Elursa, doitasunezko mekanizazioan espezializatutako ETEa
Elursa Bergarako ETEa da eta 17 urte daramatza doitasunezko mekanizazioan espezializatuta. Orain, automobilgintzan zentratutako negozioa dibertsifikatu nahi du enpresaren etorkizuna bermatzeko.
Enpresa 2008an sortu zen “ekintzaile izateko nahitik. Mekanizazio-tailer batean egiten nuen lan eta esperientzia dezente lortu nuen. Merkatuaren azterketa egin nuen eta [Bergarako] Miguel Altuna ikastetxera joan nintzen”, azaldu du Daniel Fernández González jabe eta zuzendari kudeatzaileak.
Hasierako faseak lau hilabete iraun zituen eta, gero, Bergarako lokal txiki batera joan zen. “Ondoren beste bi nabe izan nituen Bergaran, 2015ean egungo lekura iritsi arte”.
Elursak estanpaziorako eta doitasunezko mekanizaziorako tresnak fabrikatu ditu hasieratik. “Mota guztietako piezen serie laburrak, trokelgintza, erremintak eta makinentzako osagarriak egiten ditugu”. Eskarien % 80 automobilentzat eta makina berezi eta hidraulikoentzat izaten dira. “Orain, defentsarekin hasiko gara”.
Enpresak lan espezializatuagoa egiten du, “bost ardatzeko makinak erabiltzen ditugu moldakortasun handiagoa emateko. Eta tenplatutako materialekin egiten dugu lan, gehiengoek ez baitute egiten”. Elursa beroko estanpazioan dago espezializatuta, “errazagoa delako eta pieza handiagoei zuzenduta dagoelako”.
Sei langile dira guztira eta urteko fakturazioa milioi bat euro ingurukoa da. Salmenta gehienak Euskadin kontzentratzen ditu. “Orain, Europako plataforma batekin ari gara lanean eta bezeroak jartzen dizkigu planoak eta guk pieza eskaintzen diogu”.
I+Gren arloan, 2019an CDTIrekin (enpresen berrikuntza eta garapen teknologikoa sustatzen duen estatuko agentzia) eta Tecnaliarekin egindako proiektua nabarmentzen da, piezen iraunkortasuna hirukoizteko aukera eman baitu. 2019ko Metal Siglo XXI Saria irabazi zuen horri esker urte horretan Madrilen.
Etorkizuneko erronken barruan, merkatuak dibertsifikatuko ditu, “automobilen sektorean dauden arazoak direla eta” Elursaren etorkizuna bermatzeko. “Gauzak aldatu ezean, automobilgintzan zentratutako enpresak desagertzera kondenatuta daude”. Horrez gain, egungo makinak puntako makinekin ordezkatzea ere planteatu dute; izan ere, “gauza asko egin ditzakegu, baina ez dute puntako teknologiarik”.
Gainera, laneko giro ona eskaini nahi diete langileei, “etekinak banatuz, pertsonen konpromisoa lortzeko”. Enpresak nabarmendu du aurten bere bezero nagusiak hartzekodunen konkurtsoa izan duen arren, “ekitaldia kontu orekatuekin ixtea” lortuko dutela.
SPRI Taldeak bere kanaletan euskal enpresei beren jardueraren berri emateko aukera eskaintzen die Zure proiektua gure gaiekin (I+G+b arloa, digitalizazioa, nazioartekotzea, ekintzailetza, berrikuntza…) lotuta badago, Zutaz mintzo gara ekimenean parte har dezakezu.
