Kalmanek makineriaren arriskuetatik babesten duten karenatuak egiten ditu
Kalman karenatuek “pertsonak babesten dituzte makineriaren arriskuen aurrean”, dio Aitor Diaz Martinez Kalmaneko gerenteak. Euskal enpresak duela mende erdi baino gehiago hasi zen karenatuak eta neurrira egindako egitura metalikoak diseinatzen eta fabrikatzen, ebakitze, toleste, soldadura eta pintura bidez.
Gaur egun, enpresa gipuzkoarra “karenatuen pertsonalizazioa indartzen ari da, gure instalazioetan muntatuz, plug and play kontzeptura hurbilduz eta bezeroarentzako integrazio-denbora murriztuz”, nabarmendu du konpainiaren ordezkariak.
Gainera, Kalman balio erantsia ematen zentratzen da, lehen bezeroak muntatzen zituen osagai komertzial karenadunetan integratzen baitu. “Horrela, produktu osatuagoa ematen dugu, mihiztatzeko prest dagoena, integrazio denborak eta kostuak murriztuz”, azpimarratu du Díaz Martínezek.
Makina-erremintaren sektorean zentratuta
Euskal enpresak makina-erremintaren sektorerako egiten du lan nagusiki, “baina automatizazio, energia eta ekipo-ondasunen enpresekin ere elkarlanean aritzen gara”, zehaztu du. Batez ere merkatu nazionalean jarduten duen arren, “nazioarteko bezeroekin ere lan egiten dugu, eta sektore berrietara irekita gaude gure ekoizpen-gaitasunarekin eta gure plan estrategikoarekin bat badatoz”, adierazi du gerenteak.
Gaur egun, 45 langile ditu Kalmanek, eta urtean bost milioi euro inguru fakturatzen ditu.
Etorkizunera begira, bere helburu nagusia “bikaintasun operazional jasangarria lortzea, entrega denbora murriztea gure bezeroekin zuzeneko lankidetzan eta bazkide estrategiko gisa jardutea”, zehaztu du Aitor Díazek.
Euskal enpresen artean berrikuntza bultzatzeko, enpresa txiki eta ertainetatik konpainia handietaraino, SPRI Taldeak Hazinnova, BDHI Konexio edo Innobideak bezalako berrikuntzarako programak eta laguntzak ditu.
SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.
