InterGaiakek olatu jasangarria bultzatzen du bere surf-ohol ekologikoekin
Surfeko oholen osagai nagusiak poliuretanozko foam edo poliestireno hedatua, beira-zuntza eta epoxi erretxina dira. Biodegradagarritasun txikiko material sintetikoak dira, eta, gainera, manipulatzean osasunerako arriskuak sor ditzakete. InterGaiak aholkularitzatik eta ingeniaritzatik, “gure jardueretan ingurumen-inpaktuaren balorazioa integratzeko beharra ikusten dugu”, azaldu du Jokin Basozabal Moyua bazkide zuzendariak. Surfarekiko zaletasunak bultzatuta, paulowniako zurezko taulak garatu ditu, ingurumena gehiago errespetatzen duen alternatiba.
Produktu hau ekodiseinatzeko, Siemensen CAD NX Unigraphics lizentzia eskuratu zuen eta surf-oholak 3Dn marrazten hasi zen. Diseinuek egur arinetan (paulownia edo tokiko alamoa, adibidez) fabrikatzeko behar diren hutsuneak eta beheraguneak dituzte. Material horiek akabera naturala eta pisu egokia ematen diote taulari, bere funtzionaltasuna bermatzeko. “Alamozko eta lihozuntzezko lehen ohola egin dugu zenbakizko kontrol bidez (CNC), eredu erreplikagarria da”, dio bazkide zuzendariak.
Arabako enpresak surfeko hiru ohol eredu diseinatu ditu: 7’8” – 60 litroko taula hasiberrientzat; 7’– 53 litroko beste bat tarteko surflarientzat; eta 6’ – 33 litroko ohol labur bat maila aurreraturako. “Produktua 7 Olatu markaren bidez merkaturatuko da“, egiten du Jokin Basozabal Moyuak. Surf-oholak zein kotoi organikoko jantziak banatuko ditu.
Nahiz eta InterGaiakek, enpresa gisa, 2019tik jarduten duen, proiektu honek bi urte daramatza martxan. “SPRIren barne-ekintzailetzako Barnekintzaile programara aurkeztu ginen, BIC Arabaren bitartez, surf-ohol jasangarriak eta lotutako produktuak (Basque ecosurfing) sortzeko proiektuarekin”, adierazi du bazkide zuzendariak. Egitasmoak laguntza jaso zuen eta, garatu zen bitartean, 7 Olatu marka sortu eta lehen modelo bat egin zen. “Orain beste hiru ekoiztuko ditugu, eta, sinadurak aukera onak sortzen baditu, spin-off bat sortzea da asmoa. Fase horretan gaude: 7 Olaturen webgunea kaleratu eta bazkide eta/edo kolaboratzaileak bilatuko ditugu”.
InterGaiak enpresak erakunde pribatu eta publikoei laguntzen die ISO ziurtagirietan, eta barne-prozesuak eta erakundeetako bezeroekiko harremanak hobetzen ditu. Bestalde, ingeniaritzari lotutako proiektuak kudeatzeko zerbitzuak eskaintzen ditu. Bere funtzioak jasangarritasunaren 5 P-etan sailkatzen dira: People, Planet, Partnership, Prosperity, Peace [Pertsonak, Planeta, Partenariotza, Oparotasuna, Bakea].
Horrelako proiektuen bidez, InterGaiakek “erreferentziazko enpresa izan nahi du guztion onerako eta Garapen Jasangarriko Helburuak lortzeko proiektuak sortzeko, gauzatzeko eta lankidetzan aritzeko”, ondorioztatu du Jokin Basozabal Moyuak.
SPRI Taldeak laguntza integralaren bidez berrikuntza, ekintzailetza eta barne-ekintzailetza laguntzen ditu, ideiak merkatura modu arrakastatsuan irits daitezen. Aurrera, Basque Fondo, Bind 4.0, Ekintzaile edo Barnekintzailetza ekintzailetzarako laguntza-programen bidez egiten du hori.
