Data-ka benetako prozesuei aplikatutako adimen artifizialaren bidezko eraldaketa adimentsuan zentratzen da

Data-ka azken hamarkadan erakundeen benetako beharrei erantzuten dieten soluzio teknologiko aurreratuen garapenean espezializatutako enpresa gisa sendotu da. 2016an Donostian sortu zenetik, konpainiak analisia, diseinu estrategikoa eta adimen artifiziala uztartzen ditu enpresei eta erakundeei prozesu konplexuak optimizatzen laguntzeko.

Esperientzia hori SPRI Taldearen BIND 2025 programaren azken edizioan erakutsi ahal izan du; berrikuntza irekiko ekimen giltzarria da programa hori, startup teknologikoak enpresa traktore handiekin konektatzen dituena. Horrela, konpainiak bere teknologia baliozkotu ahal izan du, bere soluzioen aplikagarritasuna eta prozesu kritikoetan eragin erreala sortzeko duen gaitasuna frogatuz. Hori guztia KIDE izeneko ekosistema modularrari esker egin du: oinarri teknologiko propioa duen, berrerabilgarria eta eskalagarria den eta soluzioak erakunde bakoitzera modu arinean egokitzeko diseinatuta dagoen lan-esparrua. “Teknologiak ez luke enpresen lana zaildu behar, baizik eta denbora askatu, pertsonek benetan balioa ematen duen horretan zentratu ahal izateko”, adierazi du Iñaki Hernáez Data-kako salmenta eta negozio garapeneko zuzendariak.

Horrela, BIND 2025ean parte hartzearen helburua tradizionalki astuna eta sakabanatua den prozesu bat egituratua, ordenatua eta eraginkorra bihur daitekeela erakustea izan da, betiere trazabilitatea eta giza kontrola mantenduz.

Horretarako, Data-kak plegu luzeak interpretatzeko, eskakizun nagusiak erauzteko eta funtsezko atalak identifikatzeko sistema bat garatu du, ondoren giza taldeak balioztatzen dituen zirriborro koherenteak sortzeko. “Onurak argiak dira: denbora libre gehiago, errore gutxiago, trazabilitate handiagoa, erabaki informatuak, jarraitutasun operatiboa eta digitalizazio progresibo, errealista eta erakunde bakoitzera egokitua”, azaldu du Hernáezek.

Konpainiaren balio-proposamena beti adimen artifizialaren eta sistema aurreratuen automatizazioaren aldeko apustuan oinarritu da, erakundeen eraginkortasuna hobetzeko, akatsak murrizteko eta erabakiak hartzea errazteko tresna gisa.

Testuinguru horretan, Donostiako enpresa Hizkuntza Naturalaren Prozesamenduan (HNP) zentratu da; teknologia horri esker, sistema batek testuak profesional batek egingo lukeen bezala irakurri, interpretatu eta landu ditzake. Aurrerapen horrek eskuzko lanak automatizatzeko aukera ematen du, nahiz eta Data-kako salmenta eta negozio garapeneko zuzendariaren arabera, “ez duen giza esperientzia ordezkatzen”. “Adimen artifiziala aliatua da prozesuak bizkortzeko eta erabakiak errazteko, baina beti behar ditu giza irizpidea, politika argiak eta enpresa bakoitzaren lan egiteko moduarekin koherentzia”, azaldu du Hernáezek.

Horretarako, konpainiak oso sektore desberdinetako erakundeekin egiten du lan, hala nola manufaktura-industrian, zerbitzu profesionaletan, administrazio publikoan edo zentro teknologikoetan, besteak beste. Gainera, sektorearen abangoardian egoteko, Data-kak lankidetza-ekosistema bat sortu du, unibertsitateak, klusterrak eta berrikuntza-programak barne hartzen dituena.

Gaur egun, konpainiak produktu bertikal propioak garatzen jarraitzen du eta industrian, turismoan, zerbitzu publikoetan eta mantentze-lanetan aplikatutako adimen artifizialeko agenteak sustatzen ditu. Etorkizunari begira, Data-kak Europara eta Estatu Batuetara jauzi egitea aurreikusten du; izan ere, dagoeneko hainbat proiektu ditu martxan nazioarteko multinazional batzuekin.

SPRI Taldeak enpresei laguntzen die 2024ko Adimen Artifizial Aplikatua eta Datuaren Estrategia laguntza-programaren bidez. Programa horrek Euskal Autonomia Erkidegoko konpainietan AAren erabileran oinarritutako proiektuak babesten ditu, frogapen-efektua dutenak eta Euskadin teknologia horren eskaintza eta eskaria aktibatzea ahalbidetzen dutenak, enpresei lehiakortasuna handitzeko tresnak emateko helburuarekin.

SPRI Taldeak aukera ematen die euskal enpresei haien jardueraren berri emateko bere informazio-kanaletan. Zure proiektua gure gaiekin lotuta badago (I+G+b, digitalizazioa, internazionalizazioa, ekintzailetza, berrikuntza…), Zutaz mintzo gara ekimenean parte har dezakezu.