Euskadik Espainiako enpresa lider garrantzitsuenak bilduko ditu CEDE Fundazioko Zuzendaritza-karguen XXI. Kongresuan
- Zuzendaritza-karguen XXI. Kongresua irailaren 29an egingo da Bilbao Exhibition Centre-n
- Topaketaren formatua EITBk ekoitzitako telebista programa bat izango da, eta streaming bidez transmitituko da
CEDE-Confederación Española de Directivos y Ejecutivos Fundazioak Zuzendaritza-karguen XXI. Kongresua aurkeztu du, zeina irailaren 29an egingo den Bilbao Exhibition Centre-n eta streaming bidez jarraitu ahal izango den esteka honetan: www.congresodirectivos.com/congreso/inscripcion
“Zuzendaria mundu berri baterako trantsizioaren aurrean” lelopean, topaketa honek hainbat zuzendaritza-kargu eta enpresari elkartuko ditu egungo egoera nahiz etorkizuna aztertzeko, eta hainbat giltzarri emango dira Espainiako enpresak sendotu eta bultzatzeko.
Zuzendaritza-karguen CEDE Kongresua huts egin ezinezko hitzordu bilakatu da zuzendaritza-kargu eta exekutiboentzat, erreferentziazko ekitaldi bihurtu delarik Espainiako enpresari garrantzitsuenentzat. Gainera, aurtengo edizioa mugarri esanguratsua da erakundearentzat, CEDEren 25. urteurrenaren ospakizunaren barruan kokatzen baita.
Unai Rementeria Bizkaiko ahaldun nagusiak eta Amaia Gorostiza Kongresuaren Antolakuntza Batzordeko presidenteak inauguratuko dute ekitaldia irailaren 29an (osteguna).
Horiez gain, bertan izango dira enpresa munduko lider aski ezagun batzuk ere, hala nola hauek: Isidro Fainé, CEDE Fundazioko eta “la Caixa” Fundazioko presidentea; José María Álvarez-Pallete, Telefónica-ko presidente exekutiboa; Shlomo Ben Ami, Bakearen aldeko Toledoko Nazioarteko Zentroko presidenteordea; José Luis Bonet, Espainiako Merkataritza Ganberako presidentea; Antonio Brufau, Repsol-eko presidentea; Juanjo Cano, KPMGko presidentea; Ángeles Delgado, Fujitsu-ko presidentea; Almudena Eizaguirre, Deusto Business School-eko katedraduna eta zuzendaria; Héctor Flórez, Deloitte-ko presidentea; Antonio Garamendi, Enpresa Erakundeen Espainiako Konfederazioko (CEOE) presidentea; Antonio Garrigues, CEDEko Senatuko presidentea; José Ignacio Goirigolzarri, CaixaBank-eko presidentea; Pablo Hernández de Cos, Espainiako Bankuko gobernadorea; Ane Insausti, MUBILeko zuzendari nagusia; Juan José López Burniol, “La Caixa” Fundazioko presidenteordea; Francisco Reynés, Naturgy-ko presidente exekutiboa; Josep Sánchez Llibre, Conservas Dani enpresako presidenteordea; Jordi Sevilla, Administrazio Publikoetako ministro ohia; Ángel Simón, Agbar-eko presidentea; Iñigo Ucín, Mondragon Korporazioko presidentea; eta Gregorio Villalabeitia, Kutxabank-eko presidentea.
Ekitaldian izango da baita ere Larry Fink, BlackRock enpresako presidente eta zuzendari nagusia, zeinak hizpide hartuko baitu stakeholder-en kapitalismoa akziodunentzat balioa sortu eta mantentzeko sistema gisa.
Zuzendaritza-karguen XXI. Kongresu honetako eztabaidek aztergai izango dituzte Espainiako egungo zein etorkizuneko enpresa-sarearentzat oso garrantzitsuak diren hainbat gai: Geopolitika lehentasun gisa; Desparekotasuna eta itun soziala; Finantza erakundeen etorkizuna; Industria garapen ekonomikoaren motor gisa; Espainiako ekonomiaren eraldaketak dakartzan erronkak; eta Trantsizio energetikoaren mitoak eta errealitateak.
Aurkezpen ekitaldian parte hartu dute CEDE Fundazioko presidenteorde Ramón Adellek, ekitaldiaren Antolakuntza Batzordeko presidente Amaia Gorostizak eta ADYPEko (Euskadiko Zuzendari eta Profesionalen Elkartea) presidente José María Vázquez Eguskizak.
Amaia Gorostizak azpimarratu du Kongresu hau biziki garrantzitsua dela egungo egoera geopolitikoa aztertzeko, bai eta jakiteko zein paper duten konpainiek, “enpresak balioa sortu behar baitu epe luzera. Eta Bilbon gaudelarik, ezin dugu ahaztu pandemia garaian bereziki kaltetua izan den sektore industriala”.
Ramón Adellek adierazi duenez, “CEDEren xedea da topagune bihurtzea zuzendaritza-karguei objektibotasunez eta errealismoz diagnostikatzen laguntzeko, asmoa baita erabaki onenak har ditzatela etengabeko ziurgabetasunak markatutako ingurune batean”.
Bestalde, José María Vázquez Eguskizak nabarmendu du Kongresu hau oso baliagarria izango dela bizi dugun egoera nahasi eta aldakor honetan.
“Talento en Crecimiento” programaren beste edizio bat
Gazteen ahalegina balioan jartzeko asmoz, CEDE Fundazioko Zuzendaritza-karguen XXI. Kongresuak “Talento en Crecimiento” programaren edizio berri bat ostatatuko du. Gazteek aukera izango dute elkarreragin- eta ikaskuntza-espazio ireki eta sortzaile batean parte hartzeko, non arlo desberdinetako aditu profesionalek euren ideiak, ikaskuntzak eta lanabesak partekatuko baitituzte euren bidea hasten ari diren gazteei laguntzeko. Jardunaldia irailaren 29an egingo da, goizez, Kongresua egingo den espazio berean.
