Jon Kepa Gerrikagoitia (BRTA): “AA sortzailea ezartzea ez da erronka teknologikoa, baizik eta antolakuntzakoa”

Adimen artifizial sortzaileak gero eta interes handiagoa pizten du enpresa-ehunean, baina aplikazio praktikoari buruzko zalantzak ere sortzen ditu. Kontzeptuak argitzeko eta erakundeentzat tresna erabilgarriak eskaintzeko asmoz, Basque Research & Technology Alliance (BRTA) erakundeak “Enpresan berritzeko AA sortzailea: kasu errealak, tresnak eta inplementazioa” ikastaroa antolatu zuen Donostiako Miramar jauregian, EHUren udako ikastaroen esparruan. 

“Helburu nagusia izan da AA sortzailearen egungo unea testuinguruan jartzea, eskura dauden tresnak ezagutzea eta erakundeetan benetan erabiltzen diren kasuak aurkeztea”, azaldu du Jon Kepa Gerrikagoitiak, BRTAko arduradun zientifiko-teknologikoak. “Gure asmoa zen erakundeek uler zezatela nola lagundu dezakeen teknologia horrek beren berrikuntza-prozesuetan eta beren enpresen produktibitatean”. 

Gerrikagoitiak azaldu duenez, IA sortzailea hartzeak teknologiaz gaindiko ikuspegia eskatzen du. “Oztopo handienak ez daude tresnetan, pertsonetan baizik. Beharrezkoa da gerentziak eta zuzendaritzak teknologia horien balioa ulertzea eta langileek prestakuntza egokia jasotzea”, nabarmendu du. 

Datuen subiranotasuna, trazabilitatea eta pribatutasuna dira beste puntu gakoetako batzuk. “Kontua ez da soilik hornitzaile global handien artean aukeratzea, baizik eta eredu irekiak eta erakunde bakoitzera egokituak baloratzea. Ezin dugu pentsatu Adimen Artifizial sortzailea arazo guztientzako tresna baliagarria denik; metodologia argiak aplikatu behar dira, eta ulertu behar da zer irtenbide egokitzen diren benetan gure beharretara”, gaineratu du. 

Alde horretatik, BRTA osatzen duten zentroek funtsezko zeregina dute enpresa-sareari laguntzeko. “50 urte baino gehiago daramatzagu energiaren, osasunaren, mugikortasunaren edo elikaduraren esparruetako industriaren arazoak konpontzen. Gainera, digitalizazioan gaitasun handia duten zentroak ditugu, hala nola Tecnalia, Vicomtech edo Ikerlan, eta, horiei esker, egunean gaude AA sortzailearen artearen egoeran. Tresnak ezagutzen ditugu eta badakigu non aplikatu”, dio. 

Erronkei eta aukerei dagokienez, Gerrikagoitiak azpimarratzen du gakoa antolamenduaren ikuspegian dagoela. “Kontua ez da hasiera-hasieratik asmo handiko prozesuei heltzea, baizik eta pixkanaka aurrera egitea, konfiantza sortuko duten eta teknologia horiek pixkanaka ezartzen lagunduko duten arrakasta txikiak bilatuz”. 

SPRI Taldeak enpresei laguntzen die 2024ko Adimen Artifizial Aplikatua eta Datuaren Estrategia laguntza-programaren bidez. Programa horrek Euskal Autonomia Erkidegoko konpainietan AAren erabileran oinarritutako proiektuak babesten ditu, frogapen-efektua dutenak eta Euskadin teknologia horren eskaintza eta eskaria aktibatzea ahalbidetzen dutenak, enpresei lehiakortasuna handitzeko tresnak emateko helburuarekin.