Aerobladeko langileen % 52 emakumezkoak dira dagoeneko
Aeroblade energia eolikoaren sektoreari zerbitzuen ingeniaritza eta soluzio teknologikoak eskaintzen dizkion enpresa da, Aernnova taldearen barruan dago integratuta eta langileen % 54 emakumezkoak ditu. SPRI Taldeak egindako Emakumeen inpaktua industriako lehiakortasunean azterketan enpresarik parekideenen artean kokatu dute. Berdintasunarekiko konpromisoak eta lan-ingurune jasangarriak sortzeko egindako lanak markatutako ibilbidearen barruan sartzen da aitortza hori.
Emakumeen presentziaren datuak industriako batezbestekoaren gainetik dauden arren eta tradizionalki maskulinizatuta egon diren sailetan genero-oreka duen arren, besteak beste Ingeniaritzan edo IKTetan, emakumeek profil teknikoetarako hautaketa-prozesuetan duten parte-hartze eskasa da Aerobladek identifikatutako erronketako bat.
Emaitza horiek ez dira kasualitatea. Oscar Loisek zuzendutako ingeniaritzako zuzendaritzak aktiboki sustatzen du taldeen parekidetasuna, tarteko arduradunen kasuan batik bat. Zuzendaritzako postuen kasuan, % 20 dira emakumezkoak, eta, ondorioz, “emakumeek erantzukizun-postuak hartzeko barne-sustapenerako neurriak” jarri dituzte martxan.
Barne-sustapeneko prozesuetan emakumeen talentua sartzeko apustua egiten du enpresak, betiere gaitasunean eta merituan oinarritutako irizpideen arabera. Horri dagokionez, kasu batzuetan emakumeek ordezkaritza txikia izan baldin badute hautagaitzetan, amaierako kontratazioetan presentzia orekatua bermatzea erabaki da.
Kontziliazioari dagokionez, ordutegiak eta lantokiak behar indibidualetara egokitu ahal izateko eredu malgua garatu da, telelanaren bitartez. Malgutasun hori asko erabiltzen dute langileek eta enpresa-filosofiari ez ezik, talentua fidelizatzeko estrategiari ere erantzuten dio, profil tekniko kualifikatuak lortzeko lehiakortasuna oso handia baita egun. Enpresak hauteman du neurri jakin batzuk gehiago erabiltzen dituztela emakumeek, adibidez, lanaldia murrizteko neurria; beraz, formula berriak aztertzen ari dira gizonen artean erabilera sustatzeko eta erantzunkidetasun erreala lortzeko.
Berriki jarri zuten martxan Berdintasun Plana, baina enpresak aitortu du lan-ildo askotan ibilbidea eginda zutela dagoeneko. Planaren berrikuspena egitea jardunbide egokiak finkatzeko eta hobetzeko arlo berriak hautemateko aukera ona da.
Aerobladek aurrerapausoak ematen jarraitzen du berdintasunarekiko konpromisoan, printzipio etikoa ez ezik, lehiakortasunerako eta industria-sektorean etengabe hobetzeko palanka ere badela uste baitu. AEROBLADEK ikerketa horretan parte hartzea B·WOMENIN Industry ekimenaren barruan kokatzen da, SPRI Taldeak bultzatuta, zeinak emakumeak euskal industrian duen rola ikusarazi eta bultzatu nahi baitu.
