Emakumezko Programatzaileen Eskola enpresa bila dabil praktikak egiteko
EmakumeEkin proiektuak bere 1. edizioaren balantzea aurkeztu du
Emakumezko Programatzaileen Eskolak bi helburu ditu: batetik, langabezian dauden emakumeen enplegagarritasuna hobetzea, eta bestetik, aniztasuna ematea gaur egun nagusiki maskulinoa den sektore bati. Horregatik, 12 emakumek web programazioari buruzko prestakuntza trinko bat egin dute aurten.
Ekainaren 25ean aurkeztu zen Emakumezko Programatzaileen Eskolaren lehen edizioko balantzea. Eskola hori EmakumeEkin elkarteak bultzatu du Bizkaiko Foru Aldundiaren finantzaketarekin eta Gaia Klusterraren laguntzarekin. Alderdi guztiek oso balorazio positiboa egin dute esperientziaz eta, gainera, enpresen interesa piztu du enplegua sortzeko aukera handiak dituen sektore batean.
“Ikusi nahi genuen posible zen web programazioari buruzko prestakuntza ematea arlo horretako oinarririk ez zuten pertsonei 300 orduko programa baten bidez, eta lortu dugu” azaldu du Susana Zaballak, EmakumeEkin elkarteko presidenteak. Gaia Klusterrak diseinatu du prestakuntza teknikoa, eta Grupo Oesia enpresak eman ditu eduki transbertsalak, sektoreko enpresek bilatzen dituzten gaitasunekin eta talentuarekin lotutakoak. Biskaytik enpresak ere kolaboratu du proiektuan.
Prestakuntza teorikoa bukatu ondoren, hurrengo urratsa da praktikak egitea, parte-hartzaileek aukera izan dezaten beren ezagutzak aplikatzeko. Horregatik, proiektua parte hartu nahi duten enpresen bila dabil. “Uste dugu aniztasuna eman diezaiekegula lantaldeei, jarrera ona eta motibazio handia duten pertsonak eskainiko dizkiegulako” azaldu du Susana Zaballak, “programatzaileen profila oso estereotipatua da, eta enpresari aukera ematen diogu gure baloreekin identifikatzeko eta sektorean berdintasunaren alde lan egiteko”.
Programan parte hartu duten emakumeek askotariko profilak dituzte; badaude beren bizitza profesionalari berriro ekin nahi dioten emakumezko programatzaile eta informatikoak, eta baita ere marketin eta komunikazioan, ADEn edo diseinu grafikoan lizentziatutakoak. Emakumezko Programatzaileen Eskolak bigarren edizio bat egin nahi du, lehenengoa baino osoagoa izango dena eta programazio lengoaia berriak landuko dituena. “Jarraipena izango duen eskola izatea nahi dugu, uste dugu beharrezkoa dela, zeren ikusi baitugu horrelako prestakuntzetan parte hartzen duten gehienak gizonezkoak direla” azaldu du EmakumeEkin elkarteko presidenteak.
