Asier Aguirrebeña (Alfa MIMtech): “MIM teknologiak aukera ematen digu prestazio handiko pieza konplexuetan berrikuntzak egiteko”
Alfa MIMtech 2004an sortu zen, Eibarren, eta MIM (Metal Injection Moulding) teknologian espezializatu da. Prozesu berritzaile honi esker, 30 langile izatera iritsi da empresa, eta zeharkako emplegua sortu du inguruko empresetan beste berrogeita hamar pertsona baino gehiagorentzat.
“Fabrikazio-modu berria eta oso lehiakorra eskaintzen dugu, beste teknika batzuekin alderatuta. MIMarekin geometria oso konplexuak sor ditzakegu, tamaina txikikoak, zehaztasun handikoak eta ezaugarri mekaniko bikainak”, azaldu du Asier Aguirrebeña konpainiako zuzendari nagusiak.
Balio diferentziala ez dago teknologian bakarrik, baita hura aplikatzeko moduan ere. “Instalazioa ahalik eta malguena izateko eta gure bezeroen etengabeko aldaketetara egokitzeko diseinatu dugu. Gainera, giltza eskura soluzioak eskain ditzakegu, piezaren diseinutik hasi eta azken entregaraino, muntaketak edo aurre-muntaketak barne. Inguruko industria-aberastasunari esker, prozesu osoa bete dezakegu”, azpimarratu du Agirrebeñak.
Azken urtean, Alfa MIMtechek ekintzailetza teknologiko eta berritzailea aitortzen duen Toribio Echevarria sarietako bat jaso du, Aguirrebeñak modu berezian baloratzen duen saria: “Sariak ilusio berezia egin zigun, erakutsi zigulako Eibarko herria harro dagoela eskualdeko industriari laguntzen hemen egoteaz, industria mailan dezente sufritzen ari baita. Izugarrizko energia eman zigun bide hau jarraitzeko”.
Etorkizunari begira, Alfa MIMtech pertsonen iraunkortasunari eta ongizateari lotutako berrikuntza-proiektuetan ari da lanean. “Karbono-aztarnaren neurketa murrizteko neurriak sustatzen ari gara, eta material arinagoak edo prestazio handikoak bilatzen, etorkizuneko industriaren beharrei aurrea hartzeko. Eta ongizatea ardatz duen kudeaketa ereduan sinesten dugu: talde motibatuak eta konprometituak baditugu, onura denontzat da”, amaitu du.
Euskal enpresen artean berrikuntza bultzatzeko, enpresa txiki eta ertainetatik konpainia handietaraino, SPRI Taldeak Hazinnova, BDHI Konexio edo Innobideak bezalako berrikuntzarako programak eta laguntzak ditu.