Erakundeen eta enpresen babes zabala duen Kongresua
Zuzendaritza-karguen Kongresuak eta “Talento en Crecimiento” jardunaldiak hainbat erakunderen babesa dute, besteak beste, Eusko Jaurlaritzarena, Bizkaiko Foru Aldundiarena eta Bilboko Udalarena.
Horiez gain, kongresuak babesletzat izango ditu Agbar, CaixaBank, Deloitte, KPMG, Naturgy, Petronor eta Telefónica, eta Cellnex, EITB eta Mercer erakundeen laguntza ere jasoko du.
Bestalde, hauek dira graduatu gazte eta ikasleentzako “Talento en Crecimiento” jardunaldiaren babesleak: “la Caixa” Fundazioa, Aquarbe, Espainiako Merkataritza Ganbera, Imagin eta Europar Batasuneko Gizarte Funts Europarra. Eta hauek laguntzaileak: Agbar, Deloitte, Bertelsmann Fndazioa eta FPdGi (Princesa de Girona Fundazioa).
Kasu honetan ere, ekitaldiak telebista programa baten formatua izango du, eta aurtengo edizioan EITBk ekoitziko du. Espainiako zuzendaritza-kargu guztiek aukera izan dezaten Kongresua ikusteko, streaming bidez ere transmitituko da.
CEDE – Confederación Española de Directivos y Ejecutivos Fundazioari buruz
Isidro Fainék zuzentzen duen CEDE Fundazioak bere baitan biltzen ditu 157.000tik gora zuzendaritza-kargu ordezkatzen dituzten 37 elkarte. Bere helburua da zuzendaritza-karguekin batera lan egitea kudeaketako esperientziak eta teknikak kudeatzeko eta, hartara, euren enpresei eta Espainiako ekonomiari aurrera egiten laguntzeko.
Lotutako albisteak
ETEentzako produktuen eta prozesuen berrikuntza babesten dugu Hazinnovarekin
Hazinnova euskal ETE-ei doako aholkularitza eskaintzen dien programa da, produktu eta prozesuetan berrikuntza-mikroproiektuak bultza ditzaten. Eska ezazu 2025eko maitzaren 6tik urriaren 29ra.
ESGI 188 (European Study Group with Industry) Bilbon izango da 2025eko maiatzaren 26tik 30era
Enpresek problema matematikoak aurkezten dituzte azterketa-taldeak konpon ditzan, askotan modelizazio edo optimizazio moduan.
Kontsulta irekia: Spri Taldearen laneko prebentzio-zerbitzuak definitzeko zure aukera
Sprik merkatuko aurretiazko kontsulta jarri du abian, lan-arriskuen prebentzioaren eta osasunaren zaintzaren sektorearen benetako beharretara egokitutako lizitazioa diseinatzeko. Horren bidez, operadore ekonomikoen ekarpenak bildu nahi dira, kontratazio-prozesu lehiakor, garden eta merkatuko jardunbide egokienekin lerrokatua egituratzeko.
Sustatu berrikuntza-proiektuak zure enpresan Fast Track Innobideak ekimenarekin
Fast Track Innobideak Euskadiko enpresa berritzaileen kopurua handitzeko eta sustatzeko sortu zen. Merkatuan ondasun edo zerbitzu berriak sartu dituzten edo enpresan negozio-prozesuak hobetzen dituzten berrikuntza-jarduerak babesten ditu, enpresa lehiakorrago bihurtzeko.
NudgeXperience Bilbon: CX eta Portaera Zientzien ekitaldia
Zuzendariei eta gerenteei, Cx-eko arduradunei eta berrikuntza eta marketineko profesionalei zuzendua
Innobideak Prestakuntza prestatu zure lantaldea balioan lehiatzeko eta ez prezioan
Euskadiko ETEen % 60k berrikuntzaren alde egiten du, baina gehienek kostua murrizteko edo kalitatea hobetzeko egiten dute eta ez dute benetako abantaila lehiakorra sortzen merkatuan. Alabaina, berrikuntza ez da etorkizunean mantentzeko tresna soila, etorkizunean liderra izateko estrategia baizik. Horretarako, gakoa teknologia ez ezik, pertsonak, estrategia eta egokitzeko gaitasuna ere badira.
Imanol Rego, Innobasque Berrikuntzaren Euskal Agentziako presidente berria
Manuel Salaverriaren lekukoa hartu du. Salaverriak euskal ekosistema publiko pribatuaren balioa sustatzen jakin du, Euskadi garatzeko bide estrategiko gisa
UNIREn bigarren edizioak 80 enpresa baino gehiago bildu ditu FICOBAn
Soldaduran eta beste lotura-teknologietan espezializatutako Estatuko azoka bakarra da
Euskadik Europan herrialde berritzaile gisa duen ahala finkatu du, enpresa txiki eta ertainen ahaleginari esker
Topaketak lurraldeko eta sektoreko berrikuntzaren 30 eragile eta Euskadiko 70 enpresa txiki eta ertain baino gehiago bildu ditu; eragile eta enpresa horiek 2023an berrikuntza-proiektu bat garatu dute HAZINNOVAren bidez, SPRIk eta Innobasque, Berrikuntzaren Euskal Agentziak kudeatutako Eusko Jaurlaritzaren programaren bidez
Soldaduraren balio-kateari buruzko azokaren, UNIREren, bigarren edizioa egingo dute Ficoban
Sektore horrek Estatu osoan egiten duen kongresu bakarra martxoaren 18 eta 19an izango da