Olatu Berdea Mobility: datuak eta adimen artifiziala, lantokirako mugikortasuna kudeatzeko modu berri baten zerbitzura
Goizero, milaka lagunek keinu bera errepikatzen dute, ia pentsatu gabe: lanera joateko autoa hartzea. Hain barneratuta dagoen ohitura da, gutxitan jartzen da zalantzan, nahiz eta eragin zuzena izan kliman, trafikoan… eta gure ongizatean bertan. Garraioa da emisioak behar den erritmoan murriztu gabe jarraitzen duen sektore bakanetako bat, eta arazo horren zati handi bat lanera egunero egiten diren joan-etorrietan dago; izan ere, esparru hori ez da asko kudeatu ikuspegi estrategiko batetik.
Hor sartzen da jokoan Olatu Berdea Mobility. Egoitza Donostian duen kooperatiba honek pertsonak lantokira joateko modua aldatzeko lan egiten du, enpresei eta enpresa-taldeei lagunduz Lantokirako Mugikortasun Jasangarriko Planak diseinatzen, gauzatzen eta haien segimendua egiten. Helburua ez da soilik emisioak murriztea, baizik eta langileen bizi-kalitatea hobetzea eta erakundeen lehiakortasuna indartzea.
Berlindik Euskadira: ideiaren jatorria
Enpresa sortu zuen ideia, Mondragon Unibertsitateko LEINN graduko lehen urtean hasi zen gauzatzen, Berlinen egindako egonaldi baten ondorioz. Han, sortzaileek oso bestelako errealitate bat bizi izan zuten: hirian zehar modu jasangarrian mugitzea posible ez ezik, erraza eta erakargarria ere bazen. Esperientzia horrek galdera saihestezin bat piztu zuen: zergatik gure hiri eta herrietan ez da berdin erraza modu jasangarrian mugitzea, batez ere lanera joateko?
Hortik aurrera, lurraldeko mugikortasun-ohiturei buruzko ikerketa-prozesu bati ekin zioten, Donostiako eta Irungo udalekin lankidetzan, eta herritarrei hurbiletik entzuteko aukera eman zieten azterketak egin zituzten. Ibilbide horrek arazo argi bat identifikatzen lagundu zuen: lanerako mugikortasuna oso gutxitan kudeatzen da modu estrategikoan, nahiz eta ingurumenean eta gizartean eragin handia izan. Denborarekin, hausnarketa hori enpresa-proiektu bihurtu zen, eta Olatu Berdea Mobility sortu zen, pasaden urtean.
Kooperatibaren sorrerak, halaber, araudiaren eta enpresen errealitatearen arteko arrakala oso zehatz bati erantzuten dio. Erakunde askok Lanerako Mugikortasun Plana izan behar badute ere, praktikan, plan horiek administrazio-izapide hutsean geratzen dira. Denbora, ezagutza eta baliabideak falta dira, benetako aldaketak sortuko dituzten tresna erabilgarri bihurtzeko. Hutsune hori betetzeko sortu zen, hain zuzen, enpresa, eta laguntza integrala eskaintzen du, hasierako azterketatik, neurrien ezarpen, jarraipen eta etengabeko hobekuntzaraino.
Bere proposamena datuen erabileran eta adimen artifizialean oinarritzen da. OBM Next tresnaren bidez, langileen joan-etorriak aztertzen dituzte, mugikortasun-ereduak identifikatzen dituzte eta hobekuntza-egoerak simulatzen dituzte. Horri esker, enpresa edo lurralde bakoitzaren benetako beharretara egokitutako irtenbideak diseina daitezke. Ikuspegi hori osatzeko, neurriak ezartzen laguntzen da, eta jarraipen zehatza egiten da, emaitza neurgarriak eta denboran iraunkorrak ziurtatzeko.
Olatu Berdea Mobilityk 100 langile baino gehiagoko enpresekin egiten du lan, araudiak Lanerako Mugikortasun Plana izatera behartzen dituenekin, bai eta enpresa txiki eta ertainekin ere, zeinek, taldekatze-formulen bidez, banaka bideragarriak ez diren irtenbideak lor ditzaketen. Lurralde-ikuspegi horrek, gainera, aukera ematen du kostuak murrizteko eta ezarritako neurrien eraginkortasuna handitzeko.
Gaur egun, Gipuzkoan kontzentratzen da bere jarduera, eta hainbat proiektutan parte hartzen du, mankomunitateekin eta tokiko erakundeekin batera; esate baterako, Oiartzungo lau industrialdetan garatu den proiektuan, non 3.000 langile inguru biltzen diren. City Science Lab Gipuzkoa laborategiarekin ere kolaboratzen du, Bostongo MIT Media Lab-ek Gipuzkoako Foru Aldundiarekin eta MUBILekin batera sustatutako hiri-ikerketako laborategiarekin.
Hiru bazkidek osatutako talde batekin eta BIC Gipuzkoaren Txekintek Ekintzaile programaren babesarekin, Olatu Berdea Mobilityk etorkizunari aurre egingo dio bere eredua Gipuzkoan finkatzeko, Euskadiko gainerako lurraldeetara hedatzeko eta, pixkanaka, beste lurralde batzuetara hedatzeko.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
