SUA Solutions-en berrikuntza adimendunak etxeko suteen aurkako segurtasuna sustatzen du
SUA Solutions-ek etxeko sua itzaltzeko ziurtatutako lehen irtenbide adimenduna garatu du, sei segundo eskasean etxeko benetako su bat detektatzeko eta itzaltzeko gai dena. Enkar Méndez Albarrán SUA Solutions-eko CEO eta fundatzailekideak gogorarazi duenez, Bizkaiko enpresak oso-osorik sortutako berrikuntza aitzindari hau “hiru urte baino gehiagoko lanaren, mila saiakuntza baino gehiagoren eta Metalúrgica Marinaren lankidetzaren emaitza” izan da.
SUA Kitchen sistema ikerketa-, diseinu- eta baliozkotze-prozesu luze baten emaitza da, eta SGSren ziurtagiriarekin nabarmentzen dena, kalitate-kontrolean eta -egiaztapenean nazioarteko erreferentzia den erakundea. Ziurtagiri honek egiaztatzen du gailuak segurtasun- eta fidagarritasun-estandarrik handienak betetzen dituela etxe-inguruneetan. Eta SUA Solutions “etxeko sukaldeetarako itzaltze-soluzio ziurtatua garatzen duen Europako lehen enpresa gisa” kokatzen du, azpimarratu du euskal konpainiako ordezkariak.
SUA Kitchen-ek sua itzaltzen du segundotan, modu adimentsu eta autonomoan. “Bere teknologia gai da sute erreal bat eguneroko egoeretatik bereizteko, hala nola, flanbeatua edo zartagin bero-bero baten kea, alarma faltsuak saihestuz eta beharrezkoa denean soilik jardunez”, aitortu du. Gainera, sistemak berehala abisatzen du erabiltzailearen telefono mugikorrera, enpresak garatutako aplikazio baten bidez.
Tamaina txikia eta integrazio maximoa
Azken bertsioan, sistemak gailuaren tamaina nabarmen murriztea lortu du, “eta, horri esker, erabat diskretuki integra daiteke ke-kanpaian edo sukaldeko armairu batean”, adierazi du Méndez Albarránek. Aurrerapen honek estetika eta erosotasuna hobetzen ditu, “eta edozein etxebizitzatan instalatzeko aukerak zabaltzen ditu, obrarik eta konplikaziorik gabe”, nabarmendu du. Gainera, modelo berriaren alderdi nabarmenetako bat da ez duela WiFi konexiorik, entxuferik ezta instalazio elektrikorik behar.
Garapen- eta baliozkotze-fasea arrakastaz gainditu ondoren, SUA Solutions presatzen ari da “aseguru-etxe nazional baten eskutik merkaturatzeko, teknologia hau Espainiako milaka etxetara hurbiltzeko”, adierazi du zuzendari nagusiak.
Euskal enpresaren helburua “suteen aurkako segurtasuna etxe guztietara eramatea da, batez ere mendeko pertsonekin, irtenbide erraz eta oso eraginkorrekin”, azpimarratu du Enkar Mendezek.
Euskal enpresen artean berrikuntza bultzatzeko, enpresa txiki eta ertainetatik konpainia handietaraino, SPRI Taldeak Hazinnova, BDHI Konexio edo Innobideak bezalako berrikuntzarako programak eta laguntzak ditu.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
