Entelgy-k eraldaketa digitala bultzatzen du pertsonengan oinarritutako irtenbide teknologikoekin
Entelgy, 20 urte baino gehiagoko ibilbidea eta %100eko kapital propioa duen negozioko aholkularitza teknologikoa, berrikuntza eta eraldaketa digitaleko euskal ekosisteman funtsezko eragile gisa finkatu da. 2.000 profesionalez osatutako lantalde globalarekin (horietatik 300 inguruk Euskadin lan egiten dute), konpainiak eraginkortasun estrategikoa eta teknologia aurreratuen ezarpena bultzatzen duten proiektuak gidatzen ditu.
Enpresak bi ardatz nagusitan oinarritutako zerbitzu sorta zabala eskaintzen du: adimen artifiziala eta aldaketaren kudeaketa; eta adopzio digitala. Horrela, enpresak ‘process mining’-eko eta datuen analitika aurreratuko soluzioak eskaintzen ditu, baita IAko agenteak garatzea edo aplikazioak ‘cloud’ inguruneetara modernizatzea ere. Eta hori guztia erakundeen lehiakortasunean benetako eragina sortzeko. Horrela, Euskal Herrian ‘Modern Workplace’ eremuan nabarmentzen da bereziki, enpresei beraien lan-inguruneak eraldatzen eta produktibitatea hobetzen lagunduz.
Horri esker, euskal enpresa- eta erakunde-ehunean duen presentzia handituz joan da bi hamarkada hauetan. Gaur egun, enpresak erakunde publikoekin lan egiten du, hala nola Eusko Jaurlaritzarekin, foru-aldundiekin eta haien teknologia-enpresekin — EJIE, Lantik, Izfe edo CCASA —, eta, horrez gain, Espainiako eta IBEX 35eko erreferentziazko konpainiekin lan egiten du. “Gure jarduera nagusia enpresa eta erakundeen eraldaketa gidatzea soluzio teknologiko aurreratuak ezarriz da, prozesu adimendunetan eta adimen artifizialean nabarmenduz”, azaldu du Ángel Echevarría Entelgy Ibai-ko zuzendariak.
Beraz, konpainiaren balio-proposamena ‘Human Driven Technology’ filosofian oinarritzen da, berrikuntza pertsonen zerbitzura jartzen duena. Bere soluzio aitzindarien artean ‘IAbility’ nabarmentzen da, adimen artifizialarekiko erresistentzia konfiantza bihurtzen duen tresna, ’storytelling’-aren eta gamifikazioaren bidez. “Filosofia horren bidez, giza faktorea eta teknologia bateratu nahi ditugu, errealitate hobetua eraikitzeko”, adierazi du Echevarríak.
Horrela, Entelgy-k aktiboki parte hartzen du berrikuntzaren euskal ekosisteman, sektoreko beste enpresa batzuekin eta GAIA bezalako klusterrekin lankidetzan, eskala handiko proiektu teknologikoak garatzeko. Era berean, konpainiak dibulgazio teknologikoa bultzatzen du, joan den ekainean San Mamesen egindako Prozesuen Inteligentziaren Euskal Foroa bezalako ekitaldien bidez, non prozesu adimendunen eta adimen artifizialaren azken joerak aurkeztu ziren. “Ezagutza-komunitateak ditugu eta beste erakunde batzuekin elkarlanean dihardugu Euskaditik sektorea eraldatzen jarraitzeko”, adierazi du konpainiako zuzendariak.
Konpainiak garapen teknologikoan ere laguntzen du, SPRI Taldeak bultzatutako ekimenen onuradunekin lankidetzan. “SPRI Taldearen ekimenek beraien programen onuradun diren enpresekin proiektuak gauzatzeko aukera eman digute, gure balioa eta ezagutza teknologikoa emanez”, nabarmendu du Echevarríak.
Entelgy-k nazioarteko presentzia du dagoeneko zortzi herrialdetan, eta, etorkizunari begira, Europarantz hedatzeko estrategian jartzen du arreta, enpresa handiei eta administrazio publikoei trantsizio digitalean laguntzen jarraitzeko asmoz.
SPRI Taldearen helburuetako bat euskal enpresen eraldaketa digitala da. Besteak beste, Smart Industry, BDIH Konexio, Zibersegurtasun Industriala, Enpresa Digitala edo Inplantalariak laguntza-programen bidez bultzatzen du.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
