Dinalan-ek CIVITRA merkaturatu du, hiri-argiteria eta aktiboak kudeatzeko
Dinalan euskal ingeniaritza-enpresak argiteria publikoa eta hiri-aktiboak kudeatzeko konponbide bat sortu du. Civitra du izena, eta GMAO bat da, hots, udal eremurako espezializatutako ordenagailuak lagunduriko mantentze-lanak kudeatzeko softwarea.
Nobedade horrek Dinalan-ek ingeniaritzaren, software industrialaren eta kontrol-sistemen arloetan duen esperientzia joria du oinarri –izan ere, duela 30 urte baino gehiagotik jarduten du arlo haietan–, baita instalazioei buruz duen ezagutza ere. Enpresak argiteria publikoa kudeatzeko eredua aldatzeko beharrari erantzun dio, funtsezko azpiegitura baita hirien segurtasunean eta jasangarritasunean, digitalizazioan, informazioaren kontrolean, prebentziozko mantentze-lanetan eta energia aurrezpenean oinarritutako kudeaketa adimenduna lortzeko.
Civitra garatu izana berrikuntza-proiektu baten barruan kokatzen da, zeinean Dinalan-ek urtebete inguru inbertitu duen, beharrak eta merkatua aztertzen eta plataforma elementu bereizgarrietan oinarrituta sortzen diharduten bost pertsonako talde baten eskutik. “Gure balio proposamena da plataformak hiri-ikuspegi hutsa duela, etorkizuneko Smart City-ren ikuspegia: bateragarria da protokolo irekiekin, propioetara egokitu daiteke, eskalagarria da eta bezeroari datuen erabateko kontrola ematen dio”, adierazi du Josu Pereiro Dinalan-eko kudeatzaileak. Konponbidea badago martxan, eta emaitza ezin hobeak lortu ditu. Elektrizitatearen eta mantentze elektrikoaren sektoreko bezero baten beharretatik abiatuta, eta udal administrazioaren beharrak eta beste konponbide batzuk betetzen ez zituzten irizpideak aztertuta, benetako GMAO bat programatzeko prozesuari ekin zitzaion.
Dinalan-en proposamena hiri adimendunaren printzipioen arabera diseinatuta dago. Printzipio horiek arazoei aurrea hartzeko, baliabideak optimizatzeko eta erabakiak hartzeko funtsezko datuak emateko gai diren hiri-kudeaketako sistemak eskatzen dituzte. Gauzen Internetaren (IoT) sareen elkarreragingarritasun eta integrazioko beharrekin bat dator proposamena, eta udalerri bakoitzaren errealitatera egokitzeko behar den malgutasuna du.
Argiteria publikoaren ordenagailuak lagunduriko mantentze-lanen kudeaketa-sistema kudeaketan bilakaera izan nahi duten udalei, enpresa instalatzaileei, hiriko mantentze-lanetako enpresei, mantentze elektrikoan dihardutenei edo ingeniaritza-enpresei zuzenduta dago. Plataformak informazio, analisi eta prebentzio-plangintzari buruzko funtzionaltasunak barne hartzen ditu. Argiztapenaren, semaforoen, iturrien, ureztatze-sistemen, kameren, hiri-altzarien, garbiketaren eta beste aktibo batzuen egoerari buruzko ikusgaitasuna eskaintzen du, gailu guztiak informazio geografikoko mapetan (GIS) inbentariatuta. Halaber, aldizkako abisuak edo azterketak kudeatzeko, zereginak eta txostenak automatizatzeko eta mantentze-lanen ekintzak planifikatzeko aukera ematen du.
Informazio zentralizatu hori guztia edukitzearen eta haien egoera denbora errealean ezagutzearen onurak efizientzian eta jasangarritasunean neurtzen dira. Onura nagusiak hauek dira: instalazioen fidagarritasuna eta segurtasuna hobetzen direla, akatsei aurrea hartzen zaielako, eta energia gehiago aurrezten dela, badauden benetako beharretara egokitzen delako eta hainbat arazori, esaterako, argi-kutsadurari, aurre egiten zaielako.
Dinalan-ek sortutako konponbideak betekizun teknologiko handiak bildu ditu, eta prest dago hasieran garapenik eta inbertsiorik egin gabe erabiltzeko. Udalen eta enpresen beharretara egokitzen den erabileraren araberako ordainketa-eredu baten alde egin du. “Garapen-fasean, udalen nahiz enpresa emakidadunen beharrak izan ditugu gogoan; izan ere, haiek inplementatzen eta erabiltzen erraza den eta, hirugarrenen mende egon gabe, zuzeneko kudeaketa duen konponbide tekniko aurreratu baten balio erantsia nahi dute”, adierazi du Dinalan-eko kudeatzaileak.
Civitra-ren funtzionalitateak eta ezaugarriak ezagutarazteko, Dinalan-ek doako Demo bat prestatu du (hemen eskuragai: https://civitra.es), tresna sektorera hurbiltzeko modu gisa.
Garapen horren eskutik, Dinalan-ek aurrerapauso bat eman du dibertsifikatzeko estrategian, 1992an hasitako gaitasun bikainak eta ibilbide luzeak bermatutako konponbide teknologiko espezializatuak emateko asmoz. Hala bada, segmentuan presentzia nabarmenarekin kokatzea eta garapenaren jarraipena egitea ditu xede, erabiltzaileen beharrei lagunduta, bai enpresenei, bai administrazioenei, eta, horretarako, nobedadeak eta bertsio berriak txertatzen ditu, haiek hiri-aktiboen eta horietaz arduratzen diren langileen edo eraikinen kudeaketari dagokionez dituzten beharrei erantzuteko.
Dinalan-ek Laudion (Araba) du egoitza, eta 50 langile ditu. Software industrialaren esparruko ingeniaritza-enpresa ezaguna da, eta sektorean funtsezkoak diren enpresen babesa du. SIEMENSen industri konponbideen eta drive-en partner ziurtatua da, baita AVEVAren (garai bateko Wonderware-a) integratzaile ziurtatua ere.
