidez. Merkatu-azterketa baten bidez, produktu-lerro berri bat merkaturatzearen bideragarritasuna aztertu da. “Barne hausnarketa prozesu bat egin dugu maila komertzialean eta markaren posizionamenduan, eta oso harro gaude. Lehen proiektu honek atzerrian merkatu berri bat irekitzea ahalbidetu du, gure merkatu nazionala ere indartuz”, azaldu du Gerardo Ceballos Arpisako kudeatzaileak.
SPRIrekiko lankidetzak beste bi proiektu berrirekin jarraituko du. Gainera, azken urteotan Arpisak bere energia gastua murriztea eta horrekin enpresaren karbono aztarna mugatzea bilatzen du, Berantevillako lantegian eguzki autokontsumorako instalazio baten bidez.
Etorkizunera begira, industria arloari dagokionez, Arpisaren helburua da bere hiltegiaren gaitasuna handitzea eta, horrela, hazkunde horri laguntzea gainerako eremuetan, hala nola inkubagailuetan. “Komertzialki, gure helburua da merkataritza-gune handietan presentzia areagotzea eta merkatuan balio erantsiko produktuak bultzatzea”, gaineratu du Gerardo Ceballosek.
Euskal enpresen artean berrikuntza bultzatzeko, enpresa txiki eta ertainetatik konpainia handietaraino, SPRI Taldeak Hazinnova, BDHI Konexio edo Innobideak bezalako berrikuntzarako programak eta laguntzak ditu.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
