Teslec, azpiegitura kritikoak argitzen dituen kablerik gabeko berrikuntza
Teslec-en historia 2006an hasi zen, merkatuan hutsune teknologiko bat detektatu zenean. Enpresaren sortzaileak hainbat sektoretatik zetozen arren, ikuspegi komun bat partekatu zuten: argiztapen berritzaileko soluzio bat garatzea, ageriko kablerik eta konexio ahulik gabe. Horrela sortu ziren indukzio elektromagnetikoz elikatutako haririk gabeko lehen bonbillak, enpresak berak diseinatu eta patentatutakoak, eta “Espainiako hiri- eta industria-argiztapenean mugarri izan zirenak”.
Hasierak ez ziren errazak izan. Teknologia erabat berria merkaturatzea erronka garrantzitsua izan zen. Hala ere, produktuaren abantailekiko “iraunkortasunak, dedikazioak eta fedeak” proiektua sendotzea ahalbidetu zuten. Gaur egun, Teslec “argiztapenaren arloko eraginkortasunaren, iraunkortasunaren eta abangoardia teknologikoaren sinonimoa da”.
Haririk gabeko luminarien diseinuan, hornikuntzan, instalazioan eta mantentze-lanetan espezializatuta dago enpresa, hainbat aplikaziotarako: funtsezko azpiegituretarako (errepideak, portuak eta aireportuak, adibidez), hiri-altzarietarako, oinezkoentzako pasabideetarako, biribilguneetarako edo inpaktu handiko proiektu apaingarrietarako.
Luminariak muturreko egoerei aurre egiteko pentsatuta daude: euria, haizea, kolpeak, bibrazioak eta baita murgiltzea ere. Indukzio bidezko elikatze-sistemari esker, ez dute konexio elektriko tradizionalik behar, eta horrek erraztu egiten du instalazioa, hobetu egiten du mantentze-lanen eraginkortasuna eta handitu egiten du ekipoen balio-bizitza. Gainera, enpresak neurrira egindako argiztapen-proiektuak egiten ditu, eta, hala, irtenbide bakoitza inguruko behar tekniko eta estetikoetara egokitzen du.
Administrazio publikoa preskriptore nagusi gisa
Teslec-ek atzerrian presentzia puntuala izan badu ere, bere ekintza-eremu nagusia estatuko merkatua da, arreta berezia administrazio publikoetan jarriz. Teknologia horiek azpiegiturak modernizatzeko eta hobetzeko proiektuetan agintzen dute, batez ere bide-segurtasuneko eta energia-eraginkortasuneko politiken esparruan. Administrazioez gain, kontratu publikoak eta arkitektura- edo diseinu-estudioak dituzten enpresekin ere egiten du lan, eta enpresara jotzen dute proiektu bereziak garatzeko.
Proiektu enblematikoenetako bat Bizkaiko zenbait portutako argiztapena berritzea izan da, hala nola Eako, Elantxobeko eta Lekeitioko portuetakoa. Kresalaren, mareen, haizearen eta etengabeko hezetasunaren eraginpean dauden ingurune latz horietan, hango luminariek “fidagarritasun aparta” erakutsi dute, eta, horren ondorioz, Eusko Jaurlaritzako Portu eta Itsas Gaietako Zuzendaritzak teknologia hori preskribatu du bere esku-hartzeetan.
Sei pertsonako lantaldearekin, hazkunde-tasa “oso nabarmenak” lortu ditu azken urteetan: urtean % 20 eta % 30 artean, eta ekitaldi honetan fakturazioa bikoiztea aurreikusten da. Etengabeko progresio horrek “bere teknologiaren balio erantsia” erakusten du: zenbat eta instalazio gehiago egin, orduan eta handiagoa da produktuaren aintzatespena eta eskaria.
Gaur egun, hedapen betean dago, eta erronka berriei baikortasunez egiten die aurre. Hurrengo helburuen artean, autobideetarako balizaje-argi espezifikoak garatzea dago, hiri- eta udal-ingurunetik harago zabalduz.
Garatzen ari den beste proiektu bat uholdeekiko erresistenteak diren argiztapen-sistemak sortzea da, bereziki ekaitz-tankeak bezalako esparruetarako diseinatuak, non ur-metaketak ohiko soluzioak baliogabetzen dituen. Teslec lanean ari da urpean geratzeko egoeretan ere lan egiteko gai den luminaria sorta batean, azpiegitura kritikoetarako irtenbide eraginkor eta segurua eskainiz.
Euskal enpresen artean berrikuntza bultzatzeko, enpresa txiki eta ertainetatik konpainia handietaraino, SPRI Taldeak Hazinnova, BDHI Konexio edo Innobideak bezalako berrikuntzarako programak eta laguntzak ditu.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
